«مادەنيەتىمىزدىڭ قانشالىقتى ىلگەرى باسقانىن نەمەسە كەرى كەتكەنىن كورسەتىپ وتىراتىن قاتەسىز ولشەۋىشتىڭ ءبىرى – كىتاپحانا» دەيدى مىرجاقىپ دۋلات ۇلى. جاستارىمىز بويىنداعى وتانسۇيگىشتىك, ۇلتجاندىلىق, ادەپتىلىك, توزىمدىلىك سىندى قاسيەتتەردى ارتتىرۋ جولىندا رۋحاني قۇندىلىقتاردىڭ ماڭىزى زور ەكەنى, ال رۋحاني قۇندىلىقتاردىڭ قاينار كوزى – كىتاپحانالار ەكەنى بەلگىلى. ەلىمىز رۋحاني وردالارىنىڭ قازىرگى قورى تەك وزىمىزگە تيەسىلى كەشەگى جانە بۇگىنگى تاريحىمىزعا عانا ەمەس, كۇللى ادامزاتقا ورتاق قۇندى مۇرالارعا تولى ەكەنى ءبىزدى اۋزىن ايعا بىلەگەن الپاۋىت مەملەكەتتەر الدىندا دا ەرەك ەتە تۇسەتىنى انىق.
ەلباسىمىز ن.نازارباەۆتىڭ كەڭىنەن قولداۋعا يە بولعان جالپىۇلتتىق رۋحاني جاڭعىرۋ باستاماسى ءوز ەلىمىزدە عانا ەمەس, وزگە ەلدەردە دە رۋحاني قۇندىلىقتارىمىزدى تانىتا بىلۋگە مىندەتتەمەك. وسى ورايدا, ەلباسىنىڭ «بولاشاققا باعدار - رۋحاني جاڭعىرۋ» ماقالاسىنىڭ اياسىندا قر ۇلتتىق كىتاپحاناسى ۇجىمىنىڭ قىتايدىڭ بەيجىڭ, سيان قالالارىنىڭ باستى كىتاپحانالارىندا ىسساپارلىق كەزدەسۋلەر وتكىزىپ كەلۋدەگى باستى ماقساتى – قازاق ەلىنىڭ رۋحاني قۇندىلىقتارىن كەڭىنەن ناسيحاتتاۋ, ەكى ەل اراسىنداعى ىنتىماقتاستىق قارىم-قاتىناستى نىعايتا ءتۇسۋ, مادەني مۇراسى مول تاريحىمىزدى اسپەتتەۋ, كىتاپحانا سالاسىنىڭ الەمدىك دەڭگەيدەگى بىلىكتى ماماندارىمەن تاجىريبە الماسۋ, ەلىمىزدىڭ مادەني كەلبەتىنە اينالعان قۇندى كىتاپتارىمىزدى كىتاپحانا كوكجيەگى ارقىلى الەمدىك ارەنادا كورسەتۋ, سونداي-اق, ەكى ەل كىتاپحانالارى اراسىنداعى كەلىسىمشارتقا قول قويۋ بولعان ەدى. ءىسساپار جۇكتەگەن ءۇمىت ۇدەدەن شىققانداي.
قر ۇلتتىق كىتاپحاناسى مەن قىتايدىڭ ءىرى كىتاپحانالارى باسشىلارى قول قويىسقان كەلىسىمشارتتارداعى: كىتاپحانا سالاسىن مەڭگەرىپ كەلە جاتقان وسكەلەڭ ۇرپاقتىڭ شەت ەلدە وقىپ, بىلىمدەرىن جەتىلدىرۋگە مۇمكىندىك جاساۋ; بىلىكتى مامانداردى تاربيەلەپ شىعارۋ; قازاق اقىن-جازۋشىلارىنىڭ كىتاپتارىن شەت ەلدە ناسيحاتتاۋ; سيرەك كەزدەسەتىن كىتاپتار مەن قولجازبالاردى تولىعىمەن ءوز قورىمىزعا قايتارۋ سىندى باستى مىندەتتەردىڭ تولىقتاي جۇزەگە اسۋى الداعى كۇندەردىڭ ەنشىسىندە دەگەنمەن, ناقتى شەشىمدەرىن تاۋىپ قايتقانى اقيقات.
ەلباسى ن.ءا. نازارباەۆ ءوز جولداۋىندا: ء«بىز قازاقستاننىڭ بارلىق ازاماتتارىنىڭ وتانشىلدىق سەزىمى مەن ءوز ەلىنە دەگەن سۇيىسپەنشىلىگىن دامىتۋعا ءتيىسپىز», – دەپ اتاپ وتكەنىن ەستە تۇتا وتىرىپ, ءار ازامات, ءار ۇجىم اتقارعان يگى ءىستىڭ ءوز وتانىنا, حالقىنا تيگىزەر پايداسى, ەلدىڭ رۋحاني جاڭعىرۋ جولىنا قوسقان سۇبەلى ۇلەستەردىڭ ءبىرى ەكەنى حاق.
قازاقستان رەسپۋبليكاسى ۇلتتىق كىتاپحاناسى دەلەگاتسياسىنىڭ بولاشاعى بەكەم بۇل باستاماسىن قىتايداي الىپ ەلگە «رۋحاني جاڭعىرۋىمىزدى» جان-جاقتى ناسيحاتتاي وتىرىپ, بولاشاق ۇرپاقتىڭ قاجەتتى ءبىلىم نارىمەن سۋسىنداۋ جولىندا جاسالىپ جاتقان زور مۇمكىندىكتەرگە ءوز تاراپىنان قوسقان ۇلەسى دەسەك ارتىق ايتپاعان بولارمىز. ءاردايىم بولاشاعى بەكەم باستامانىڭ باعدارلى جاسىل شامىندا جولعا شىعۋدى ءناسىپ ەتسىن دەيىك!
ايان جولداسوۆ,
قر ۇلتتىق كىتاپحاناسىنىڭ قىزمەتكەرى
الماتى