گلۋبوكوە اۋدانى اۋماعىندا ورنالاسقان وسكەمەن ارنايى الەۋمەتتىك قىزمەت كورسەتۋ ورتالىعى 120-عا جۋىق قارياعا قىزمەت كورسەتەدى. وڭىرىمىزدەگى ىرگەلى ءوندىرىس ورىندارىنىڭ ءبىرى «قازتسينك» كومپانياسى جاقىندا وسى مەكەمەدەگى مۇمكىندىگى شەكتەۋلى جاندارعا ەرەكشە سىي جاساپ, اۆتوماتتاندىرىلعان كوتەرۋ قۇرىلعىسىن تارتۋ ەتتى.
ورتالىق قىزمەتكەرلەرى بۇعان دەيىن وزدىگىنەن ءجۇرىپ-تۇرا المايتىن, قول ارباعا تاڭىلعان ارداگەرلەردى جوعارى قاباتتارعا ءوز كۇشتەرىمەن كوتەرىپ شىعارىپ ءجۇرىپتى. ەندى جاڭا قۇرىلعىنىڭ كومەگىمەن قولاربادا وتىرعان قاريالاردى جوعارعى-تومەنگى قاباتتارعا ەمىن-ەركىن كوتەرىپ-تۇسىرۋگە بولادى.
«مىنا قۇرىلعى وتە قولايلى ەكەن. بۇدان بىلاي بىزگە قارايلاساتىن الەۋمەتتىك قىزمەتكەرلەردى بۇرىنعىداي كوپ اۋرەگە تۇسىرمەيتىن شىعارمىز. جاڭا قۇرىلعى وسى مەكەمەدەگى قولاربامەن ءجۇرىپ-تۇراتىن قاتارلاستارىمىزعا ۇلكەن كومەك بولادى دەپ ويلايمىن. يگى ىسكە ۇيىتقى بولعان جاندارعا ەرەكشە العىسىمىزدى ايتامىز», دەيدى قارتتار ءۇيى تۇرعىندارىنىڭ ءبىرى, ءوزى دە قولاربا كومەگىنە جۇگىنەتىن قاريا الەكساندر سەرەبرياكوۆ.
«قازتسينك» كومپانياسىنىڭ وسكەمەندەگى كاسىپوداق ۇيىمىنىڭ توراعاسى نيكولاي پوتاپەنكو جۋىقتا وسىندا ءىس-شارا وتكىزگەندە ارداگەرلەر تاراپىنان جاڭا قۇرىلعىنىڭ قاجەتتىگى جونىندە ءوتىنىش تۇسكەنىن ايتادى. ء«بىزدىڭ كومپانيا ارداگەرلەردى ەشۋاقىتتا نازاردان تىس قالدىرعان ەمەس. ءاردايىم قولداپ, قوشتاپ, دەمەپ وتىرادى. جالپى, اعا بۋىن وكىلدەرىنە قانداي قۇرمەت كورسەتسەك تە ارتىقتىق ەتپەيدى», دەيدى ول.
ازامات قاسىم, «ەگەمەن قازاقستان»
وسكەمەن