ءبىر قىزىعى, عالامنىڭ عاجايىپ عيماراتتارىنىڭ تۇرعىزىلۋ تاريحى ۇمىت قالىپ جاتاتىنى دا بار.
كەيدە تۋريستەرگە نەمەسە ساياحاتشىلارعا مونۋمەنتتىڭ وزىنەن ونىڭ تۇرعىزىلۋ تاريحى تارتىمدىراق. ونىڭ مادەني جانە تاريحي ەسكەرتكىش رەتىندەگى الاتىن ورنى تۋرالى دا اقپارات العىسى كەلەدى. داتكە قۋات دەيتىنىمىز, دالامىزدىڭ تورىندە بىرقاتار تاريحي كەسەنەلەر ساقتالىپ قالدى. سونىڭ ارقاسىندا بۇل ارحەولوگيالىق ەسكەرتكىشتەر ۇلتتىڭ شىن مانىندەگى قۇندىلىعىنا اينالدى.
سونىمەن «قازاقستان اڭىزدارى» جارنامالىق شاراسى اياسىندا, قازاقستاننىڭ قاسيەتتى جەرلەرى – ايشا ءبيبى كەسەنەسى, قوجا احمەت ياساۋي كەسەنەسى جانە ارحەولوگيالىق قازبالار ناتيجەسىندە تابىلعان ەڭ تانىمال جادىگەر «التىن ادام» تۋرالى تۇسىرىلگەن بەينەباياندار بيىل 4 قاراشادان باستاپ BBC World News تەلەارناسىندا كورسەتىلە باستادى. بەينەروليكتەردى مادەنيەت جانە سپورت مينيسترلىگىنىڭ تاپسىرىسى بويىنشا BBC وكىلدەرى جانە ش.ايمانوۆ اتىنداعى «قازاقفيلم» كينوستۋدياسى بىرلەسىپ تۇسىرگەن.
بەينەروليكتەردىڭ تۇسىرىلىمدەرى ۇستىمىزدەگى جىلدىڭ قىركۇيەك ايىندا «قازاقفيلم» كينوستۋدياسىنىڭ اۋماعى مەن ەسىك, ۇشقوڭىر, تۇركىستان, قاپشاعاي قالالارىندا ءوتتى. جوبانى جۇزەگە اسىرۋعا وتاندىق جانە شەتەلدىك ماماندار تارتىلعان. بەينەبايانداردان وڭداسىن بەسىكباسوۆ, نۇرلىباي ەسىمعاليەۆ, شۇعىلا ساپارعالي, ايان وتەپبەرگەن, دينارا باقتىباەۆا, فاريزا ەسكەرمەس سياقتى وتانداستارىمىزدى كورۋگە بولادى.
– وسى جىلى كوكتەمدە ەلباسى رۋحاني جاڭعىرۋ اياسىنداعى باستى جوبا رەتىندە – «قاسيەتتى قازاقستاندى» اتاعان بولاتىن. ۇلتتىق كودىمىزدىڭ نەگىزى بولىپ تابىلاتىن, حالقىمىزدىڭ باي مۇراسى مەن مادەنيەتىن ناسيحاتتاۋ ءۇشىن, «قازاقفيلم» كينوستۋدياسى BBC World News تەلەارناسىمەن بىرلەسە وتىرىپ, «قازاقستان اڭىزدارى» اتتى جارنامالىق كامپانيانى باستاپ كەتتى. كامپانيانىڭ باستى ماقساتى – سىرتقى جانە ىشكى مادەني ءتۋريزمدى دامىتۋ. بۇل باستاما ءوز كەزەگىندە جاھاندىق باسەكەلەستىككە جۇتىلماۋدىڭ ءبىر قۇرالى بولىپ تابىلادى, دەدى ش.ايمانوۆ اتىنداعى «قازاقفيلم» كينوستۋدياسىنىڭ ۆيتسە-پرەزيدەنتى سەرىك جۇباندىقوۆ.
قىسقاسى, BBC World News تەلەارناسىنا جول تارتقان ءتۇسىرىلىم توبىندا رەجيسسەر داريا چەرنوۆا (لوندون), قويۋشى وپەراتور دەنيس الاركون-راميرەس (ماسكەۋ), قويۋشى سۋرەتشى بوپەش جانداەۆ (قازاقستان) بار.
ايناش ەسالي, «ەگەمەن قازاقستان»
الماتى