... وسىدان وتىز جىل بۇرىنعى كۇزدىڭ قارا سۋىق كۇنى ءالى ەستە. ول كەزدە اۋداندىق گازەتتە ادەبي قىزمەتكەرمىن, ويلاماعان جەردەن وتباسىمىزبەن كولىك اپاتىنا تۇستىك. ءارتۇرلى جاراقات العان جولاۋشىلاردى دەرەۋ اۋرۋحاناعا جەتكىزگەندە قابىلداۋ بولىمىندەگى كەزەكشى حيرۋرگ-دارىگەر مۇرات مۇحامەدجانوۆ ەدى. سونداي سابىرلى قالپىمەن بارىمىزگە اقىل-كەڭەسىن ايتىپ, شۇعىل جاردەم كورسەتىپ جاتتى. قولى شيپالى, ەمى داۋالى ازاماتتىڭ جىلى لەبىزى, ءاربىر جولاۋشىنىڭ دەنساۋلىعىنا العاشقى كومەكتى مۇقيات كورسەتكەنى كۇنى بۇگىنگىدەي كوز الدىمدا تۇرادى. سودان بەرى دە جىلجىپ جىلدار وتۋدە. ال ودان كەيىنگى جىلدارى وسىناۋ ەڭسەلى عيماراتتا, اۋدانداعى ورتالىق اۋرۋحانادا قانشاما ءساتتى, ءساتسىز وقيعالار بولىپ جاتتى. سونىڭ بارلىعى ادام تاعدىرىمەن, ادام دەنساۋلىعىمەن بايلانىستى. ءبىزدىڭ كەيىپكەرىمىز مۇرات اۋداندىق اۋرۋحانادا تەك ەمدەۋ ءىسىنىڭ قىرى مەن سىرىن عانا مەڭگەرىپ قويماي, دارىگەرلىك قىزمەتتى ۇيىمداستىرۋدىڭ سان الۋان جولدارىن جاس ارىپتەستەرىنە ۇيرەتۋدەن دە ەش جالىققان ەمەس. ءيا, ۇلكەنگە – ءىنى, كىشىگە – اعا بولا بىلگەن ابزال ازاماتتىڭ ومىردەرەگىنە ۇڭىلسەڭ, قانشاما سىر, قانشاما جىر جاتىر.
تاڭ بوزىنان جۇمىس ورنىنان تابىلاتىن دارىگەردى تولعاندىراتىن ماسەلە دە, ويلاندىراتىن كوكەيكەستى قاجەتتىلىك تە – ول حالىقتىڭ دەنساۋلىعى. سول تياناقتى ەڭبەكتىڭ ءناتيجەسىندە اۋدانداعى ەمدەۋ مەكەمەلەرى قازىرگى زامانعى وزىق قۇرال-جابدىقتارمەن قامتاماسىز ەتىلدى. دۇنيەجۇزىلىك دامۋ بانكىنىڭ دە ىقپالى ءتيىپ, وتكەن جىلدارى جاپوندىق ۋلترادىبىستىق زەرتتەۋ, فيبراگاستروسكوپ, رەنتگەن, ەكگ سياقتى 26 ءتۇرلى مەديتسينالىق جابدىقتارعا قول جەتكىزدى. وكپە اۋرۋىمەن اۋىراتىندار بۇگىنگى زامانعى دوتس تەراپياسى بويىنشا ەم قابىلدايدى. ءار جىلدا اۋداندىق اۋرۋحانا, ەمحانانى كۇردەلى جوندەۋدەن وتكىزىپ, انا مەن بالا دەنساۋلىعىن ۇنەمى نازاردا ۇستايدى.
