الماتىداعى اتى اڭىزعا اينالعان «مەدەۋ» مۇز ايدىنىنا سىرعاناق تەۋىپ, تاۋدىڭ جۇپار اۋاسىمەن تىنىستاۋعا كەلەتىندەردىڭ سانى بيىل جىلداعىدان ەداۋىر كوبەيگەن. ونىڭ سەبەبى اتالعان مۇز ايدىنىندا «سپورتتىق الماتى» باعدارلاماسىنىڭ شەڭبەرىندە ءداستۇرلى تەگىن ۇيرەتۋ ساباقتارى ءجۇرىپ جاتىر.
اپتانىڭ سەنبى-جەكسەنبى كۇندەرى كوپتەگەن الماتىلىقتار الاتاۋ باۋرايىنداعى مەدەۋ شاتقالىن بەتكە الادى. ءار تاراپتان اعىلعان وبلىس پەن قالا تۇرعىندارىنىڭ تەگىن ۇيرەنۋ ساباقتارىنا قاتىسىپ, سىرعاناۋ ونەرىنىڭ قىر-سىرىنا قانىعىپ, ەمىن-ەركىن دەمالۋىنا بارلىق جاعداي جاسالعان. سپورتتىق شاراعا ءارتۇرلى جاستاعى اۋەسقويلار قاتىسا الادى. تەگىن ۇيرەنۋ باعدارلاماسىنىڭ ارقاسىندا بۇگىنگى كۇنى 1500-گە جۋىق ازامات ارنايى مامانداردان ساباق العان.
– ءبىز وتباسىمىزبەن كونكي تەبۋدى ۇناتامىز. مەدەۋگە, وتباسىمىزبەن, دوستارىمىزبەن بىرگە كەلىپ تۇرۋ ءبىزدىڭ سۇيىكتى ىسىمىزگە اينالعان. مەدەۋ – تاريحى تەرەڭدە جاتقان اسەم قالامىزدىڭ ەڭ كورىكتى جەرلەرىنىڭ ءبىرى. وزگە ايماقتاردا تۇراتىن تۋىستارىمىز قوناققا كەلە قالسا الدىمەن مەدەۋ مەن كوكتوبەگە اپارۋىمىزدى سۇرايدى. ارنايى مامانداردىڭ كەلۋشىلەردى سىرعاناق تەبۋگە اقىسىز ۇيرەتۋى حالىققا كورسەتىلگەن ۇلكەن قولداۋ دەپ بىلەمىز. بۇگىن العاش رەت سپورتتىق ويىنعا قاتىسىپ سىيلىقتار ۇتىپ الدىق. ۇيىمداستىرۋشىلارعا زور العىس بىلدىرەمىز, – دەيدى قالا تۇرعىنى تاتيانا سوپكوۆا. جالعىز تاتيانا عانا ەمەس, سپورتتىق جوباعا قاتىسقان بارلىق قوناقتار ۇيىمداستىرۋشىلارعا ءدان ريزا.
ەسكە سالساق, «مەدەۋ» مۇز ايدىنىنىڭ قوناقتارى ءار اپتانىڭ سەنبى مەن جەكسەنبى كۇندەرى كەشكى ساعات جەتىدەن توعىزعا دەيىن ارنايى نۇسقاۋشىلاردىڭ كومەگىمەن كونكيدە سىرعاناۋدى تەگىن ۇيرەنە الادى. سونىمەن بىرگە, مەدەۋ كەلۋشىلەرىن ارنايى سىيلىقتارمەن قۋانتىپ, تاماشا كونتسەرتتىك باعدارلامالار سىيلايتىن بولادى. كونكيمەن سىرعاناۋعا اقىسىز تۇردە ۇيرەتۋ ساباقتارى جەلتوقسان ايىنىڭ 24-نە دەيىن جالعاسىپ, كەلەسى جىلدىڭ قاڭتارىندا قايتا ىسكە قوسىلماق.
«سپورتتىق شارانىڭ باستى ماقساتى قالاداعى بۇقارالىق سپورت تۇرلەرىن دامىتىپ, قالا تۇرعىندارى مەن قوناقتارىن سالاۋاتتى ءومىر سالتىن ۇستانۋعا شاقىرۋ» دەيدى جوبانى ۇيىمداستىرۋشىلار.
ارمان وكتيابر, «ەگەمەن قازاقستان»
الماتى