ابىل وركەسترىن اسپاپ جايى الاڭداتادى

كۇيشى مۇرات وسكىنباەۆ اتىن­داعى ماڭعىستاۋ وبلىستىق فيلارمونيا جانىنان 1995 جىلى قۇرىلعان وركەستر جيىرما جىلدان ەندى اساتىن ءوز تاريحىندا كاسىبي تۇرعىدان جان-جاقتى جەتىلىپ, رەپەرتۋارىن مولايتا ءتۇستى. وزىندىك ىزدەنىس كوكجيەگىن كەڭەيتۋدى قازاق ونەرى مەن مادەنيەتىن جاستارعا ناسيحاتتاۋ جانە ونى وزگە ەلدەرگە تانىتۋ باعىتىمەن بىرگە الىپ كەلەدى.  ۋكراينا, رەسەي, ازەربايجاندا ونەر كورسەتكەن ۇجىم ەل ىشىندەگى ايتۋلى شارالاردان, بايقاۋلاردان تىس قال­مايدى جانە جۇلدەسىز دە ەمەس. 

بۇگىندە رەپەرتۋارلىق قورجى­نى 800-دەن استام شىعارمامەن تولىققان وركەستر قۇرامىندا ەسى­مى ەلگە تانىمال قازاقستاننىڭ ەڭبەك سى­ڭىر­گەن قايراتكەرلەرى سەر­جان شا­كىرات, روزا ايدارباەۆا, قازاق­ستاننىڭ مادەنيەت قايرات­كەرلەرى نۇرياش وسپانوۆا, جولا­مان كوشكىنوۆ, قازاقستاننىڭ ما­دە­نيەت سالاسىنىڭ ۇزدىكتەرى اسقار, ءاسانالى كوشەروۆتەر, اق­ما­رال ەرىمبەتوۆا, «قۇرمەت» ور­دەنىنىڭ يەگەرى تامارا اسار جا­نە باس­قا دا تانىمال  كۇيشىلەر مەن ساڭلاق ونەر­پازدار قىزمەت ەتەدى.

جيىرما جىل ىشىندە قۇرامى 60 ادامعا ارتقان اۋقىمدى ونەر ۇجىمىنىڭ باستى ماسەلەسى اسپاپتار ءۇنىنىڭ بىركەلكى بولماۋىندا بولىپ وتىر. ال ول وركەستر ورىن­داۋىنداعى شىعارمالاردىڭ دىبىستىق سەلكەۋلىگىنە اكەلىپ سوق­تى­رىپ, ونەرپازداردىڭ شىعار­ماشىلىق شەبەرلىگىنە, تۇلعالىق يميدج­­­دەرىنە نۇقسان كەلتىرەدى ەكەن. 

– ونى بولدىرماۋ ءۇشىن اسپاپتار ءبىر شەبەردىڭ قولىنان شىعۋى جانە  دومبىرا – تەنور, باس-دومبىرا, كونتراباس-دومبىرا, فلەي­تا, گوبوي, قوبىز-پريما, بايان, شەرتەر, ۆيولونچەل, دومبىرا پريما اسپاپتارى بىردەي ما­تەريالدان جاسالۋى ءتيىس. وسى ماسەلەنىڭ سەبەبىنەن جانە وركەستر قۇرا­مىنىڭ ارتۋىنا بايلانىستى, وركەستردى جاڭا مۋزىكالىق اسپاپتارمەن قامتۋ قاجەتتىگى تۋىنداپ وتىر, – دەيدى ماڭعىستاۋ وبلىستىق فيلارمونياسىنىڭ قىزمەتكەرى, ءانشى كۇلاش دوسمۇحامبەتوۆا.

«ۇستا پىشاققا, ەتىكشى بىزگە جارى­مايدى» دەگەندەي, ۇلت ونەرىن ناسيحاتتاپ جۇرگەن ونەر ۇجى­مىنىڭ قالاۋى دا ونەرگە, اسپاپقا قاتىستى بولىپ شىقتى. دەمەك ونەر ءوز دەڭگەيىندە ورىستەۋى ءۇشىن اسپاپقا قاتىستى كەم-كەتىكتىڭ بولماۋى قاجەت-اق.

گۇلايىم شىنتەمىرقىزى, «ەگەمەن قازاقستان»

ماڭعىستاۋ وبلىسى