قازاق مەملەكەتتىك قىزدار پەداگوگيكالىق ۋنيۆەرسيتەتىندە ءبىرىنشى كۋرس جەتكىنشەكتەرىن ستۋدەنت قاتارىنا قابىلداۋ سالتاناتى ءوتتى.
تاعىلىمدى تاربيە مەن ءورىستى ءبىلىمنىڭ ىرگەلى ورداسى اتانعان, كوپشىلىك قاۋىم «ىزەتتىلىك پەن ۇلگى-ونەگە وتاۋى» دەپ ات قويىپ, ايدار تاققان قىزدار ۋنيۆەرسيتەتى 75 جىلعا جۋىق ۋاقىت مەرزىمىندە قازاقستاندا پەداگوگيكالىق كادرلار دايىنداۋعا سۇبەلى ۇلەس قوسىپ كەلە جاتقان ۇلاعات ۇياسى.
بيىلعى وقۋ جىلىندا ءبىلىم ورداسىنا 43 ماماندىق بويىنشا 1633 ستۋدەنت قابىلداندى. ولاردىڭ 547-ءى مەملەكەتتىك ءبىلىم بەرۋ گرانتىنىڭ يەگەرلەرى.
ءداستۇرلى شاراعا ۋنيۆەرسيتەتتىڭ پروفەسسور-وقىتۋشىلارى مەن ەسىمى ەلگە بەلگىلى تۇلەكتەرى قاتىستى.
– قوش كەلدىڭىزدەر, قۇرمەتتى 1-كۋرس ستۋدەنتتەرى! ءححى عاسىر – جاڭالىعى جەلمەن جارىسقان, وي ءورىسى عارىشپەن تالاسقان ءبىلىمدى جاستاردىڭ عاسىرى. سىزدەر ءۇشىن ءومىردىڭ جاڭا پاراقتارى اشىلعالى وتىر. ء«بىلىم» اتتى عاجاپ الەمنىڭ سىرلارىن بويعا دارىتۋ ءۇشىن ەرەن ەڭبەك ەتىپ, زەرەك تە زەيىندى, العىر دا تاپقىر, بىلگىر دە بىلىكتى بولاتىندارىڭىزعا كامىل سەنىمدەمىز. قازاقستانداعى كوشباسشى وقۋ ورنىنا تۇسۋلەرىڭىزبەن شىن جۇرەكتەن قۇتتىقتايمىن, ءبىلىم الۋ جولىنداعى ساپارلارىڭىز ءساتتى بولسىن! – دەدى سالتاناتتى جيىندا ءسوز العان ۋنيۆەرسيتەت باسشىلارى.
سونىمەن قاتار, كەش بارىسىندا پەداگوگيكالىق وقۋ ورنىنىڭ قوعامدىق ومىرىنە بەلسەنە اتسالىسىپ جۇرگەن ءبىر توپ ستۋدەنتكە ارنايى العىس حات تابىستالدى.
ءوز كەزەگىندە ءبىرىنشى كۋرس بىلىمگەرلەرى قىزدار ۋنيۆەرسيتەتىنىڭ ستۋدەنتى دەگەن اتقا لايىقتى بولۋعا انت بەرىپ, سيمۆولدىق «ستۋدەنتتىك بيلەتكە» يە بولدى. قابىلداۋ كەشىنىڭ سوڭى وقۋ ورنىنىڭ ونەرلى جاستارىنىڭ مەرەكەلىك كونتسەرتىنە ۇلاستى.
وسى ورايدا ايتا كەتەيىك, بۇگىندە ۋنيۆەرسيتەتتىڭ 6 فاكۋلتەتىندەگى 43 باكالاۆر ماماندىق بويىنشا, ماگيستراتۋرادا 23 ماماندىق بويىنشا, 4 PhD ماماندىعى بويىنشا 9 مىڭعا جۋىق ستۋدەنت, ماگيسترلەر مەن دوكتورانتتار ءبىلىم الۋدا. ولارعا 55 عىلىم دوكتورى, 230-دان استام عىلىم كانديداتى مەن 90-عا جۋىق عىلىم ماگيسترى ءدارىس بەرەدى. 22 ۇستاز «جوعارى وقۋ ورنىنىڭ ۇزدىك وقىتۋشىسى» مەملەكەتتىك گرانتىنىڭ يەگەرى.