بۇگىن وڭتۇستىك قازاقستان وبلىسىنىڭ 80-گە جۋىق ارداگەرى مەن زيالى قاۋىم وكىلدەرى وڭىردەگى بىرقاتار ءوندىرىس وشاقتارىن ارالاپ كوردى. ونداعى ماقسات – ارداگەرلەرىمىزدى وبلىسىمىزدىڭ ەكونوميكالىق الەۋەتىمەن تانىستىرىپ, الداعى اتقارىلار جۇمىستارمەن حاباردار ەتۋ بولاتىن.
ارداگەرلەر ەڭ الدىمەن «وڭتۇستىك» ارنايى ەكونوميكالىق ايماعىندا ورنالاسقان «بالتەكستيل» جشس-ءنىڭ كىلەم فابريكاسىنا اتباسىن بۇردى. ىرگەتاسى 2012 جىلى قالانعان فابريكا بۇگىندە ورتا ازياداعى كىلەم وندىرەتىن ەڭ ءىرى ءوندىرىس وشاعى سانالادى. بۇگىندە مۇندا 235 ادام جۇمىسپەن قامتىلعان. قازىرگى تاڭدا فابريكا ونىمدەرى قىرعىزستان, تاجىكستان, ءازىربايجان, رەسەي, ۇلىبريتانيا, گەرمانيا جانە فرانتسياعا ەكسپورتتالۋدا. كاسىپورىن باسشىلىعىنىڭ ايتۋىنشا, بيىلدىڭ وزىندە زاۋىتقا شەتەلدىك تاپسىرىس بەرۋشىلەر سانى 20-دان اسىپتى. فابريكانىڭ ءجىپ ءيىرۋ تسەحى مەن كىلەم توقۋ بولىمدەرىن ارالاپ كورگەن ارداگەرلەر كاسىپورىن جۇمىسىنا وڭ باعاسىن بەردى.
«قوعامنىڭ قازىناسى, اقىلشىسى – ارداگەرلەر. وسىنى ەسكەرىپ, بۇگىنگى شارانى ۇيىمداستىرىپ وتىرعان ءوڭىر باسشىسىنا العىسىمىز شەكسىز. وبلىسىمىزدىڭ ەكونوميكالىق احۋالى كۇن ساناپ جاقسارىپ كەلە جاتقىنىن بايقاپ, ءبىلىپ وتىرمىز. سوندا دا زاۋىتتاردى ءوز كوزىمىزبەن كورىپ, اتقارىلىپ جاتقان جۇمىستاردىڭ كۋاسى بولۋىمىز ءبىز ءۇشىن ۇلكەن قۋانىش. ەندىگى جەردە ءبىز ارداگەرلەر جەر-جەرلەردە وڭىردە اتقارىلىپ جاتقان جۇمىستاردى ناسيحاتتاپ, حالىقتى ىنتىماق, بىرلىككە ۇندەۋىمىز كەرەك», - دەيدى قازاقستاننىڭ قۇرمەتتى ءجۋرناليسى, زەينەتكەر بايدۋللا قونىسبەك.
ارداگەرلەر اتباسىن بۇرعان ەكىنشى نىسان - «وڭتۇستىك» يندۋستريالدى ايماعىنداعى «ەۆروكريستالل» شىنى زاۋىتى بولدى. مۇندا جىلىنا 300 ملن دانا شىنى قۇتى شىعارىلادى. ءوندىرىس وشاعى الەمنىڭ وزىق قۇرال-جابدىقتارىمەن جابدىقتالعان. قازىر 150-گە جۋىق ازامات جۇمىس ىستەيدى.
مۇنان سوڭ ارداگەرلەر «Tectum Engineering» شيفەر ءوندىرۋ زاۋىتىنىڭ جۇمىسىمەن تانىستى. كاسىپورىن جىلىنا 2,3 ميلليون دانا شيفەر وندىرەدى. جوبا قۇنى 1.9 ملرد تەڭگەنى قۇرايدى. «حاتچەك» ادىسىمەن شيفەر شىعاراتىن زاۋىتتا 200 ادام جۇمىسپەن قامتىلعان. ال شىعارعان ونىمدەرىنىڭ 60 پايىزى ىشكى نارىقتى قامتىسا, قالعانى تاجىكستان, اۋعانستان, وزبەكستان, قىرعىزستانعا ەكسپورتتالادى.
«وڭتۇستىك» يندۋستريالدى ايماعىنداعى كورمە ورتالىعى دا اقساقالداردىڭ نازارىنان تىس قالعان جوق. زاۋىت جۇمىستارىن ءوز كوزىمەن كورگەن قاريالار كاسىپورىن باسشىلارىنا العىسىن ءبىلدىرىپ, الداعى جۇمىستارىنا تابىس تىلەدى.