بۇگىن الماتى قالاسىندا تۇركى اكادەمياسى حالىقارالىق ۇيىمى (TWESCO) عىلىمي جوبالارى نەگىزىندە ازىرلەپ باسقان بىرقاتار كىتاپتاردىڭ تانىستىرىلىمىن وتكىزدى.
اتاپ ايتقاندا, كورنەكتى عالىم ءابدۋالي قايداردىڭ «ۇيعىر ءتىلى لەكسيكاسىنىڭ دامۋى» جانە «قازىرگى ۇيعىر ادەبي ءتىلىنىڭ دامۋى», ايگىلى تۇركىتانۋشى ءامىر ءناجىپتىڭ ء«حىV عاسىر تۇركى تىلدەرىنىڭ تاريحي-سالىستىرمالى سوزدىگى. قۇتىپتىڭ قۇسراۋ-شىرىن ەڭبەگى نەگىزىندە» اتتى 4 تومدىعى جانە دە «جويىلۋ قاۋپىندەگى تۇركى تىلدەرى» اتتى 4 تومدىق عىلىمي باسىلىم قالىڭ وقىرمان نازارىنا ۇسىنىلدى.
اكادەميك ءا.قايداردىڭ ەڭبەكتەرىندە ۇيعىر ادەبي ءتىلىنىڭ دامۋ زاڭدىلىقتارى زەرتتەلەدى. ۇيعىر ءتىلىنىڭ ديالەكتولوگياسى, زاماناۋي ۇيعىر ءتىلىنىڭ قالىپتاسۋ كەزەڭدەرى مەن لەكسيكا-گرامماتيكالىق دامۋ ەرەكشەلىركتەرى سەكىلدى ماسەلەلەر جان-جاقتى قاراستىرىلادى.
وسى ورايدا الەمدىك تۇركولوگيا عىلىمى ءۇشىن قۇندى سانالاتىن ءامىر ءناجىپ سوزدىگىنىڭ تولىق نۇسقادا تۇڭعىش رەت جاريالانىپ وتىرعانىن ايتا كەتكەن ءجون. وكىنىشكە قاراي, عالىمنىڭ كوزى تىرىسىندە اتالعان ەڭبەكتىڭ ءبىرىنشى تومى عانا 1979 جىلى ماسكەۋدە جارىققا شىعىپ, قالعان تومدارى باسىلماي, توقتاپ قالادى. تۇركى اكادەمياسى سول عىلىمي مۇرانى ءا.ءناجىپتىڭ شاكىرتى ءا.قايدارعا اماناتتاعان قولجازباسى نەگىزىندە العاش رەت جاريالاپ وتىر.
وقىرمانعا تانىستىرىلعان كەلەسى باسىلىم - 36 ەلدەن 300-دەن اسا عالىمنىڭ قاتىسۋىمەن جۇزەگە اسقان «جويىلۋ قاۋپىندەگى تۇركى تىلدەرى» اتتى 4 تومدىق عىلىمي ەڭبەك. اكادەميا عىلىمي ورتادا جوعارى باعالانعان اتالعان كوپتومدىقتىڭ تانىستىرىلىمىن بۇعان دەيىن انكارا مەن استانا قالالارىندا وتكىزگەن بولاتىن.
عىلىم ورداسىندا وتكەن شاراعا بەلگىلى قوعام جانە مادەنيەت قايراتكەرلەرى, كورنەكتى عالىمدار مەن زيالى قاۋىم وكىلدەرى قاتىستى.
ايتا كەتەيىك, باسىلىمداردىڭ تانىستىرىلىمى اكادەميا ۇيىمداستىرعان «رۋحاني جاڭعىرۋ: تۇلعالار تاعىلىمى» اتتى دوڭگەلەك ۇستەل اياسىندا ءوتتى.