– اۋدان اۋماعىندا كوپبالالى بەس مىڭنان استام انا تۇرادى, – دەيدى مۇرات مۇحامەدجانوۆ. – سابيلەردىڭ كوپتەپ دۇنيەگە كەلۋى قۋانتادى. دەموگرافيالىق كورسەتكىش جاعىنان اۋدانىمىز وبلىس بويىنشا الدىڭعى ورىندا. ەلباسىنىڭ “100 مەكتەپ, 100 اۋرۋحانا” سالۋ تاپسىرماسىنا اۋدانىمىز الدىمەن ءۇن قوسىپ, جاڭا ءتيپتى ايەلدەر بوساناتىن گينەكولوگيالىق اۋرۋحانا سالىپ, پايدالانۋعا بەردى.
“ۇستازى جاقسىنىڭ – ۇستانىمى جاقسى” دەگەن, وتكەندە لۋناچارسكي اتىنداعى مەكتەپتىڭ وبلىس بويىنشا “ۇزدىك ءبىلىم مەكەمەسى” دەگەن اتقا يە بولۋىنا بايلانىستى, مەكتەپ بىتىرۋشىلەرمەن, اۋداننىڭ ءبىر توپ ارداقتى انالارىمەن باسقوسۋى وتكەن .التىنسارين اتىنداعى مەكتەپتىڭ بايىرعى ۇستازى, قازاقستاننىڭ ەڭبەك سىڭىرگەن مۇعالىمى روزا كاربۋزوۆا اپاي ءوزىنىڭ ماقتان تۇتاتىن شاكىرتتەرىنىڭ ىشىندەگى ەڭ ءبىر شوقتىعى بيىك ازامات – وسى مۇرات مۇحامەدجانوۆ ەكەندىگىن اڭگىمەلەدى.
بۇگىندە اۋداندا باس دارىگەردىڭ ورىنباسارى بولىپ قىزمەت اتقارىپ جۇرگەن مۇرات اعا 1994 جىلى “قازاقستان رەسپۋبليكاسى اۋىل تۇرعىندارىنىڭ ەكولوگيالىق جاعدايعا بايلانىستى سوزىلمالى جۇقپالى ەمەس اۋرۋلارمەن ناۋقاستانۋ ديناميكاسى” دەگەن تاقىرىپتا كانديداتتىق ديسسەرتاتسيا قورعاعان. مەملەكەت الدىندا سىڭىرگەن ەڭبەگى, ەلىمىزدىڭ الەۋمەتتىك-ەكونوميكالىق دامۋىنا قوسقان زور ۇلەسى ءۇشىن دەنساۋلىق ساقتاۋ ءىسىنىڭ ۇزدىگى اتاعىنا يە بولسا, قۇرمەت گراموتاسىمەن, “شاپاعات”, “قازاقستان كونستيتۋتسياسىنا – 10 جىل” مەدالدەرىمەن ماراپاتتالدى. تالاي رەت اۋداندىق كەڭەسىنىڭ, اۋداندىق ءماسليحاتتىڭ دەپۋتاتى بولىپ, ەلدىك ماسەلەلەردى شەشۋگە اتسالىستى. “نۇر وتان” حدپ بەلسەندى مۇشەسى, “پانفيلوۆ اۋدانىنىڭ قۇرمەتتى ازاماتى” اتاعىن الۋىنا دا تىنىمسىز ەڭبەگى, جاسامپاز ەڭبەكقورلىعى ىقپالىن تيگىزدى.
مۇرات اعانىڭ ءالى دە حالقىنا بەرگەنىنەن بەرەرى كوپ, قانداي قۇرمەتكە دە لايىقتى ازامات. وزىنەن كەيىن ەرگەن ءىنى-قارىنداستارىنىڭ ءبارىن تاربيەلەپ, قاتارعا قوسۋى دا ەلگە ۇلگى-ونەگە. ومىرلىك جارى ۇزاق جىلدار ۇستاز بولعان تۇراحان دۇيسەنوۆا ەكەۋى ءۇش بالا تاربيەلەپ وسىرگەن ۇلگىلى وتباسى.
باققايشا مۇساعيتوۆا, الماتى وبلىسى, پانفيلوۆ اۋدانى.