بۇگىن قر ۇكىمەتىنىڭ وتىرىسى بارىسىندا اۋىل شارۋاشىلىعى ءبىرىنشى ۆيتسە-ءمينيسترى قايرات ايتۋعانوۆ اۋىل شارۋاشىلىعىن مەملەكەتتىك قولداۋدى ودان ءارى جەتىلدىرۋ بويىنشا قابىلدانىپ جاتقان شارالار تۋرالى باياندادى.
اگروونەركاسىپ كەشەنىن مەملەكەتتىك قولداۋدى جەتىلدىرۋ ماقساتىندا, سونداي-اق, 2017–2021 جىلدارعا ارنالعان اوك دامىتۋ مەملەكەتتىك باعدارلاماسىن ىسكە اسىرۋ اياسىندا اۋىل شارۋاشىلىعىنىڭ باسىمدىقتى باعىتتارىن دامىتۋ جانە اوك-كە مەملەكەتتىك قولداۋدى جەتىلدىرۋ كارتالارى ازىرلەندى.
اۋىل شارۋاشىلىعى كووپەراتسياسىن دامىتۋ, اگرارلىق قايتا وڭدەۋ, اوك قارقىندى تەحنيكالىق قايتا جابدىقتاۋ, تۇقىم شارۋاشىلىعى, وسىمدىكتەردى قورعاۋ, اگروحيميا, مال ازىعى ءوندىرىسى, كوتەرمە-ۇلەستىرۋ ورتالىقتارى, ەگىندىكتەردى ۇلعايتۋ, وتارلى قوي شارۋاشىلىعىن دامىتۋ بويىنشا ون كارتا قابىلداندى.
اگرارلىق عىلىمدى دامىتۋ, سيىر ەتى ءوندىرىسى, سۋبسيديالاۋدان جەڭىلدىكتى نەسيەلەندىرۋگە كوشۋ ارقىلى مەملەكەتتىك قولداۋ شارالارىنىڭ تيىمدىلىگىن ارتتىرۋ كارتالارى ازىرلەۋ ساتىسىندا تۇر.
سونداي-اق, وتىرىس بارىسىندا «اتامەكەن» ۇكپ اگروونەركاسىپتىك كەشەن كوميتەتىنىڭ توراعاسى يۆان ساۋەر, قازاقستان ماشينا جاساۋشىلار وداعىنىڭ توراعاسى مەيرام پىشەمباەۆ, س. سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ رەكتورى اقىلبەك كۇرىشباەۆ, قاراعاندى وبلىسى فەرمەرلەر وداعىنىڭ توراعاسى يگور جابياك, جامبىل وبلىسىنىڭ اكىمى كارىم كوكىرەكباەۆ, اقمولا وبلىسىنىڭ اكىمى مالىك مىرزالين ءسوز سويلەدى.
ماسەلەنى قاراۋ قورىتىندىسى بويىنشا پرەمەر-مينيستر باقىتجان ساعىنتاەۆ بىرقاتار ناقتى تاپسىرمالار بەردى:
اۋىل شارۋاشىلىعى مينيسترلىگىنە اكىمدىكتەرمەن بىرلەسىپ, اۋىل شارۋاشىلىعى ءونىمىن شىعارۋدان باستاپ ونى سىرتقى نارىقتارعا ەكسپورتتاۋعا دەيىن ءتيىمدى تىزبەك قۇرۋ;
قر اشم-گە قر بعم-مەن بىرلەسىپ, اۋىلدا مىندەتتى تۇردە ەڭبەكپەن قامتاماسىز ەتۋ شارتىمەن, اۋىل جاستارىنا بەرىلەتىن گرانتتاردىڭ سانىن ۇلعايتۋ ماسەلەسىن پىسىقتاۋ;
قر اشم-گە اكىمدىكتەرمەن بىرلەسىپ, وڭىرلەردىڭ ماماندانۋىن ەسكەرە وتىرىپ, اۋىل شارۋاشىلىعى ونىمدەرىن سۋبسيديالاۋ تەتىگىنە ەگجەي-تەگجەيلى تالداۋ جاساۋ, سونداي-اق, بۇگىن ۇسىنىلعان بارلىق شارالاردى 2021 جىلعا دەيىنگى اوك دامىتۋ مەملەكەتتىك باعدارلاماسىنا بىرىكتىرۋ ماسەلەسىن پىسىقتاۋ تاپسىرىلدى.