كەشە استانا قالاسىندا «قازاقستانداعى گەندەرلىك بيۋدجەتتەندىرۋ» جوباسىنىڭ قورىتىندىلارى بويىنشا دوڭگەلەك ۇستەل ءوتتى.
ءىس-شاراعا ءماجىلىس دەپۋتاتى سەرىك سەيدۋمانوۆ, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەلەرى, بۇۇ دامۋ باعدارلاماسىنىڭ وكىلدەرى قاتىستى.
القالى جيىندا ءسوز العان ءماجىلىس دەپۋتاتى سەرىك سەيدۋمانوۆ ەڭ الدىمەن گەندەر سوزىنە تەرەڭىرەك ءمان بەرۋ كەرەكتىگىن العا تارتتى. ول گەندەر ءسوزى ايەل زاتىنا عانا قاتىستى ەمەس ەكەنىن, وندا وتباسى ماسەلەسى دە قارالاتىنىن ايتتى. سونىمەن قاتار قوعامدا كەڭىنەن ناسيحاتتالماعاندىقتان گەندەرلىك بيۋدجەتتەندىرۋ ۇعىمىن كوپشىلىك تۇسىنە بەرمەيتىنىن, الداعى ۋاقىتتا وسىنداي ءىس-شارالار ءجيى ۇيىمداستىرىلىپ تۇرۋى قاجەتتىگىن ءسوز ەتتى. بۇدان بولەك سەرىك سەيدۋمانوۆ اتالعان قاعيداعا قاتىستى قۇجاتتاردىڭ ءبارى مەملەكەتتىك ورگاندارعا قولجەتىمدى بولۋىن قاراستىرۋدى ۇسىندى.
بۇگىندە الەمنىڭ 100 ەلىندە گەندەرلىك بيۋدجەتتەندىرۋ ماسەلەسىنە قاتىستى ءتۇرلى باستامالار قولداۋ تاۋىپ كەلەدى. ال كانادا, اۆستراليا, شۆەتسيا, فرانتسيا, نورۆەگيا, يسپانيا سەكىلدى مەملەكەتتەردە نەگىزگى مىندەتتەردىڭ بىرىنە اينالىپ وتىر.
– بۇل جاڭادان كوتەرىلىپ وتىرعان ماسەلە. ءوزىمنىڭ ويىمشا بۇل ەلىمىزدە كەرەك قاعيدا. ءبىز وعان دايىنبىز. وسى باستامانىڭ ارقاسىندا قارجىنىڭ قاي جاققا قانداي كولەمدە ءبولىنىپ جاتقانىن ءبىلىپ وتىرۋعا بولادى. ەندى وسى تۇستا ءبىر ماسەلەنى الىپ قارايىق, قازىر مەكتەپ مۇعالىمدەرىنىڭ باسىم بولىگى ايەل ادامدار ەكەنى جاسىرىن ەمەس. ال ەر-ازاماتتاردىڭ بۇل سالادا ازايىپ كەتۋىنە جالاقى ماسەلەسى سەبەپ بولىپ وتىر. بولاشاق جاستاردىڭ قولىندا. ال وقۋشىلارعا جوعارى دەڭگەيدە ءبىلىم بەرۋ ءۇشىن ەر ادامداردىڭ ورنى زور, – دەدى سولتۇستىك قازاقستان وبلىستىق ءماسليحاتىنىڭ دەپۋتاتى باقىتجان ساميەۆا.
ال قازاقستانداعى «بۇۇ-ايەلدەر» باعدارلاماسىنىڭ مامانى گۇلنار سمايىلوۆا گەندەرلىك بيۋدجەتتەندىرۋگە قىسقاشا تۇسىنىك بەرىپ ءوتتى. ونىڭ ايتۋىنشا, ول ەر مەن ايەل ادامنىڭ, قىز بەن ۇل بالالاردىڭ مۇددەلەرىن, ولاردىڭ قاجەتتىلىكتەرىن بىرىزدىلىكپەن ءارى ادىلەتتى تۇردە ەسەپكە الاتىن بيۋدجەت بولىپ ەسەپتەلەدى.
قازاقستان رەسپۋبليكاسىنىڭ بيۋدجەتىندە گەندەرلىك ماقساتتاعى ءىس-شارالارعا قاراجاتتىڭ قاراستىرىلاتىنىن ايتا كەتكەن ءجون. سونداي-اق گەندەرلىك بيۋدجەتتەندىرۋدى ەنگىزۋ ءىسى تاياۋدا قابىلدانعان «قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىنىڭ» نەگىزگى مىندەتتەرىنىڭ بىرىنە اينالدى.
ايان ءابدۋالي, «ەگەمەن قازاقستان»