پارلامەنت سەناتىنىڭ توراعاسى قاسىم-جومارت توقاەۆ «بولاشاقتاعى ءبىلىم بەرۋگە ارنالعان قۇندىلىقتار, يگىلىكتەر جانە يننوۆاتسيالار» حالىقارالىق عىلىمي-تاجىريبەلىك كونفەرەنتسياعا قاتىسۋ ءۇشىن قازاقستانعا كەلگەن ءبىلىم بەرۋ سالاسىنداعى بەلگىلى فين زەرتتەۋشىسى ءارى ساراپشىسى پاسي سالبەرگتى قابىلدادى, دەپ حابارلادى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى.
جۇزدەسۋشىلەر ءبىلىم بەرۋ جانە عىلىمنىڭ باسەكەگە قابىلەتتىلىگىن ارتتىرۋ, ادام كاپيتالىن دامىتۋ ماسەلەلەرىن تالقىلادى.
جوعارعى پالاتانىڭ باسشىسى سەناتتا وتكەن ورتا ءبىلىم بەرۋ جۇيەسىن زاڭنامالىق تۇرعىدا رەتتەۋدىڭ وزەكتى ماسەلەلەرى مەن كەلەشەگىنە ارنالعان پارلامەنتتىك تىڭداۋ تۋرالى حاباردار ەتتى.
ق.توقاەۆ عىلىمي جەتىستىكتەرگە, وقىتۋدىڭ يننوۆاتسيالىق ادىستەرىنە جانە مۇعالىمدەردىڭ جوعارى بىلىكتىلىگىنە نەگىزدەلگەن ءفيننىڭ ءبىلىم بەرۋ جۇيەسىنىڭ تيىمدىلىگىن اتاپ ءوتتى. توراعانىڭ ايتۋىنشا, قازاقستان الەمدىك ءبىلىم بەرۋ كەڭىستىگىندە كەڭىنەن تانىلعان فين تاجىريبەسىن زەرتتەۋگە جانە پايدالانۋعا مۇددەلى. قازاقستاندى كەلەشەككە باستايتىن اسا زەردەلى بالالاردى وقىتۋعا جاقسى جاعداي جاسالعان زياتكەرلىك مەكتەپتەرىنىڭ قىزمەتى وسى ماقساتقا قول جەتكىزۋگە ارنالعان. سونىمەن بىرگە, بۇكىل ەلىمىزدە باستاۋىش جانە ورتا ءبىلىم بەرۋدىڭ بىرىڭعاي ستاندارتتارىن جاساۋ مىندەتى قويىلدى. مۇعالىمدەردىڭ ەڭبەكاقىسىن كوتەرۋ ماسەلەسى ماڭىزدى بولىپ قالىپ وتىر.
پ.سالبەرگ ق.توقاەۆتىڭ پىكىرىمەن كەلىسە وتىرىپ, ونى ساپالى ءبىلىم بەرۋ ورتاسىن جاساۋ باعدارلاماسىمەن تانىستىردى. ءبىلىم بەرۋ جۇيەسىندەگى بىرىڭعاي ستاندارتتار, وقۋشىلاردىڭ ءال-اۋقاتى جانە ولاردىڭ ءبىلىم الۋ ىسىنە بەلسەندى قاتىسۋى وسى باعدارلامانى ازىرلەۋدىڭ نەگىزگى ۇستانىمدارى بولىپ بەلگىلەنگەن.