استانا قالاسىندا ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆتىڭ توراعالىعىمەن ءدىن سالاسىنداعى مەملەكەتتىك ساياساتتىڭ قازىرگى تاڭداعى نەگىزگى باسىمدىقتارى مەن باستى مىندەتتەرى تۋرالى جيىن ءوتتى. وعان وڭىرلىك ءدىن ىستەرى باسقارمالارى مەن ءدىن پروبلەمالارىن زەرتتەۋ ورتالىقتارىنىڭ باسشىلارى قاتىستى.
باسقوسۋدا ۆەدومستۆو باسشىسى بايانداما جاساپ, حالىق اراسىندا اقپاراتتىق-ءتۇسىندىرۋ جۇمىستارىن جۇرگىزۋدىڭ تيىمدىلىگىن ارتتىرۋ قازىرگى تاڭداعى ماڭىزدى ماسەلەلەردىڭ ءبىرى ەكەنىنە نازار اۋداردى.
«الەۋمەتتىك زەرتتەۋلەردىڭ ناتيجەلەرىنە سۇيەنسەك, ارنايى ساۋالناماعا جاۋاپ بەرۋشىلەردىڭ 30 پايىزى جەرگىلىكتى جەردە جۇرگىزىلىپ جاتقان اقپاراتتىق-ءتۇسىندىرۋ, اسىرەسە جاستار اراسىنداعى جۇمىستاردىڭ تيىمدىلىگىن جەتكىلىكسىز دەپ باعالادى. سوندىقتان مەملەكەتتىك-كونفەسسيالىق قاتىناستاردى نىعايتۋ, مەملەكەتتىڭ زايىرلى قاعيداتتارىن جىلجىتۋ جانە ءدىندى دەسترۋكتيۆتى ماقساتتا پايدالانۋعا جول بەرمەۋ ءۇشىن ورتالىق جانە وڭىرلىك اتقارۋشى ورگانداردىڭ, ازاماتتىق قوعام ينستيتۋتتارىنىڭ بىرلەسكەن كۇش-جىگەرىن شوعىرلاندىرۋ قاجەت», دەدى مينيستر.
ونىڭ پىكىرىنشە, حالىقتىڭ ماقساتتى توبى اراسىندا ءدىن سالاسىنداعى مەملەكەتتىك ساياساتتىڭ 2017-2020 جىلدارعا ارنالعان تۇجىرىمداماسىنىڭ نەگىزگى ەرەجەلەرىن جانە قولدانىستاعى زاڭنامانىڭ نورمالارىن كەڭىنەن ءتۇسىندىرۋ قاجەت.
ن.ەرمەكباەۆ جيىنعا قاتىسۋشىلارعا الدىن الۋ جانە اتاۋلى جۇمىستاردى ۇيىمداستىرۋ بارىسىندا كەلىسىلگەن جانە بىرىزدىلەندىرىلگەن تاسىلدەردى ازىرلەۋدى تاپسىردى. جاستاردىڭ ۇيىمداسپاعان توبى اراسىندا جۇمىستاردى كۇشەيتىپ, ءىس-شارالارعا ولاردىڭ قىزىعۋشىلىقتارىن ارتتىرۋ, يننوۆاتسيالىق ءادىس-تاسىلدەردى قولدانۋ قاجەت.
اسحات رايقۇل,
«ەگەمەن قازاقستان»