ەلباسى نۇرسۇلتان نازارباەۆ «بولاشاققا باعدار: رۋحاني جاڭعىرۋ» ماقالاسىندا «قوعامدىق سانانىڭ جاڭعىرۋىنىڭ نەگىزگى قاعيدالارىن قالىپتاستىرۋدى عانا ەمەس, سونىمەن بىرگە ءبىزدىڭ زامان سىناعىنا لايىقتى توتەپ بەرۋىمىزگە قاجەتتى ناقتى جوبالاردى جۇزەگە اسىرۋىمىزدى دا تالاپ ەتەدى. بىرىنشىدەن, قازاق ءتىلىن بىرتىندەپ لاتىن الىپبيىنە كوشىرۋ جۇمىستارىن باستاۋىمىز كەرەك. ءبىز بۇل ماسەلەگە نەعۇرلىم دايەكتىلىك قاجەتتىگىن تەرەڭ ءتۇسىنىپ, بايىپپەن قاراپ كەلەمىز جانە وعان كىرىسۋگە تاۋەلسىزدىك العاننان بەرى مۇقيات دايىندالدىق», دەگەن بولاتىن.
مۇنان كەيىن مەملەكەت باسشىسىنىڭ باستاماسىمەن لاتىن ارپىنە كوشۋ ۇسىنىلىپ, قوعامدا قىزۋ تالقىلاۋعا تۇسكەن ەدى. لاتىن ءالىپبيىنىڭ قاي نۇسقاسىن الامىز دەگەن سۇراق ەل تۇرعىندارىن بەيجاي قالدىرماعانى انىق. بۇل ماسەلە جونىندە جۇمىس توبى قۇرىلىپ, كەلىپ تۇسكەن ۇسىنىستار مەن ءالىپبيدىڭ ءتۇرلى نۇسقالارى قوعامدا جان-جاقتى تالقىلاۋعا شىعارىلدى. وندا عالىمدار, قوعام قايراتكەرلەرى, ءتىلتانۋشى ماماندار ءوز تاراپىنان پىكىرلەر ءبىلدىرىپ, ورتاق شەشىمگە كەلدى. ەندى مىنە, سوڭعى نۇسقاسىن بەكىتۋ تۋرالى ورتاق قورىتىندىعا كەلىپ, ەلباسىنىڭ جارلىعى دا شىقتى. ءبىز جاڭا ءالىپبيدى ەندىرۋ تۋرالى ءوز شەشىمىمىزدى زاڭداستىرىپ وتىرمىز. بۇل ەل تاريحىنداعى ناقتى قادام, رۋحاني جاڭعىرۋىمىزداعى ماڭىزدى بەلەس بولعالى وتىر.
تاۋەلسىزدىك العاننان بەرى جاس مەملەكەت رەتىندە الەمدىك ينتەگراتسيالىق ۇردىستەرگە بەلسەندى اتسالىسىپ كەلەمىز. بۇگىنگى الەمدەگى اقپارات پەن عىلىمي دەرەكتەردىڭ 70 پايىزى لاتىن ارپىندەگى ماتىندەرمەن تارايدى. ەندەشە الەمدەگى الدىڭعى قاتارلى 30 ەلدىڭ قاتارىنا ەنۋ ءۇشىن ءبىزدىڭ دە لاتىن الىپبيىنە كوشۋىمىز ۋاقىت تالابى دەگىم كەلەدى.
قازاقستان حالقى مەن ەلدەگى ءتۇرلى قاۋىمداستىقتار مەن ۇيىمدار, عالىمدار, شىعارماشىلىق ادامدارى, قازاقستان حالقى اسسامبلەياسى, قازاقستان دەموكراتيالىق كۇشتەر كواليتسياسى ەلباسىنىڭ لاتىن الىپبيىنە كوشۋ يدەياسىن قولدايتىندىعىن ءبىلدىرىپ, ول پىكىرلەرىن بۇقارالىق اقپارات قۇرالدارىندا اشىق جاريالادى.
