ەلورداداعى ۇلتتىق اكادەميالىق كىتاپحانادا قازاقستان حالقى اسسامبلەياسى توراعاسىنىڭ ورىنباسارى دارحان مىڭباي پولشانىڭ ىشكى ىستەر مينيسترلىگى مەن پولشا رەسپۋبليكاسى اكىمشىلىگىنىڭ مەملەكەتتىك حاتشىسى – رەپاترياتسيالاۋ ءىسى جونىندەگى كوميسسار سەباستيان حۆالەكپەن كەزدەسۋى ءوتتى.
شارا اياسىندا ەكى ەل اراسىنداعى قوعامدىق كەلىسىمدى قامتاماسىز ەتۋ مەن ەتنوسارالىق قاتىناستار سالاسىنداعى ساياساتتى جۇزەگە اسىرۋ جانە قارىم-قاتىناستى جاقسارتۋ باعىتىنداعى ءوزارا ءىس-قيمىلداردى ۇيىمداستىرۋ تەتىكتەرى ايتىلدى.
رەسمي كەزدەسۋدەگى قۇتتىقتاۋ سوزىندە د.مىڭباي ەكى ەل اراسىنداعى قارىم-قاتىناس دەڭگەيىنىڭ كەلەشەگى كەمەل ەكەندىگىنە توقتالدى.
«بيىل قازاقستان مەن پولشانىڭ ديپلوماتيالىق بايلانىس ورناتقانىنا 25 جىل تولادى. وسى ارالىقتا ءبىزدىڭ ارىپتەستىك قارىم-قاتىناسىمىز جوعارى دەڭگەيدە قالىپتاسىپ, بارلىق سالادا سەنىمدى سەرىكتەستىگىمىز نىعايا ءتۇستى. ارينە, ونىڭ باسىم بولىگى ساۋدا-ەكونوميكالىق باعىتتارعا نەگىزدەلگەنى تۇسىنىكتى. سول سەبەپتەن دە بۇگىنگى تاڭدا قازاقستاندا پولياك كاپيتالىنىڭ قاتىسۋىمەن 100-دەن استام كاسىپورىن قىزمەت ەتۋدە. مۇنىڭ ءوزى قوس مەملەكەت اراسىنداعى ءوزارا ءتيىمدى ءارى ستراتەگيالىق بايلانىس ورناعاندىعىنىڭ ايقىن دالەلى», دەدى ول.
سونىمەن قاتار, دارحان قامزابەك ۇلى قازىرگى كەزدە قازاقستان پولياكتارىنىڭ وداعى بارلىق وڭىرلەردە قالىپتى جاعدايدا جۇمىس ىستەيتىندىگىن تىلگە تيەك ەتتى.
«وداق اياسىنداعى ورتالىقتاردا پولياك ءتىلى جەكسەنبىلىك مەكتەپتەر ارقىلى وقىتىلادى. سول سياقتى ەكى مەملەكەتتىڭ اراسىن ءبىلىم سالاسى دا جالعاستىرۋدا. ويتكەنى, وسى كۇندەرى 800-دەن استام ستۋدەنتىمىز پولشا ەلىندە ءبىلىم نارىمەن سۋسىنداۋدا. بۇل ۇكىمەتارالىق ارىپتەستىك كەلىسىمى نەگىزىندە جۇزەگە اسۋدا. سوندىقتان دا ءبىزدىڭ بايلانىسىمىز ءبىلىم سالاسىنان باسقا, مادەنيەت پەن ونەر سىندى وزگە دە سالالار بويىنشا جالعاسىن تاۋىپ, دوستىق پەيىلدەگى قارىم-قاتىناسىمىز نىعايا تۇسەدى دەگەن سەنىمدەمىن», دەدى د.مىڭباي.
ءوز كەزەگىندە ءسوز العان ءىىم مەن پولشا اكىمشىلىگىنىڭ مەملەكەتتىك حاتشىسى – رەپاترياتسيالاۋ ءىسى جونىندەگى كوميسسار س.حۆالەك پولشا ءۇشىن قازاقستان ماڭىزى جوعارى سەرىكتەس ەل رەتىندە مويىندالاتىندىعىن ايتتى.
«اعىمداعى جىلدا پولشا پرەزيدەنتى مەن سەناتتىڭ ۆيتسە-سپيكەرى جانە بىرنەشە ءمينيستردىڭ قازاقستانعا رەسمي ساپارمەن كەلۋى مەنىڭ بۇل سوزىمە ايقىن دالەل بولا الادى. سونداي-اق, ءبىلىم سالاسىنداعى بەرىك بايلانىسىمىز بەن ينتەرپول جەلىسى باعىتىنداعى سەرىكتەستىگىمىز دە, وعان قوسا ەكى ەل اراسىنداعى سوتتالعانداردى بەرۋ جونىندەگى كەلىسىم دە تاراپتاردىڭ سالالىق قاتىناستارىن جانداندىرۋ ۇستىندە», دەدى س.حۆالەك.
كەزدەسۋ قورىتىندىسىندا تاراپتار قوعامدىق كەلىسىمدى نىعايتۋدى كوزدەيتىن ءتۇرلى شارالاردى بىرلەسە ۇيىمداستىرۋ ماسەلەلەرىن جان-جاقتى تالقىلادى.
نۇرلىبەك دوسىباي, «ەگەمەن قازاقستان»