استاناداعى بەيبىتشىلىك جانە كەلىسىم سارايىندا ەڭبەك كۇنى جانە الەۋمەتتىك قورعاۋ جۇيەسى قىزمەتكەرلەرى كۇنىنە ارنالعان «جالپىعا ورتاق ەڭبەك قوعامى» رەسپۋبليكالىق فورۋمى ءوتتى. مەملەكەتتىك حاتشى گۇلشارا ابدىقالىقوۆا مەن ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا قاتىسقان شارادا «ەڭبەك جولى» مەن «الەۋمەتتىك قورعاۋ جۇيەسىنىڭ ۇزدىك قىزمەتكەرى» بايقاۋلارىنىڭ جەڭىمپازدارى ماراپاتتالدى.
ايتۋلى مەرەكە پرەزيدەنت ن.نازارباەۆتىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى ماقالاسىندا بەرىلگەن تاپسىرمالاردى ىسكە اسىرۋ ماقساتىندا ەلباسى جارلىعىمەن بەكىتىلگەن «ەڭبەك كۇنىنە» وراي ۇيىمداستىرىلعان بولاتىن. ال فورۋمعا پارلامەنت دەپۋتاتتارى مەن پرەزيدەنت اكىمشىلىگى, ۇكىمەت, ورتالىق جانە جەرگىلىكتى اتقارۋشى ورگاندار, حالىقارالىق ۇيىمدار, بيزنەس-قوعامداستىق پەن كاسىپوداقتار وكىلدەرى قاتىستى.
فورۋمدى اشقان گۇلشارا ابدىقالىقوۆا مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا «قازىرگى تاڭدا تەك جەكە ادام ەمەس, تۇتاس حالىق باسەكەلىك قابىلەتىن ارتتىرسا عانا تابىسقا جەتۋگە مۇمكىندىك الادى», دەپ اتاپ وتكەنىن ايتتى.
«نەگىزىنەن, بۇل مەرەكە وتانىمىزدىڭ ءوسىپ-وركەندەۋىن قامتاماسىز ەتەتىن حالىقتىڭ ەڭبەگىنە دەگەن قۇرمەتتىڭ ءبىر بەلگىسى. وعان قوسا, بۇل كۇن الەۋمەتتىك-ەكونوميكالىق جەتىستىكتەردى دارىپتەۋگە ارنالعان. ەلىمىزدىڭ ءاربىر ازاماتى ادال, رياسىز, ناتيجەلى ەڭبەكتىڭ ماڭىزدىلىعىن ساناسىنا ءسىڭىرۋى ءتيىس. سوندا عانا قازاقستان الەمدەگى دامىعان وتىز ەلدىڭ قاتارىنا قوسىلادى. ويتكەنى كەلەشەكتە ۇلتتىڭ تابىستىلىعى ادامي كاپيتالدىڭ ساپاسىمەن ولشەنەتىن بولادى», دەدى ول.
سونىمەن قاتار مەملەكەتتىك حاتشى جالپىعا ورتاق ەڭبەك قوعامى يدەياسىنىڭ ماقساتتارىنا جەتكىزەتىن بىرقاتار مەملەكەتتىك جانە سالالىق باعدارلامانىڭ ورىندالۋ ناتيجەلەرىنە دە توقتالدى.
«وسى كۇندەرى مەملەكەت, جەكەمەنشىك سەكتور جانە كاسىبي بىرلەستىكتەر ىنتىماقتاستىعىنىڭ تەتىكتەرىنە نەگىزدەلگەن الەۋمەتتىك-ەڭبەك قاتىناستارىنىڭ جاڭا مودەلى قولدانىسقا ەنگىزىلدى. مەملەكەتتىك جانە ۇكىمەتتىك باعدارلامالار اياسىندا بيىل 290 مىڭ جۇمىس ورنى اشىلدى. 500-گە جۋىق كاسىبي ستاندارتتار ازىرلەندى», دەدى گۇلشارا ابدىقالىقوۆا.
مەملەكەتتىك حاتشى ءىرى جانە ورتا كاسىپورىنداردىڭ شامامەن 90 پايىزىندا, سونداي-اق شاعىن كاسىپورىنداردىڭ 30 پايىزدان استامىندا الەۋمەتتىك-ەڭبەك قاتىناستارىن رەتتەيتىن ۇجىمدىق شارتتار بار ەكەنىن تىلگە تيەك ەتىپ, ەلىمىزدە جاڭا جوبا – تەگىن كاسىپتىك ءبىلىم بەرۋ ءىسى قولعا الىنعانىن اتاپ ءوتتى. وسىلايشا, جاستار ءۇشىن ءوزىنىڭ ەڭبەكتەگى العاشقى ماماندىعىن مەملەكەت ەسەبىنەن يگەرۋ مۇمكىندىگى پايدا بولعاندىعىن العا تارتتى.