لاتىن الىپبيىنە كوشۋدىڭ ەلىمىز ءۇشىن بىرنەشە ارتىقشىلىعى بار. سونىڭ ءبىرى ءتىل تازالىعىندا. لاتىنعا كوشۋ ارقىلى تىلىمىزدەگى قازىرگى جات دىبىستاردى تاڭبالايتىن ارىپتەردى قىسقارتىپ, قازاق ءتىلىنىڭ تابيعي تازا قالپىن ساقتاۋعا مۇمكىندىك الامىز. سونىمەن قاتار قازاق ءتىلىن وقىتقان ۋاقىتتا باسى ارتىق تاڭبالارعا قاتىستى ەملە, ەرەجەلەردىڭ قىسقاراتىنى بەلگىلى. ول مەكتەپتەن باستاپ بارلىق وقۋ ورىندارىندا وقىتۋ ءۇردىسىن جەڭىلدەتەدى. ۋاقىت تا, قارجى دا ۇنەمدەلەدى, قازاق تىلىنە كومپيۋتەرلىك جاڭا تەحنولوگيالار ارقىلى حالىقارالىق اقپارات كەڭىستىگىنە كىرىگۋگە ءتيىمدى جولدار اشىلادى.
سونىمەن قاتار لاتىن الىپبيىنە كوشۋ – قازاق ءتىلىنىڭ حالىقارالىق دارەجەگە شىعۋىنا جول اشادى. بۇگىنگى كومپيۋتەرلەردىڭ دامىعان زامانىندا ينتەرنەت جۇيەسىندە ۇستەمدىك ەتەتىن لاتىن ءالىپبيى ەكەندىگى بارشامىزعا بەلگىلى. بارلىق ءدارى-دارمەك اتاۋلارى, تەحنولوگيا, ماتەماتيكا, فيزيكا, حيميا فورمۋلالارى, عىلىمي تەرميندەر, ماماندىقتارعا قاتىستى عىلىمي ادەبيەتتەر ت.ب. لاتىن الىپبيىمەن بايلانىستى ەكەنى ايدان انىق. ياعني, لاتىن ءالىپبيى بىزگە جاڭالىق نە بولماسا تاڭسىق ەمەس. ونى ءبىز كۇندەلىكتى ومىردە قولدانىپ تا ءجۇرمىز.
بۇگىندە ءتۇبى ءبىر تۇركى ەلدەرىنىڭ بارلىعى لاتىن ءارپىن قولدانۋدا. ءبىز وزىمىزگە دەيىن لاتىن الىپبيىنە كوشكەن تۇركىتەكتەس ەلدەردە بولعان ولقىلىقتاردى جىبەرىپ الماي, ولاردىڭ تاجىريبەلەرىن ەسكەرىپ, بايىپتىلىقپەن, جان-جاقتى تارازىلاپ, ورتاق شەشىممەن جۇزەگە اسىرۋعا تىرىسىپ جاتىرمىز. بۇل وڭدى قادام.
مەملەكەت باسشىسى اتاپ وتكەندەي, مەكتەپ قابىرعاسىندا بالالارىمىز اعىلشىن ءتىلىن وقىپ, لاتىن ارىپتەرىن ونسىز دا ۇيرەنىپ جاتىر. سوندىقتان, جاس بۋىن ءۇشىن ەشقانداي قيىندىق, كەدەرگىلەر جوق دەپ ويلايمىن. ەلباسى ايتقانداي بۇل ء«بىزدىڭ بالالارىمىزدىڭ بولاشاعى ءۇشىن» جاسالىپ وتىرعان قاجەتتى شارا. ولاي بولسا بولاشاق ۇرپاقتى ويلايتىن ءار ازاماتتىڭ, ءار ادامنىڭ بۇل ماڭىزدى شەشىمدى ءارى قاراي قولدايتىنىنا سەنەمىن.
لاتىن الىپبيىنە كوشۋ تۋرالى ەلباسىنىڭ جارلىققا قول قويۋى تاۋەلسىز قازاقستان تاريحىنداعى ايتۋلى تاريحي وقيعالاردىڭ ءبىرى بولىپ وتىر. بۇل ەلىمىزدىڭ بولاشاق باعدارىن انىقتاۋداعى, رۋحاني جاڭعىرۋ جولىنداعى جاسالىپ وتىرعان ماڭىزدى قادام دەگىم كەلەدى. مۇنى «اۋىل» پارتياسى تولىق قولدايدى.
ءالي بەكتاەۆ, پارلامەنت سەناتىنىڭ دەپۋتاتى, «اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى