بۇگىن ءماجىلىس توراعاسى نۇرلان نىعماتۋلين ءبىزدىڭ ەلىمىزگە تۇڭعىش رەت رەسمي ساپارمەن كەلگەن ۆەتنام ۇلتتىق جينالىسىنىڭ ءتورايىمى نگۋەن تحي كيم نگانمەن كەزدەستى.
تاراپتار ەكى ەلدىڭ دامۋ تاجىريبەسىندە ەرەكشە ماڭىزعا يە دىنارالىق جانە ەتنيكارالىق كەلىسىمگە ايرىقشا نازار اۋداردى.
ن. نىعماتۋليننىڭ جانە نگۋەن تحي كيم نگاننىڭ پىكىرىنشە حالىقتار مەن ءتۇرلى دىندەر وكىلدەرىنىڭ ءوزارا تۇسىنىستىگى مەن سەنىمى جانە سىيلاستىعى الەمدەگى تىنىشتىق پەن بەيبىتشىلىكتىڭ كەپىلى.
ءماجىلىس توراعاسى قازاقستان پرەزيدەنتى نۇرسۇلتان نازارباەۆتىڭ ەكى ەل اراسىنداعى قارىم-قاتىناستى تەرەڭدەتۋگە زور كوڭىل بولەتىنىن العا تارتتى.
پالاتا سپيكەرى ساۋدا-ەكونوميكالىق بايلانىس ءبىزدىڭ ەلدەرىمىز قاتىناسىنداعى باسىم باعىتتاردىڭ ءبىرى ەكەنىن ايتتى. وسى رەتتە اسىرەسە, اۋىلشارۋاشىلىعى, كولىك-لوگيستيكالىق ىنتىماقتاستىقتى دامىتۋ ماڭىزدىلىعى زور.
بۇگىندە ەۋرازيالىق ەكونوميكالىق وداق اياسىندا قازاقستاندا ۆەتنامدىق كومپانيالاردىڭ ءتيىمدى جۇمىس جاساۋىنا زور مۇمكىندىكتەر اشىلدى. وعان اتالعان وداق پەن ۆەتنام اراسىنداعى ەركىن ساۋدا ايماعى تۋرالى كەلىسىم ناقتى دالەل. سونىمەن بىرگە, تۋريزم سالاسىندا دا ەكى ەل ىنتىماقتاستىعىن نىعايتۋدىڭ الەۋەتى جوعارى. ءماجىلىس توراعاسى وسى ورايدا ۆەتنامدىق تاراپتىڭ قازاقستان ازاماتتارى ءۇشىن بىرجاقتى تارتىپپەن ۆيزاسىز رەجيم ەنگىزۋ ۇسىنىسىن قولداۋعا بولاتىندىعىن ايتتى.
ءوز كەزەگىندە مارتەبەلى مەيمان ءبىزدىڭ ەلىمىزدىڭ قوناقجايلىعىنا العىس ءبىلدىرىپ, قازاقستاننىڭ از ۋاقىت ىشىندەگى قارقىندى دامۋىنا, سونىڭ ىشىندە, استانانىڭ كەرەمەتتەگىنە كوڭىل ءبولدى.
ءبىزدىڭ ەلدىرىمىزدىڭ ۇقساس ۇستانىمدارى بەيبىتشىلىك پەن كەلىسىم ەكەنىن العا تارتقان پارلامەنت ءتورايىمى ءوزىنىڭ ءىس-ساپارى تىكەلەي ەكىجاقتى قاتىناستى تەرەڭدەتۋگە باعىتتالعانىن باسا ايتتى. قازاقستاننىڭ بارلىق سالاداعى دامۋىن وتە جوعارى باعالاپ, قازاقستان پرەزيدەنتىنىڭ باسشىلىعىمەن ءبىزدىڭ ەلىمىز ءالى تالاي بيىكتەردى باعىندىرادى دەدى.
كەزدەسۋ يەلەرى بىرەگەي ۇلگى قازاقستان حالقى اسسامبلەياسى جايلى, قازاقستاندا وتكەن ەكسپو كورمەسى تۋرالى اڭگىمە قوزعاپ, ايماقتىق قاۋىپسىزدىك, مادەني بايلانىس, پارلامەنتارالىق قاتىناس ماسەلەلەرىنە نازار اۋداردى.