رەجيسسەر ءسابيت قۇرمانبەكوۆتىڭ «ورالمان» ءفيلمى قاراشانىڭ 9-19 كۇندەرى وتەتىن LXVI حالىقارالىق مانگەيم-حايدەلبەرگ (International Filmfestival Mannheim-Heidelberg) كينوفەستيۆالىنىڭ نەگىزگى باعدارلاماسىندا باق سىنايدى, دەپ حابارلايدى egemen.kz «قازاقفيلمنىڭ» ءباسپاسوز قىزمەتىنە سىلتەمە جاساپ.
رەجيسسەردىڭ ايتۋىنشا ۇركىن-قورقىن زاماندا تۋعان جەرىنەن اۋعانستانعا كوشۋگە ءماجبۇر بولعان, ونداعان جىلدار وتكەن سوڭ اتاجۇرتىنا قايتا ورالعان قانداستارىمىزدىڭ تاعدىرى بەينەلەنگەن بۇل فيلم نەمىستەرگە دە جات ەمەس كورىنەدى.
ء«فيلمنىڭ گەرمانيانىڭ فەستيۆالىنە قاتىساتىنىنا قۋانىشتىمىن. مەنىڭ تۋعان اۋىلىم الدابەرگەندە نەمىستەر كوپ تۇراتىن. سىنىپتاستارىمنىڭ جارتىسى نەمىستەر ەدى. كوبى 80 جىلداردىڭ اياعىندا تاريحي وتاندارىنا كەتتى. ولار دا اتامەكەندەرىندە ءتۇرلى قيىندىققا تاپ بولدى. سوندىقتان دا رەپاتريانتتار تاقىرىبى بۇكىل الەمدە وزەكتى», - دەيدى ءسابيت قۇرمانبەكوۆ.
حالىقارالىق مانگەيم-حايدەلبەرگ كينوفەستيۆالى 1952 جىلدان بەرى وتكىزىلىپ كەلەدى. فەستيۆال كينويندۋستريانىڭ كاسىبي ماماندارىنا جانە كينوسۇيەر قاۋىمعا ارنالعان. جىل سايىن فەستيۆالگە 500 كاسىبي مامان مەن 60 مىڭ كورەرمەن قاتىسادى. وندا «ۇزدىك فيلم», «ارنايى جۇلدە», «جەتىستىكتەرى ءۇشىن ارنايى جۇلدە» سياقتى اتالىمدار بويىنشا ۇزدىكتەر انىقتالادى. نەگىزگى كونكۋرستىق جۇلدەدەن باسقا فەستيۆال اياسىندا كينوتەاتر يەگەرلەرى جانە حالىقارالىق كينوباسپاسوز فەدەراتسياسى دا (فيپرەسسي) وزدەرىنىڭ ماراپاتتارىن تابىستايدى. سونداي-اق, «كورەرمەندەر كوزايىمى» جۇلدەسى دە بەرىلەدى.
بيىل وتاندىق كارتينادان باسقا 22 ەلدەن 21 كارتينا فەستيۆالدىڭ باس جۇلدەسىنە تالاسادى. ولاردىڭ قاتارىندا فرانتسيا, ارگەنتينا, دانيا, ەستونيا, يسلانديا, ءۇندىستان, يران, يزرايل, تۇركيا, اقش, گەرمانيا سياقتى ەلدەر بار.
جەڭىمپازدار ەسىمى 19 قاراشا كۇنى فەستيۆالدىڭ جابىلۋ سالتاناتىندا جاريالانادى.
ايتا كەتەيىك, وسى جىلدىڭ جەلتوقسانىندا باشقۇرتستاندا وتەتىن IV حالىقارالىق «كۇمىس اقبوزات» كينوفەستيۆالىنىڭ اشىلۋ سالتاناتى «ورالمان» فيلمىمەن اشىلادى.
«ورالمان» كوركەم ءفيلمى وسى جىلدىڭ باسىندا يراننىڭ استاناسى تەگەراندا وتكەن XXXV حالىقارالىق فادجر كينوفەستيۆالى مەن XIII حالىقارالىق «ەۋرازيا» كينوفەستيۆالىنىڭ باس جۇلدەسىن جەڭىپ العان بولاتىن. فيلمدە باستى ءرولدى سومداعان اكتەر دۋلىعا اقمولدا قىركۇيەك ايىندا تاتارستاندا وتكەن XIII حالىقارالىق مۇسىلماندار كينوسى فەستيۆالىندە «ۇزدىك ەر ادام ءرولى» جۇلدەسىمەن ماراپاتتالدى. سونداي-اق, كارتينا يتاليادا وتكەن حح حالىقارالىق «Religion Today» كينوفەستيۆالىندە «ۇزدىك فيلم» نوميناتسياسىندا جەڭىسكە جەتىپ, تاۋەلسىز SIGNIS قازىلار القاسىنىڭ ارنايى جۇلدەسىن يەمدەنگەن ەدى.