ەكسپو تەحنولوگيالارىن تاجىريبە جۇزىندە قولدانۋعا بايلانىستى ۇكىمەتتە ءباسپاسوز ءماسليحاتى ءوتتى. جيىنعا قوستاناي مەملەكەتتىك پەداگوگيكالىق ينستيتۋتىنىڭ رەكتورى ەركىن ءابىل, قاراعاندى مەملەكەتتىك يندۋستريالىق ۋنيۆەرسيتەتىنىڭ رەكتورى باقىت جاۋتىكوۆ, ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتىنىڭ رەكتورى بەرىك احمەتوۆ قاتىسىپ, ءوز وقۋ ورىندارىندا جۇزەگە اسىرىلىپ جاتقان جوبالارمەن تانىستىردى.
قوستانايلىق وقۋ ورداسىنىڭ رەكتورى ەركىن ءابىلدىڭ ايتۋىنشا, وبلىس ەكسپو-2017 حالىقارالىق كورمەسىنە قويىلعان 105 جوبانىڭ 10-ىن ىرىكتەپ الىپتى. ايتالىق, «قوستاناي سۋ» قالالىق كوممۋنالدىق كاسىپورنى اۋىز سۋدى تازارتۋ تەحنولوگياسى باعىتىنداعى ەكى جوبانى جۇزەگە اسىرۋدى جوسپارلاپ وتىر. بۇل جالپى كولەمى 50 ملن تەكشە مەتردى قۇرايتىن اعىندى سۋلاردى ەكولوگيالىق تالاپتارعا ساي تازارتۋعا مۇمكىندىك بەرەدى. دەمەك, تۇرعىندار دا ابدەن سۇزگىدەن وتكەن ساپالى اۋىز سۋدى تۇتىنادى دەگەن ءسوز.
قوستاناي ۋنيۆەرسيتەتى تاڭداپ العان جوبالاردىڭ ىشىندە كۇن كوزىنەن قۋات الاتىن كوشەنى جارىقتاندىرۋ تەحنولوگياسى دا بار. قازىردىڭ وزىندە ليساكوۆ قالاسىنىڭ كوشەلەرىنە كۇننەن قۋات الاتىن وسىنداي 20 جارىقشام ورناتىلىپتى.
سونداي-اق تىڭ جوبالاردىڭ ىشىنەن گەرمانيامەن بىرلەسە جۇزەگە اسىرىلاتىن جىلۋ بەرۋ جۇيەسى تەحنولوگياسىن دا اتاپ وتۋگە بولادى. جىلۋ قازاندىعىنا ورناتىلاتىن مۇنداي قوندىرعى ارقىلى قالا اي سايىن 3,5 ملن تەڭگە ۇنەمدەي الادى ەكەن.
ال كاسپي ۋنيۆەرسيتەتىنىڭ رەكتورى ەكسپو كورمەسى بارىسىندا تسيفرلاندىرۋ, وقۋ پروتسەسىن وڭتايلاندىرۋ, ءبىلىم ورداسىن سمارت ۋنيۆەرسيتەت دەڭگەيىنە جەتكىزۋ باعىتىنداعى جوبالاردى قۇپ كورگەندەرىن جەتكىزدى. ونىڭ ايتۋىنشا, جاھاندىق كورمە وقىتۋشىلار مەن ستۋدەنتتەردىڭ زاماناۋي جوبالارعا دەگەن قىزىعۋشىلىعىن ارتتىرىپ, زەرتتەۋ جۇمىستارىنا تىڭ سەرپىن بەرگەن. بۇگىندە ۋنيۆەرسيتەت بالامالى ەنەرگيا كوزدەرىن پايدالانۋعا دەن قويا باستاپتى. قازىردىڭ وزىندە وقۋ ورداسىندا قولدانىلاتىن جاڭعىرمالى ەنەرگيا كوزدەرى 1 پايىزدى قۇرايدى, ەندى ءۇش جىلدا ونىڭ كولەمىن 10 پايىزعا جەتكىزۋ كوزدەلۋدە. سونداي-اق ءبىلىم ورداسى سمارت-ۋنيۆەرسيتەت دەڭگەيىنە ەكى جىلدىڭ ىشىندە قول جەتكىزۋدى ماقسات ەتىپ وتىر.
ال قاراعاندى مەملەكەتتىك يندۋستريالىق ۋنيۆەرسيتەتى تاجىريبەگە ەنگىزۋ ءۇشىن كورمەدەگى 105 جوبانى ىرىكتەپ الىپتى. «حالىقارالىق كورمەنىڭ ارقاسىندا شەتەلدىك ارىپتەستەرمەن تىكەلەي پىكىر الىسىپ, تاجىريبە الماسۋعا مۇمكىندىك تۋدى. بۇگىندە رەسەي, پولشا, اۆستريا, گەرمانيا ەلدەرىنىڭ عالىمدارىمەن بىرلەسە جۇمىس جاساۋ جونىندە كەلىسىمگە كەلدىك», دەيدى رەكتور ب.جاۋتىكوۆ. ۋنيۆەرسيتەت تاڭداعان جوبالاردىڭ قاتارىندا ەنەرگيانى ۇنەمدەيتىن جىلۋ قوندىرعىلارى, «اقىلدى» جىلۋ جۇيەلەرى, كۇننەن قۋات الاتىن مودۋلدەر, كوگىلدىر كومىر, تاعى باسقالار بار.
ۋنيۆەرسيتەت رەكتورلارىنىڭ ايتۋىنشا, ەندى عانا قولدانىسقا ەنگىزىلە باستاعان جاڭا تەحنولوگيالاردىڭ ەكونوميكالىق تيىمدىلىگى تۋرالى ايتۋ ءالى ەرتە. العاشقى جوبالاردىڭ پايداسىن ەل بيىلعى جىلدىڭ سوڭىنان باستاپ كورەتىن بولادى.
قىمبات توقتامۇرات, «ەگەمەن قازاقستان»