«قازحروم» تۇك» اق فيليالى – اقسۋ فەرروقورىتپا زاۋىتىنىڭ وندىرىستەگى جاڭعىرتۋ جۇمىستارى ەۋرازيالىق توپتىڭ «ۇقىپتى ءوندىرىس» باعدارلاماسى اياسىندا جۇرگىزىلۋدە. مەتاللۋرگتەردىڭ وندىرىستىك جەتىستىكتەرى الداعى قاڭتار ايىندا اتالىپ وتەتىن كاسىپورىننىڭ 50 جىلدىق مەرەيتويىنا ارنالادى.
(ERG) ەۋرازيالىق توپتىڭ قۇرامىنا كىرەتىن «قازحروم» ترانسۇلتتىق كومپانياسى» اق فيليالى – «اقسۋ فەرروقورىتپا زاۋىت» الىپ كاسىپورىندار قاتارىندا. ءوندىرىس ورنىندا 7 مىڭداي ادام ەڭبەك ەتەدى. جىلىنا 1,2 ميلليون توننا فەرروقورىتپا وندىرەتىن زاۋىت ءبىزدىڭ ەلىمىزدە عانا ەمەس, الەمدىك مەتاللۋرگيا نارىعىنداعى ءىرى كاسىپورىنداردىڭ ءبىرى سانالادى.
جۋىردا زاۋىتتىڭ №4 بالقىتۋ تسەحىندا كۇردەلى جوندەۋدەن وتكەن №47 پەش پايدالانۋعا بەرىلدى. الىپ ەلەكتر پەشىنىڭ كۇردەلى جوندەۋى زاۋىتتىڭ ينۆەستيتسيالىق باعدارلاماسى اياسىندا جۇزەگە استى. زاۋىت ديرەكتورى سەرگەي پروكوپەۆتىڭ ايتۋىنشا, ەسكى پەشتى جوندەۋ جۇمىسى قىركۇيەك ايىندا باستالىپتى. پەشتە جوعارى كومىرتەكتى فەرروحروم وندىرىلەدى. مەحانيكالىق, گيدراۆليكالىق جانە ەنەرگەتيكالىق تەحنيكالىق قاجەتتىلىكتەرى اۆتوماتتاندىرۋ جۇيەسىنە اۋىستىرىلىپ, مەتاللۋرگيا سالاسىنداعى وزىق قۇرال-جابدىقتار ورناتىلدى. قاۋىپسىز ءارى ەكولوگيالىق جاعىنان تازا. زاماناۋي تەحنولوگيا, جاڭا پەشتىڭ قوسىلۋى زاۋىتتىق ونىمدىلىگىن, ارتتىرادى. پەشتىڭ جىلدىق ونىمدىلىگى – 27 مىڭ توننا جوعارى كومىرتەكتى فەرروحروم. زامان تالاپتارىنا ساي جابدىقتاۋعا, جاڭارتۋعا سالىنعان ينۆەستيتسيا كولەمى – 1,4 ملرد تەڭگە.
– قازىرگى كۇنى جۇرگىزىلىپ جاتقان نەگىزگى جانە قوسالقى جاڭعىرتۋ جۇمىستارى-كاسىپورىننىڭ تۇراقتى دامۋىنىڭ باستى فاكتورى. زاۋىتتىڭ بارلىق وندىرىستىك نىساندارى ەڭبەكتى قورعاۋ, قاۋىپسىزدىك پەن قورشاعان ورتانى قورعاۋ سالاسىندا زاماناۋي تالاپتاردى ەسەپكە الا وتىرا جوبالانىپ, جەتىلدىرىلىپ وتىرادى. ءبىزدىڭ كومپانيادا الەم نارىعىنا شىعۋعا مۇمكىندىك بەرەتىن فەرروقورىتپا ءوندىرۋدىڭ تاجىريبەسى قولعا الىنۋدا. ءاربىر كۇردەلى جوندەۋ – جاڭا پەش ىسكە قوسىلدى دەگەن ءسوز,– دەيدى زاۋىت ديرەكتورى سەرگەي پروكوپەۆ.
جوندەۋدەن وتكەن پەشتەردىڭ ىسكە قوسىلۋى – ونىمدىلىكتى ارتتىرۋعا, جۇمىس ساپاسىن جاقسارتۋعا, جۇمىس ورىندارىنىڭ اشىلۋىنا ۇلەس قوسادى. قاي وندىرىستە بولسىن بۇل اسا ماڭىزدى. اۆتوماتتاندىرۋ, ەلەكترودتاردىڭ قۋاتتىن ءتيىمدى پايدالانۋ جانە ولاردىڭ توك رەجىمىن تۇراقتاندىرۋ ارقىلى ەنەرگيا ۇنەمدەيدى. بالقىتۋشىلاردىڭ ەڭبەك قاۋىپسىزدىگىن دە قامتاماسىز ەتەدى.
– زاۋىتتىڭ ءوز ماماندارى جاساعان پەشتەردىڭ كۇردەلى جوندەۋ جۇمىستارى-ءبىزدىڭ ەلىمىزدە الەمدىك دەڭگەيدە فەرروقورىتپا ءوندىرىسىن ءوندىرۋدى جۇزەگە اسىرۋدىڭ تاعى ءبىر كورىنىسى. بارلىق قۇرىلىس-مونتاج جۇمىستارىن زاۋىت ماماندارى جاسادى. بۇل ءبىز ءۇشىن ماقتانىش. كاسىپورىننىڭ «ۇقىپتى ءوندىرىس» باعدارلاماسىنىڭ جۇزەگە اسىرىلۋىنا ۇلەس قوسقان مەتاللۋرگتەرگە ريزاشىلىعىمدى بىلدىرگىم كەلەدى, – دەيدى زاۋىت ديرەكتورى سەرگەي پروكوپەۆ.
فاريدا بىقاي, «ەگەمەن قازاقستان»
پاۆلودار وبلىسى, اقسۋ قالاسى
سۋرەتتەردى تۇسىرگەن يرينا سىچينا