ەڭبەك كۇنى جانە الەۋمەتتىك قورعاۋ جۇيەسى قىزمەتكەرلەرى كۇنى قارساڭىندا, قر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا مينيسترلىك ارداگەرلەرىن كاسىبي مەرەكەلەرىمەن قۇتتىقتادى.
«ەڭبەك ارداگەرى» مەدالىمەن سان-سالادا ەڭبەك ءوتىلى 40 جىلدان اساتىن, سونىڭ ىشىندە ءبىر سالادا 10 جىلدان استام جۇمىس ىستەگەن, سونداي-اق ەڭبەك جولىندا ەڭ ۇزدىك كورسەتكىشتەرگە قول جەتكىزگەن زەينەتكەرلەر مەن ۇزدىك ەڭبەككەرلەر ماراپاتتالادى. وسىنداي قۇرمەتكە بۇگىن 9 ارداگەر يە بولدى.
جوعارى كاسىبيلىك, سالاداعى كوشباسشىلىق جانە ۇيىمداستىرۋشىلىق قابىلەتتىلىگى, الەۋمەتتىك-ەڭبەك سالاسىنا ەلەۋلى ۇلەس قوسقانى ءۇشىن جانە قازاقستاندىقتاردىڭ ءال-اۋقاتىن ارتتىرۋدا ايانباي ەڭبەك ەتكەن 35 ارداگەرگە ەڭبەك جانە حالىقتى الەۋمەتتىك قورعاۋ ءمينيسترىنىڭ العىس حاتى تابىستالدى.
مەرەكەلىك جيىنعا كەلگەندەردى قۇتتىقتاعان تامارا دۇيسەنوۆا, ەڭبەك-الەۋمەتتىك سالاعا ەڭبەك سىڭىرگەن ءاربىر ارداگەردىڭ تاباندى ەڭبەگى مەن قوسقان ۇلەسىنە جەكەلەپ توقتالدى.
«سىزدەردىڭ ءاربىرىڭىزدىڭ ەسىمدەرىڭىز ەڭبەك جانە حالىقتى الەۋمەتتىك قورعاۋ مينيسترلىگىنىڭ تاريحىنا التىن ارىپتەرمەن جازىلعان! سىزدەر, بۇگىندە قولدانىستاعى الەۋمەتتىك ساقتاندىرۋ, زەينەتاقى جۇيەسى, الەۋمەتتىك كومەك, ەڭبەك قورعاۋ, ەڭبەكتى نورمالاۋ جانە ەڭبەك تولەمدەرى, حالىقتى جۇمىسپەن قامتۋ باعىتتارىنىڭ نەگىزىن سالدىڭىزدار. الەۋمەتتىك-ەڭبەك سالاسىنىڭ دامۋى مەن وعان قوسقان زور ۇلەستەرىڭىز جانە قازاقستاندىقتاردىڭ الەۋمەتتىك جاعدايىنىڭ جاقسارۋىنا ات سالىسقاندارىڭىز ءۇشىن ايتار العىسىم شەكسىز», - دەپ اتاپ ءوتتى تامارا قامىسقىزى.
ەسكە سالا كەتۋ كەرەك, ەڭبەك كۇنى مەرەكەسىن قىركۇيەك ايىنىڭ سوڭعى جەكسەنبىسىندە اتاپ ءوتۋ 2013 جىلدىڭ 22 قاراشاسىندا ەلباسى جارلىعىمەن بەكىتىلدى. مەرەكە ماقساتى - مەملەكەت باسشىسىنىڭ جالپىعا ورتاق ەڭبەك قوعامىن قۇرۋ تۋرالى يدەياسىنىڭ اياسىندا ءونىمدى ەڭبەكتى ىنتالاندىرۋ, جاستار اراسىندا جۇمىسشى كاسىپتەردى ناسيحاتتاۋ مەن ەڭبەك اۋلەتتەرىنىڭ كوپجىلدىق داستۇرلەرىن نىعايتۋعا باعىتتالعان.
الەۋمەتتىك قورعاۋ جۇيەسى قىزمەتكەرلەرى كۇنى مەملەكەت باسشىسىنىڭ 2011 جىلدىڭ 20 قازانىنداعى جارلىعىمەن بەكىتىلگەن بولاتىن. بۇل ەلباسىنىڭ زەينەتكەرلەردىڭ يگىلىگىنە قىزمەت ەتىپ, مۇمكىندىگى شەكتەۋلى ادامدارعا, كوپ بالالى, از قامتىلعان وتباسىلارعا باعا جەتپەس كومەك كورسەتىپ وتىرعان ازاماتتارعا دەگەن قۇرمەتى مەن قامقورلىعى سانالادى.