قانات يسلام قازاقستاندىق «جىل تاڭداۋى» جوباسىنىڭ نۇسقاسى بويىنشا جىلدىڭ ۇزدىك سپورتشىسى اتاندى. بۇل تۋرالى قانات يسلامنىڭ PR-مەنەدجەرى بەرىك سۇلتان Facebook جەلىسىندەگى پاراقشاسىندا جازدى.
«قانات يسلام «جىل تاڭداۋى» جوباسىنىڭ نۇسقاسى بويىنشا جىل سپورتشىسى اتاندى. كəسىپقوي رينگتە 25 كەزدەسۋ وتكىزىپ بارلىعىندا جەڭىسكە جەتكەن, ونىڭ 20-سىن نوكاۋتپەن ۇتقان ۇلتىمىزدىڭ ماقتانىشى, WBA intercontinental, WBO NABO چەمپيوندىق بەلبەۋىنىڭ يەگەرى قانات يسلام «قازاقستانداعى №1 جىل تاڭداۋى» - «التىن ادام» سىيلىعىنىڭ لاۋرەاتى جəنە «جىل سپورتشىسى» اتاندى», - دەپ جازدى بەرىك سۇلتان
ايتا كەتەيىك, ءبىرىنشى ورتا سالماقتا جۇدىرىقتاساتىن قانات يسلام سوڭعى جەكپە-جەگىن استانا قالاسىندا كانادالىق برەندون كۋككە قارسى وتكىزىپ, توعىزىنشى راۋندتا تەحنيكالىق نوكاۋتپەن جەڭىسكە جەتكەن بولاتىن. وسى جەڭىسىنىڭ ارقاسىندا وتانداسىمىز ءبىرىنشى ورتا سالماقتاعى WBO, NABO جانە WBA Inter-Continental چەمپيوندىق بەلبەۋلەرىن قورعاپ قالدى.