كاتالونيا ۇكىمەتىنىڭ بۇرىنعى باسشىسى كارلەس پۋچدەمون بەلگيا پوليتسياسىنا ءوز ەركىمەن بەرىلدى. بۇل تۋرالى بەلگيا فەدەرالدى پروكۋراتۋراسىنىڭ تەرگەۋشىسى مالىمدەدى.
وتكەن جۇما كۇنى يسپانيا سوتى پۋچدەموندى ب ۇلىك جاسادى دەگەن ايىپپەن قاماۋعا الۋ تۋرالى وردەر بەرگەن. بۇل وردەر اۆتوماتتى تۇردە ەۋرووداق ەلدەرىنە جۇرەتىن بولادى. ءوز كەزەگىندە بەلگيا تەرگەۋشىسى دۇيسەنبى كۇنى, ياعني بۇگىن ەكستراداتسيالاۋ تۋرالى شەشىم قابىلداماق. كارلەس پۋچدەموننان بولەك وردەر بەرىلگەن وزگە ءتورت ەكس-مينيستر دە ءوز ەرىكتەرىمەن بەرىلگەن.
ولاردىڭ ءبارى بەيسەنبى كۇنى مادريدتە وتكەن سوت وتىرىسىنا قاتىسپادى. وسى وتىرىستان كەيىن كاتالونيا ۇكىمەتىنىڭ سەگىز مۇشەسى بىردەن قاماۋعا الىندى. ولارعا وڭىردە ب ۇلىك جاسادى, زاڭسىز قادامدارعا باردى جانە مەملەكەت قاراجاتىن ورىنسىز جۇمسادى دەگەن ايىپ تاعىلدى. ەگەر تاعىلعان ايىپتار دالەلدەنەتىن بولسا 30 جىلعا قاماۋعا الىنۋى مۇمكىن.
ەندى بەلگيا تاراپى 24 ساعات ىشىندە ولاردى كەپىلدىك ارقىلى بوستاندىققا جىبەرۋ نەمەسە قاماۋدا ۇستاۋ تۋرالى ناقتى ءبىر شەشىمگە كەلۋى ءتيىس. تۇتقىندا ۇستاۋ تۋرالى شەشىم قابىلداسا 60 كۇن ىشىندە كۇدىكتىلەردى يسپانياعا قايتارۋى ءتيىس. ەگەر ولار قۇقىقتىق تۇرعىدا ەشقانداي قارسىلىق كورسەتپەسە بۇل ءىس الداعى بىرنەشە كۇننىڭ ىشىندە اياقتالۋى مۇمكىن.
بۇدان بولەك, بەلگيا تاراپى ەۋروپالىق وردەردەن مىنا جاعدايدا باس تارتۋعا قۇقىلى: ەكستراديتسيا كۇدىكتىلەردىڭ ءتيىستى قۇقىعىنا شەكتەۋ كەلتىرمەيتىنىنە كۇمان كەلتىرسە, ءدىني, ناسىلدىك نەمەسە ساياسي سەبەپتەرگە قاتىستى كەمسىتۋشىلىككە ۇشىراعان جاعدايدا, وردەر سۇراتقان ەلدە ءادىل سوت جۇرگىزىلەتىنىنە كەپىلدىك بەرمەسە.
وتكەن ايدىڭ باسىندا كاتالونيادا تاۋەلسىزدىك الۋ جونىندە رەفەرەندۋم وتكەن بولاتىن. الايدا مادريد بۇل رەفەرەندۋمدى زاڭسىز دەپ تاپتى. بىراق بۇل ايماق ارادا بىرنەشە كۇن وتكەننەن كەيىن تاۋەلسىزدىك جونىندە دەكلاراتسياعا قول قويىپ, ونى رەسمي تۇردە جاريالاۋدى كەيىنگە قالدىردى. سەبەپ – مادريدپەن اراداعى كەلىسسوزدەردى ناتيجەلى اياقتاۋ.
ەشبىر مەملەكەت كاتالونيانىڭ بۇل شەشىمىن قولدامادى. ءوز كەزەگىندە يسپانيا كاتالونيانىڭ بىرجاقتى شەشىمىنە نارازىلىعىن ءبىلدىرىپ, كونستيتۋتسيانىڭ 155-بابىن قولداناتىنىن ەسكەرتتى. ياعني, ءوڭىردىڭ اۆتونوميالىعى توقتاتىلىپ, مادريد تىكەلەي بيلىك جۇرگىزەدى. ناتيجەسىندە مادريد 155 باپتى قولدانىپ, كاتالونيا بيلىگىن تاراتىپ جىبەردى.
وسىعان دەيىن كارلەس پۋچدەمون بريۋسسەلدە وتكىزگەن ءباسپاسوز-كونفەرەنتسياسىندا بەلگيا بيلىگىنەن ساياسي باسپانا سۇرامايتىنىن مالىمدەدى. ال يسپانيادان شىعىپ كەتۋىن «قاۋىپسىزدىك پەن بوستاندىق» قامى رەتىندە ءتۇسىندىردى. پۋچدەمون ءادىل سوت تالقىلاۋىنا كەپىلدىك بەرمەيىنشە ءوزى دە, قىزمەتتەرىنەن بوساتىلعان وزگە ءتورت ارىپتەسى دە يسپانياعا ورالمايتىنىن ايتتى.
ال جما كۇنى تاڭەرتەڭ كارلەس پۋچدەمون بەلگيادا بەرگەن سۇحباتىندا جەلتوقساندا مەرزىمىنەن بۇرىن وتەتىن سايلاۋعا قاتىسۋعا دايىن ەكەنىن مالىمدەدى.
ايان ءابدۋالي, «ەگەمەن قازاقستان»