وسكەمەندەگى ورالحان بوكەي اتىنداعى قالالىق ورتالىق كىتاپحانادا اقىن, دراماتۋرگ اسكەرحان اقتايدىڭ «سەزىم پەرنەسى» اتتى شىعارماشىلىق كەشى ءوتتى.
قالىڭ قازاق شوعىرلانعان موڭعوليانىڭ بايان ولگەي ايماعىندا دۇنيە ەسىگىن اشىپ, 2009 جىلى اتاجۇرتقا ورالعان تالانت يەسى سوڭعى 4-5 جىلدىڭ مۇعدارىندا حالىقارالىق, رەسپۋبليكالىق ءمۇشايرالاردىڭ الدىن بەرمەي جۇرگەنى جىرسۇيەر قاۋىمعا ايان. قىرىقتان اسقان شاعىندا شابىتى تاسقىنداعان اقىنعا «پوەزياعا نەگە كەش كەلدىڭىز؟» دەگەن ساۋالدىڭ ءجيى قويىلۋى دا زاڭدى سەكىلدى. بۇل كۇنى التايدىڭ ار جاعىنان, بەسبوعدا باۋرايىنان ەلگە كەلىپ, جالىندى جىرىمەن جارق ەتىپ كورىنىپ, جۇرتتى جالت قاراتقان اسكەرحان اقتاي شىعارماشىلىعىنا قىزىعۋشىلىق تانىتىپ, سۇراق قويۋشىلار كوپ بولدى. «ولەڭ – الا تاعالانىڭ بەرگەن سىيى. حالىقتىڭ قازىناسى. ەڭ باستىسى, اتا-بابامىزدىڭ قانىمەن بويىمىزعا سىڭگەن قاستەرلى ونەر - ولەڭدى ەلدىڭ يگىلىگىنە, جۇرتتىڭ كادەسىنە جاراتا الساق بولعانى. ال ولەڭنىڭ ومىرشەڭدىگىن ۋاقىت كورسەتەدى. پوەزياعا كەشىگىپ كەلدىم دەپ ايتا المايمىن. كەرىسىنشە وقىرمان قالىپتاسقان, سۇرانىس بولعان ۋاقىتتا كەلدىم دەپ ويلايمىن. ءوزىم ءداستۇرلى جانە جىراۋلىق پوەزيانىڭ ۇلگىسىمەن جازامىن. بۇل باعىتتاعى ولەڭدەرگە جۇرتتىڭ قىزىعۋشىلىعى جوعارى», - دەيدى ول.
«التىنمەن اپتالعان ايقاستى ەرىڭدى ەكى بالۋان ارەڭ كوتەردى,
كۇمىس جۇگەنىمدى ەكى ۇل ارەڭ اپەردى», - دەپ جۇرتتىڭ ايبىنىن اسقاقتاتىپ, رۋحىن كوتەرەتىن جىر جازاتىن اقىنعا شارا بارىسىندا ءوزى تۋىپ-وسكەن بايان ولگەي ايماعى مەن وسكەمەننىڭ زيالى قاۋىم وكىلدەرى لەبىزدەرىن ءبىلدىردى.
«ەسىكتەن كىرگەندە قازاقى ءيىس اڭقىپ قويا بەردى. قازاقتىڭ ءسۇرى قازىسى مەن قىمىزىنىڭ ءيىسى. اپىرماۋ, بۇل قايدان كەلگەن دەسەم, ولگەيدەن كەلگەن ەكەن» دەپ اعىنان جارىلعان اقىن, جازۋشى الىبەك قاڭتارباەۆ ءا.اقتاي قازاق پوەزياسىنا جاڭا لەپ اكەلگەنىن ايتتى.
ازامات قاسىم, «ەگەمەن قازاقستان»