سودان كەيىن ءسوز العان ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا بۇل كۇن ەل ەكونوميكاسىنىڭ ءتۇرلى سالالارىندا قىزمەت ەتىپ كەلە جاتقان 8,5 ميلليوننان استام ازاماتتاردىڭ ايتۋلى مەرەكەسى ەكەنىن ايتتى.
«ەلباسى ءوزىنىڭ «جالپىعا ورتاق ەڭبەك قوعامىنا قاراي 20 قادام» اتتى باعدارلامالىق ماقالاسىندا الەمدىك وركەنيەتتىڭ بارلىق قۇندىلىقتارى, بارلىق ەكونوميكالىق جانە مادەني بايلىقتار ۆيرتۋالدى قارجى ينستيتۋتتارىنىڭ ەمەس, ادامنىڭ ەڭبەگىمەن جاسالادى دەپ ايتقان بولاتىن. راسىندا دا ەگەمەندىگىمىزدى العاننان كەيىنگى شيرەك عاسىرعا كوز جۇگىرتەتىن بولساق, وسى ۋاقىتتىڭ ىشىندە ەلىمىزدە 7,5 مىڭ شاقىرىم جول سالىندى. 113 ملن شارشى مەتردەن استام تۇرعىن ءۇي قولدانىسقا بەرىلسە, 3 مىڭعا جۋىق مەكتەپ پەن دەنساۋلىق ساقتاۋ سىندى الەۋمەتتىك نىساندار بوي كوتەردى. ال وندىرىلگەن جالپى ءونىمنىڭ كولەمى 1993 جىلعى 29,4 ملرد تەڭگەدەن, وتكەن جىلعى قورىتىندى بويىنشا 47 تريلليون تەڭگەگە جەتكەن. وسىنداي كورسەتكىشتەرگە يە قازاقستاندى الەمدىك قوعامداستىق نارىقتىق ەكونوميكاداعى مەملەكەت رەتىندە مويىنداپ وتىر», دەدى ت.دۇيسەنوۆا.
ايتا كەتەيىك, فورۋم اياسىندا «ەڭبەك جولى» اتتى رەسپۋبليكالىق كونكۋرستىڭ جەڭىمپازدارىن ماراپاتتاۋ ءراسىمى ءوتتى. وعان 329 ادام قاتىسقان بولاتىن. ناتيجەسىندە, «ۇزدىك ەڭبەككەرلەر اۋلەتى» اتالىمى بويىنشا اقتوبە وبلىسىنان تەمىرجولشى جۇبانىشەۆتار وتباسى; «جۇمىس ىستەيتىن جاستاردىڭ ۇزدىك تالىمگەرى» نوميناتسياسى بويىنشا باتىس قازاقستان وبلىسىنان ەنەرگيا كاسىپورنى وندىرىستىك-تەحنيكالىق قىزمەت ءبولىمىنىڭ باستىعى تىلەك حارين; «ۇزدىك جاس قىزمەتكەر» نوميناتسياسى بويىنشا وڭتۇستىك قازاقستان وبلىسىنان مۇعالىم نۇرسۇلتان ابباسوۆ; «جاس ۇرپاقتى ەڭبەككە باۋلۋداعى ۇلەسى ءۇشىن» نوميناتسياسى بويىنشا وڭتۇستىك قازاقستان وبلىسىنان بالاباقشا مەڭگەرۋشىسى نۇرجامال تولەۋوۆا جەڭىمپاز اتاندى. سونىمەن قاتار قازاقستاننىڭ قالىپتاسۋى مەن دامۋىنا ۇلەس قوسقان ەل ەكونوميكاسىنىڭ ءتۇرلى سالاسىنىڭ ارداگەرلەرى «ەڭبەك ارداگەرى» مەدالىمەن ماراپاتتالدى.
فورۋم سوڭىندا قازاقستاندىق تانىمال ەسترادا ارتىستەرىنىڭ قاتىسۋىمەن كونتسەرت ءوتتى.
نۇرلىبەك دوسىباي,
«ەگەمەن قازاقستان»