ۇلت جوسپارى ورىندالۋىمەن قۇندى

ۇستىمىزدەگى جىلعى ەسەبىندە ءبىلىم جانە عىلىم ءمينيسترى ەرلان ساعاديەۆ 64-ءشى قادامدى ورىنداۋ ءۇشىن عىلىم مەن عىلىمي-تەحنيكالىق ءىس-ارەكەتتى كوممەرتسيالاندىرۋ تۋرالى زاڭ قابىلدانعانىن ايتىپ, ونىڭ بۇگىنگى كۇنى جەمىس بەرە باستاعانىن جەتكىزدى. بۇل زاڭ بويىنشا عىلىمي گرانتتار مەن باعدارلامالار ەندى مەملەكەتتىڭ يندۋستريالىق-ين­نو­ۆاتسيالىق دامۋ جونىندەگى سۇرانىستارىن قاناعاتتاندىرۋعا باعىتتالعان. 

ء«بىزدىڭ عىلىمىمىزدىڭ بۇگىنگى پروب­لەماسى – عالىمدارىمىزدىڭ ەڭبەگىنىڭ قول­دانبالى سيپاتى تومەن جانە كوممەرتسيالانۋى جارىتىمسىز بولىپ كەل­گەندىگى ەدى. ەندى جاڭا زاڭ بويىنشا عالىم­دارىمىز ءبىر جوبا ۇسىنعاندا ونى قوسىمشا قارجىلاندىراتىن كومپانيا, كاسىپورىن, بيزنەس نەمەسە ۋنيۆەرسيتەت بولۋىن تالاپ ەتەمىز. ءسويتىپ ءبىز بۇل جو­با­نىڭ بىرەۋگە قاجەتتىلىگىن بىلەتىن بولامىز. وسى باعىتتا جۇرگىزىلگەن جۇمىستارىمىز ناتيجەسىن بەرە باس­تادى, ونى عىلىمي ورتا مەن بيزنەس قول­دادى», دەدى مينيستر ءوزىنىڭ سوزىندە. ونىڭ ايتۋىنا قاراعاندا, بۇگىنگە دەيىن ۇسىنىلعان 70 گرانتتى جوبانىڭ 67-ءسى قوسىمشا قارجىلاندىرۋ كوزدەرىن تاپقان. سونىمەن قاتار مينيستر بۇگىنگى تاڭدا 525 جاڭا جۇمىس ورنىن اشاتىن 13,7 ملرد تەڭگەنىڭ 75 گرانتتىق جوباسى ىسكە اسىرىلۋدا ەكەنىن ايتتى. بۇكىلالەمدىك بانكتىڭ قۇنى 110 ملن اقش دوللارىن قۇراپ, تەحنولوگيانى كوممەرتسيا­لاندىرۋدى كوزدەيتىن «ونىكتى يننوۆا­تسيالاردى ىنتالاندىرۋ» جوباسى دا قولعا الىنعان. وسى قادامدى ىسكە اسىرۋ با­رىسىندا 2020 جىلدىڭ قارساڭىندا بار­لىق عىلىمي جوبالاردىڭ بيزنەس تاراپى­نان قوسىمشا قارجىلاندىرىلۋى 15 پا­يىزعا جەتپەك. 

ەكونوميكالىق ىنتىماقتاستىق جانە دامۋ ۇيىمىنا (ەىدۇ) مۇشە ەلدەر ستاندارتتارىنا سايكەس ادام كاپيتالىنىڭ ساپاسىن ارتتىرۋدى قامتىعان 76-شى قا­دام­دى دا اتالعان مينيسترلىك ىسكە اسى­رۋدا. 2017 جىلى قازاقستان وسى ۇيىم­نىڭ ءبىلىم بەرۋ ساياساتى جونىندەگى كوميتە­تىنىڭ تولىققاندى مۇشەسى بولدى. ۇيىم­نىڭ تالابىنا سايكەس 2020 جىلعا دەيىن­گى مەرزىمدە بارلىق مەكتەپتەرگە «0+11 سىنىپ» قاعيداتىمەن 12 جىلدىق ءبىلىم بەرۋ ەنگىزىلەدى. 2018-2019 جىلدارى 3-11 سىنىپتارعا جاڭا وقۋ باعدارلاماسى ازىرلەنەدى. 

