سونىمەن سەمەي پوليگونىنان زارداپ شەككەن تۇرعىندار ءۇشىن پايدالانۋعا بەرىلەدى دەگەن يادرولىق مەديتسينا ورتالىق ماسەلەسى ءالى كۇنگە دەيىن ناقتى شەشىلمەي جاتىر.
وبلىس اكىمى دانيال احمەتوۆتىڭ سەمەيگە كەلگەن ساپارىندا بۇل ماسەلە تاعى دا كوتەرىلدى. مۇنداعى رادياتسيالىق سۇيىقتىقتى ساقتايتىن, ەلدىڭ بارلىعىن شۋلاتىپ وتىرعان جابدىق-قوراپ شىمكەنتتىڭ ءبىر كاسىپورنىندا جاسالعان ەكەن. ال جوبا بويىنشا مەردىگەرلەر بۇل قۇرال-جابدىقتى گەرمانيادان اكەلەمىز دەپ ۇيعارسا كەرەك. حالىق ءۇشىن اسا ماڭىزدى نىساننىڭ ءالى كۇنگە دەيىن پايدالانۋعا بەرىلمەي وتىرعاندىعىن وبلىس اكىمى تاعى ءبىر مارتە ءتۇسىندىردى.
– سوت ءىسى قاراعان سايىن جاڭادان فاكتىلەر انىقتالۋ ۇستىندە, − دەدى وبلىس اكىمى دانيال احمەتوۆ, − ماسەلەن, شىمكەنتتە دايىندالعان ساپاسىز جابدىق ىسكە جارامسىز. ءاۋ باستا مۇنى گەرمانيادان اكەلەدى دەپ سەندىرگەن. ارينە, مەن تۇسىنەمىن, حالىق شارشادى. وسىمەن ون رەت كوميسسيا قارادى. بىراق تاعى ءبىر ناقتى كوميسسيا قۇرۋ كەرەك دەپ ويلايمىن. مەنىڭ تاپسىرمام بويىنشا, وسى كۇردەلى پروبلەمانى شەشۋدىڭ بىرنەشە جولى قاراستىرىلىپ وتىر. رادياتسيالىق قالدىقتاردى جيناپ, ساقتايتىن جابدىقتى اۋىستىرۋ كەرەك. ويتكەنى ساپاسىز, سوندىقتان سەنىمسىز جابدىق. مۇنىڭ قاۋىپسىزدىگى راديولوگيالىق ورتالىقتا ىستەيتىن مەديتسينا قىزمەتكەرلەرى مەن ناۋقاستاردىڭ دەنساۋلىعى ءۇشىن اسا ماڭىزدى.
دانيال احمەتوۆتىڭ ايتۋىنشا, وسى جابدىقتى قويعان مەردىگەر كومپانيانىڭ بۇل قىزمەت تۇرىنە ءاۋ باستا ەشبىر زاڭدى قۇقىعى بولماعاندىعى انىقتالعاندىعى جونىندە سوت شەشىمى ءوز كۇشىنە ەنىپتى.
– مەردىگەرلەر مۇندا ويىنا كەلگەن دۇنيەسىن جاساعان. ولاردى ەشكىم قاداعالاماعان. ءتىپتى باس مەردىگەردىڭ دە, جابدىقتى ورناتقان قوسالقى مەردىگەردىڭ دە جۇمىسىن ەشكىم قاراماعان. ليتسەنزيالارى بار ما, جوق پا, ونى تەكسەرگەن ەشكىم جوق. اقىرى مىنە, قالاي تەكسەرەسە دە, ماسەلە قايتا-قايتا باسىنا كەلىپ تىرەلەدى. ايتسە دە, ءبىز بۇل نىساندى پايدالانۋعا بەرەمىز. ادامدار وسىندا ەمدەلەتىن بولادى, – دەدى دانيال احمەتوۆ.
راۋشان نۇعمانبەك, جۋرناليست
سەمەي