اباي اتامىز مىنا ءبىر فوتوسۋرەتكە 1903 جىلى ومىردەن وتەرىنەن ءبىر جىل بۇرىن 58 جاسىندا جيدەباي اۋىلىندا, ءۇي-ءىشى, وتباسىمەن بىرگە كوكتەم ۋاقىتى, مامىر ايىنىڭ باس كەزىندە, كيىز ءۇيدىڭ ىشىندە تۇسكەن ەكەن.
سولدان وڭعا قاراي: ءبىرىنشى قاتاردا بورىك كيىپ وتىرعان قىز بالا – پاكيزات. پاكيزاتتىڭ باسىنا كيىپ وتىرعان بوركى بۇل كۇندە جيدەبايداعى اباي مۋزەي-ۇيىندە ەكسپوزيتسيادا تۇر. ودان كەيىنگى وتىرعاندار – تۇراعۇل مەن اۋباكىر. پاكيزات پەن اۋباكىر ەكەۋى دە اقىلبايدىڭ بالالارى. ابايدىڭ كەنجە ءىنىسى وسپان وزىندە بالا بولماعاندىقتان بۇل ەكەۋىن دە باۋىرىنا سالىپ العان.
ەكىنشى قاتارداعىلار – اباي, ەركەجان جانە قاماليا. قاماليا – اۋباكىردىڭ ايەلى. بۇل كىسىنىڭ اباي تۋرالى ايتقان ەستەلىكتەرى مۇراجاي قورىندا ساقتاۋلى تۇر. ال ەركەجان – وسپاننىڭ بايبىشەسى. ونى وسپان قايتىس بولعاننان كەيىن, امەڭگەرلىك جولمەن 1894 جىلى اباي ءوزى الىپ, ءومىرىنىڭ سوڭعى ون جىلىن جيدەبايدا وسى ەركەجانمەن بىرگە وتكىزگەن. ءۇشىنشى قاتاردا تۇرعان – ماعاۋيا.
فوتوسۋرەتتى تۇپنۇسقادان 1959 جىلى قايتا كوشىرىپ, اباي مۋزەيىنە وتكىزگەن – جازۋشى مۇحتار اۋەزوۆ. ال تۇپنۇسقاسى الماتىداعى م.اۋەزوۆ مۋزەيىندە ساقتالعان. سۋرەتتىڭ كولەمى – 13 ح 23 سم, قور كىتابىندا 461\542 ينۆەنتارعا تىركەۋلى تۇر.
بۇل فوتوسۋرەت كوپتەگەن باسىلىمدارعا شىعىپ, تانىمال بولدى. قازىردىڭ وزىندە سۋرەتتىڭ كوشىرمەسى قازاقستان رەسپۋبليكاسى ۇلتتىق مۋزەيىنىڭ «قازاقستان تاريحى» زالىنىڭ ء«حىح عاسىرداعى ۇلىلار» ەكسپوزيتسياسىندا كورمەدە تۇر.
قايىرجان كۇزەمباەۆ, ۇلتتىق مۋزەيدىڭ عىلىمي قىزمەتكەرى