ال «بىرتەكتىلىك پەن بىرلىك» دەپ اتالعان رەفورمانى ىسكە اسىرۋعا التى قادام ارنالعان. بۇل رەفورمادا قازاقستان حالقى اسسامبلەياسىنا جاۋاپتى جۇمىستار جۇكتەلگەن. وسى ۇيىمنىڭ قولداۋىمەن قازىر قازاقستاندىق بىرتەكتىلىكتى نىعايتۋ جۇمىستارى جۇرگىزىلۋدە. جالپى ايتقاندا, وسى رەفورما, ەڭ الدىمەن, جاڭا قوعامدىق قاتىناستار, قوعامنىڭ جانە مەملەكەتتىڭ جاڭا فۋنكتسيالارى مەن جاڭا ينستيتۋتتارىن قالىپتاستىرۋدى كوزدەيدى. ول جارلىقتارمەن بەكىتىلگەن «قازاقستاندىق بىرتەكتىلىك پەن بىرلىكتى نىعايتۋ جانە دامىتۋ», «قازاقستان حالقى اسسامبلەياسىن 2025 جىلعا دەيىن دامىتۋ» جانە «مادەني ساياسات» تۇجىرىمدامالارىنىڭ نەگىزىندە ىسكە اسىرىلۋدا. قازىر اسسامبلەيا ازا­مات­تىق ۇكىمەتتىڭ جاڭا قوعامدىق قىزمەتى رەتىندە جۇمىس ىستەي باستادى.  

قازاقستاندىقتاردىڭ بىرتەكتىلىگىن نى­عايتۋ جانە ازاماتتىق قوعامنىڭ بۇتىندىگىن قالىپتاستىرۋ ءۇشىن قازاقستان حالقى اسسامبلەياسى «ۇلكەن ەل – ۇلكەن وتباسى» مەگاجوباسىن دا ازىرلەپ, ىسكە اسىرۋدا. ول قازاقستان رەسپۋبليكاسىنىڭ تۋريستىك سالاسىن دامىتۋدىڭ 2020 جىلعا دەيىنگى تۇجىرىمداماسىن جانە «استانا – ەۋرازيا جۇرەگى», «الماتى – قازاقستاننىڭ ەركىن مادەني ايماعى», «تابيعات بىرلىگى جانە كوش­پەلى مادەنيەتتەر», «التاي ىنجۋلەرى», « ۇلى جىبەك جولىن قايتا جاڭعىرتۋ», «كاس­پي قاقپاسى» وڭىرلىك مادەني-تۋريس­تىك كلاستەرلەرىن قۇرۋدى جۇزەگە اسىرۋمەن باي­لانىستىرىلادى. سوڭعى رەفورما «ەسەپ بەرەتىن مەملە­كەتتى قالىپتاستىرۋ» دەپ اتالىپ, ونى ىسكە اسىراتىن 10 قادام «اشىق ۇكىمەتتىڭ» مولدىرلىگىن, مەملەكەتتىك ورگانداردىڭ ەسەپ بەرۋشىلىگىن, قوعامدىق باقىلاۋدى كۇشەيتۋ جانە ازاماتتىق ارالاسۋلاردىڭ كەڭەيۋىنە قول جەتكىزۋدى جانە جەتىلدىرۋدى قامتيدى. وسى رەفورمانى ىسكە اسىرۋ بارىسىندا قازىر ەلىمىزدە مەملەكەتتىك قىزمەت كورسەتىلۋلەردىڭ ساپاسى جاقسارىپ, مەرزىمى قىسقارىپ, سونداي-اق بارلىق پروتسەستەردىڭ اشىقتىعى ارتىپ كەلەدى. «اشىق ۇكىمەتتىڭ» «اشىق دەرەكتەر», «اشىق بيۋدجەتتەر» جانە «اشىق ديالوگ» سياقتى ءتورت كومپونەنتى ىسكە قوسىلدى. 

ۇلت جوسپارى وسىلاي, بارلىق سالالار بويىنشا ۇتىمدىلىقپەن ىسكە اسىرىلىپ, ءتيىمدى ناتيجەلەرگە قول جەتكىزىپ كەلەدى. 

جاقسىباي سامرات, «ەگەمەن قازاقستان»