اقتوبەدە «رۋحاني كەلىسىم – تاتۋلىق تىرەگى» اتتى دوڭگەلەك ۇستەل ءوتتى

اقتوبە قالاسىندا قازاقستان حالقى اسسامبلەياسى عيماراتىندا «رۋحاني كەلىسىم – تاتۋلىق تىرەگى» اتتى تاقىرىبىندا وتكىزىلگەن دوڭگەلەك ۇستەل ءماجىلىسى وسى ماسەلەگە ارنالدى. مۇندا ءبىرىنشى بولىپ ءسوز العان «نۇر عاسىم» مەشىتىنىڭ نايب يمامى اسىلحان تەمىرحانوۆ يسلامنىڭ باستى ۇستانىمى دىنارالىق تاتۋلىققا نەگىزدەلگەنىن ناقتى پايىمداۋلار بويىنشا بايانداپ بەردى. سونىمەن بىرگە ول كونفەسسياارالىق قارىم-قاتىناستاردى تەرەڭدەتە تۇسۋدە يسلام ءدىنىنىڭ ىزگىلىك پەن قايىرىمدىلىققا تولى قادامدارىن جۇرەكتەرگە جەتكىزە ايتتى.

وڭىردە رۋحاني قۇندىلىقتاردى قاستەر تۇتۋدىڭ سان-الۋان تۇرلەرى مەن ادىستەرى جۇزەگە اسىرىلىپ كەلەدى. بۇل جونىندە وڭىردە قۇرىلعان «رۋحانيات» مۋزەيىنىڭ عىلىمي قىزمەتكەرى ايزاگۇل جامبىلوۆا ايتىپ بەردى. ءبىزدىڭ مۇراجايدىڭ باستى قىزمەتى – دىندەردى ناسيحاتتاۋعا ەمەس, الەمدىك جانە ءداستۇرلى دىندەردىڭ پايدا بولۋىن تالداۋعا جانە دامۋ تاريحىن جيناقتاۋعا نەگىزدەلگەن. مۇنداعى مۇراعاتتاردا كوپ سىر بار. تۇپتەي كەلگەندە قاي ءدىن قانداي كونفەسسيا بولماسىن ولاردىڭ كوزدەيتىن ماقساتتارى – جاقسىلىققا ۇندەۋ, قياناتتان بويدى اۋلاق سالۋعا شاقىرۋ. ءبىزدىڭ مۇراجايعا قويىلعان ەكسپوزيتسيالاردان وسى ماسەلەگە قاتىستى ايعاق دۇنيەلەر دە مولىنان تابىلادى دەدى بۇدان ءارى ساراپشى مامان.

سونداي-اق دوڭگەلەك ۇستەلدە ق.جۇبانوۆ اتىنداعى اقتوبە ءوڭىرلىڭ مەملەكەتتىك ۋنيۆەرسيتەتىنىڭ عالىمدارى دميتري ماتسيۋك پەن سابىرجان مۇحتاروۆتار قازاقستان – كونفەسسياارالىق كەلىسىم ارالى اتانعانىن ايتا كەلىپ ءدىني تۇرعىداعى توللەرانتتىلىق جاس مەملەكەتتەگى باستى رۋحاني قۇندىلىقتاردىڭ بىرىنە اينالعانىن اتاپ كورسەتتى. رۋحاني كەلىسىمنىڭ تاعى ءبىر تۇتقاسى – ءتىل. وسى تۇرعىدا قازاق ءتىلى قازاقستان حالقىن بىرىكتىرۋشى ءتىل ءرولىن اتقارۋى ءتيىس دەلىندى بۇدان ءارى.

دوڭگەلەك ۇستەل ءماجىلىسىن قازاقستان حالقى اسسامبلەياسى اقتوبە وبلىستىق حاتشىلىعى مەڭگەرۋشىسى نۇرباقىت باربوسىنوۆ قورىتىندىلادى.

تەمىر قۇسايىن, «ەگەمەن قازاقستان»