وبلىس ورتالىعىنداعى 2011 جىلى اشىلعان №4 ەمحانا ۋسولكا شاعىن اۋدانىندا ورنالاسقان. بۇل اۋداننىڭ ءوزى ءبىر قالاشىققا اينالعان, اۋماعىندا ەرتىس وزەنىنىڭ جاعاسىندا بىرىنەن سوڭ ءبىرى بوي كوتەرگەن كوپ قاباتتى ۇيلەر, نازارباەۆ زياتكەرلىك مەكتەبى, وبلىستىق بالالار اۋرۋحاناسى, كارديوحيرۋرگيالىق ورتالىق, №25 مەكتەپ, بالاباقشالار مەن ساۋدا ورتالىقتارى بار.
اۆتوبۋس قاتىناسى تۇراقتى, ترامۆاي جۇرەدى. جارقىرعان جاڭا ەمحانا وسى اۋدان تۇرعىندارىنىڭ مەديتسينالىق قىزمەتتەرگە دەگەن بارلىق قاجەتتىلىكتەرىنە ساي قىزمەت كورسەتۋدە. ەمحانا كۇنىنە 150 بالانى جانە 350 ەرەسەك ادامدى قابىلداي الادى. وبلىسقا كەلگەن جۇمىس ساپارىنىڭ بىرىندە ەلباسى نۇرسۇلتان نازارباەۆ ەمحانانى ارالاپ كورىپ, دارىگەرلەرمەن كەزدەسكەن بولاتىن.
– بۇل بىزدەر, دارىگەرلەر ءۇشىن ۇلكەن قۋانىش بولدى. ەمحانانىڭ تاريحي ەرەكشە كۇنى دەيمىز. جاڭادان كەلگەن جاس دارىگەرلەردى جۇمىسقا قابىلداۋ كۇنى ۇنەمى وسى ساپار بارىسىن ايتىپ, قىزمەتتەرىنە ساتتىلىك تىلەيمىز, – دەيدى ەمحانانىڭ باس دارىگەرىنىڭ ورىنباسارى بوتاكوز تۇرعانباەۆا. – وسى جۋىردا عانا ەمحانادا «جاس ماماننىڭ ماماندىققا يە بولۋى» اتتى جىل سايىنعى ءداستۇرلى شارامىزدى وتكىزدىك.
№4 ەمحانا قىزمەتكەرلەرىنىڭ قاتارىن شىڭعىس ءۋاليحانوۆ, سالتانات ءجۇمادىلوۆا, ريزاگۇل قابدوللا, داريعا ماتكەنوۆا, اكۋشەر-گينەكولوگتار زارينا امانقۇل, گيۋزال جاباعينا, ولگا اماناتيدي سەكىلدى جاس دارىگەرلەر تولىقتىردى.
– بۇل جاس ماماندار بيىل عانا سەمەيدەگى مەديتسينالىق جوعارى وقۋ ورنىن ءبىتىرىپ, ديپلومدارىن العان. ولاردىڭ الدىندا حالىق دەنساۋلىعىنا جاۋاپتى ناعىز كاسىبي ماماندىق جولى اشىلدى. ساتتىلىك تىلەيمىز, دەيدى ەمحانا ۇجىمى.
ەمحانا جاڭا زاماننىڭ مەديتسينالىق قۇرىلعىلارمەن جاراقتاندىرىلعان. بولىمشەلىك قىزمەتتەر, ءار سالا ماماندارىنىڭ كابينەتى, دياگنوستيكالىق-زەرتحانا كەشەنى, فيزيوتەراپيالىق ءبولىم جانە 30 ورىنعا شاقتالعان كۇندىزگى ستاتسيونار بار. ساندىق رەنتگەنوگرافيا, فليۋوروگرافيا, رەنتگەن دياگنوستيكاسى, مامموگرافيالىق اپپارات, ۋلترادىبىستى زەرتتەۋ سكانەرى جانە زاماناۋي زەرتحانا قۇرىلعىسىمەن جابدىقتالعان.
ەندى جاس دارىگەرلەرگە تاجىريبەلى ماماندار تالىمگەر بولادى. كەشە عانا ستۋدەنتتىك اۋديتوريادان شىققان ماماننىڭ پەدياتر, گينەكولوگ, حيرۋرگ سياقتى ماماندىعىنا ساي لايىقتى ەڭبەك ەتىپ, ەمحانانىڭ تىنىس-تىرشىلىگىنە ۇيرەنىپ كەتۋلەرىنە قولداۋ, كومەك كورسەتىلۋدە. جاس مامانداردى ەمحاناعا قابىلداۋ كۇنىنە ت.جولدىباەۆ, و.پريحودكو سياقتى ارداگەر دارىگەرلەر كەلىپ, ناۋقاستاردان تەك العىس الۋعا شاقىرىپ, اقىل-كەڭەستەرىن ايتتى. شارا سوڭىندا جاس ماماندار «جاس دارىگەر» انتىن قابىلدادى.
فاريدا بىقاي, «ەگەمەن قازاقستان»
پاۆلودار