ءبىز, پارلامەنت ءماجىلىسىنىڭ ءبىر توپ دەپۋتاتتارى 2017 جىلعى 6 قىركۇيەكتە بيىل مەكتەپ بىتىرگەن تۇلەكتەرگە جوعارى وقۋ ورىندارىندا ءبىلىم الۋ ءۇشىن بولىنگەن مەملەكەتتىك ءبىلىم بەرۋ گرانتتارىن ۇيلەستىرۋ ءىسى قوعامدا نارازىلىقتار تۋدىرعانى جونىندە پرەمەر-ءمينيستردىڭ ورىنباسارى ە.دوساەۆتىڭ اتىنا دەپۋتاتتىق ساۋال جولداعان ەدىك. وعان 2017 جىلعى 6 قازاندا № 20-34/2440 حاتپەن «التىن بەلگى» يەگەرلەرىنىڭ باسىم قۇقىعىنىڭ ساقتالۋى جانە لاۋازىمدى قىزمەتكەرلەرگە قاتىستى جاۋاپكەرشىلىك شارالارى جوعارى وقۋ ورىندارىنا قابىلداۋ بويىنشا جىل سايىنعى مونيتورينگ شەڭبەرىندە اعىمداعى جىلعى قازاندا قارالاتىن بولادى دەگەن سىرعىتپا جاۋاپ بەرىلدى. اتالعان ماسەلەلەرگە ناقتى جاۋاپ بولماعاندىقتان, ءبىز تومەندەگى سۇراقتارىمىزدى پرەمەر-مينيستر باقىتجان ساعىنتاەۆتىڭ اتىنا جولدادىق:
1. ءبىلىم جانە عىلىم مينيسترلىگىنىڭ مەملەكەتتىك ءبىلىم گرانتتارىن تاعايىنداۋ جونىندەگى كونكۋرستىق كوميسسياسى قولدانىستاعى زاڭنامانى باسشىلىققا الماي, ەندى عانا دايىندالىپ, ءالى قابىلدانباعان زاڭ جوباسىنا سىلتەمە جاساپ, زاڭ بۇزۋشىلىققا نەگە جول بەردى؟
2. 2017 جىلعى 26 شىلدەدەگى «جوعارى ءبىلىم الۋعا اقى تولەۋ ءۇشىن ءبىلىم بەرۋ گرانتىن بەرۋ» ەرەجەسىنە وزگەرتۋلەر مەن تولىقتىرۋلار ەنگىزۋ تۋرالى قازاقستان رەسپۋبليكاسى ۇكىمەتىنىڭ №446 قاۋلىسى بويىنشا گرانت بولۋدە «التىن بەلگى» يەگەرلەرىنىڭ باسىمدىق قۇقىعى ساقتالادى دەلىنگەن. ءبىلىم جانە عىلىم مينيسترلىگىنىڭ وسى قاۋلىنىڭ تالابىن بۇزۋىنا قانداي نەگىز بولدى؟
3. ءبىرىنشى تىزىمدە گرانت تاعايىندالىپ, ەكىنشى تىزىمدە گرانتقا ىلىنبەگەن تالاپكەرلەردىڭ ماسەلەسى قالاي شەشىلدى؟ ەلىمىزدىڭ ءبىر جوعارى وقۋ ورنىنا تۇسۋشىلەر تىزىمىنەن الىنىپ تاستالىپ, باسقا وڭىرلەردەگى جوعارى وقۋ ورىندارىنا جىبەرىلگەن تالاپكەرلەردىڭ الەۋمەتتىك جاعدايلارى ەسكەرىلدى مە؟
4. كەيبىر مەديتسينالىق ماماندىقتار بويىنشا بولىنگەن مەملەكەتتىك تاپسىرىستىڭ مەديتسينالىق جوعارى وقۋ ورىندارىنىڭ اراسىنداعى ءبولىنىسى قۇجاتتار تاپسىرۋ اياقتالۋىنا 1 كۇن قالعاندا جاريالانۋ سەبەبى نەدە؟ بۇقارالىق اقپارات قۇرالدارىندا تارالعان اقپاراتقا سايكەس مەديتسينالىق جوعارى وقۋ ورنىنا تۇسۋگە «التىن بەلگى» يەگەرلەرىنە بەرىلگەن 220 گرانتتى دەنساۋلىق ساقتاۋ مينيسترلىگى ءبىر كۇندە جارامسىز ەتىپ تاستاعانىن قالاي تۇسىنۋگە بولادى؟
5. گرانت ءبولۋ كەزىندە ەكى ءتۇرلى بۇيرىق شىعارىپ, قاتەلىك جىبەرگەن ءبىلىم جانە عىلىم, دەنساۋلىق ساقتاۋ مينيسترلىكتەرىنىڭ جاۋاپتى قىزمەتكەرلەرى قانداي جاۋاپكەرشىلىككە تارتىلدى دەگەن سۇراقتارعا دا ناقتى جاۋاپ بەرىلمەۋىنىڭ سەبەبى نەدە؟
سونىمەن بىرگە ە.دوساەۆتىڭ اتىنان كەلگەن رەسمي جاۋاپتا قۇجاتتى دايىنداعان ورىنداۋشىنىڭ اتى-ءجونى مەن تەلەفون ءنومىرى كورسەتىلمەگەن. مۇنىڭ ءوزى پارلامەنت دەپۋتاتتارىن سىيلاماۋشىلىق بەلگىسى عانا ەمەس, پرەمەر-ءمينيستردىڭ قاۋلىسىمەن بەكىتىلگەن كەڭسەدە ءىس جۇرگىزۋ جونىندەگى نۇسقاۋلىقتىڭ 44-تارماعىن بۇزۋ دەپ سانايمىز. وسى ماسەلەگە دە نازار اۋدارىپ, شارالار قولدانۋىڭىزدى سۇرايمىز.
ءابدىماناپ بەكتۇرعانوۆ,
ءماجىلىس دەپۋتاتى