اتىراۋدا اقىن, حالىقارالىق «الاش» ادەبي سىيلىعىنىڭ يەگەرى قويشىعۇل جىلقىشيەۆتىڭ شىعارماشىلىق كەشى ءوتتى.
«قاي قازاقتان كەم ەدىم؟» دەپ اتالعان كەش ادەبي-سازدى كومپوزيتسيامەن باستالدى. اقىن ءجۇرىپ وتكەن جول, تاۋقىمەتى مەن تاڭعاجايىبى تولى عۇمىرى ارقاۋ بولعان قويىلىم كورەرمەن كوڭىلىنەن شىقتى. شاراعا قاتىسقان وبلىس اكىمى نۇرلان نوعاەۆ: «قويشىعۇل ءومىر ۇلىنىڭ حالىققا, ەلگە قىزمەت كورسەتۋدەگى ادالدىعى, ازاماتتىعى بولەك. ونى بار بىلگەنىن, جيعان-تەرگەنىن ورتاعا توگىپ تاستايتىن كەڭپەيىل ازامات رەتىندە بىلەمىن. ماحامبەت شىعارماشىلىعىن ناسيحاتتاۋعا زور ەڭبەك ءسىڭىردىڭىز. ماحامبەتتىڭ باسىنا كەلگەن قيىنشىلىعى ەمەس, اتاق-ابىرويى, حالىقتىڭ سۇيىسپەنشىلىگى, ىستىق ىقىلاسى دارىسىن سىزگە», – دەگەن لەبىزىن ايتتى.
مادەنيەت قايراتكەرى قايرات قۇلمۇحامبەت, تاريحشى جامالي ديحان, باتىس قازاقستان وبلىسىنداعى قادىر مىرزا ءالى اتىنداعى مادەني ورتالىقتىڭ باسشىسى باۋىرجان حاليوللا, «فاريزا جۇلدىزدارى» جاس اقىندار كلۋبىنىڭ جەتەكشىسى ءاليا داۋلەتباەۆا ءسوز الىپ, ەلباسىنىڭ «رۋحاني جاڭعىرۋ» باعدارلاماسى اياسىندا ۇيىمداستىرىلعان شارانىڭ ماڭىزىنا توقتالدى, كەش يەسىنىڭ اقىندىق, ازاماتتىق قاسيەتتەرى جايلى اڭگىمەلەدى.
قويشىعۇل جىلقىشيەۆ بۇگىندە قازاقستان جازۋشىلار وداعى اتىراۋ وبلىستىق بولىمشەسىن باسقارادى. ايماقتاعى قالامگەرلەر قاۋىمىنىڭ قولداۋشىسى رەتىندە مادەنيەت پەن ونەردىڭ دامۋىنا ۇلەس قوسىپ كەلە جاتقان اقىن كەشى ناعىز ولەڭنىڭ مەرەكەسى ىسپەتتى بولدى.
باقىتگۇل باباش, «ەگەمەن قازاقستان»
اتىراۋ