استانادا «رۋحاني جاڭعىرۋ – گۇلدەنۋ مەن كەلىسىم جولى» اتتى حالىقارالىق عىلىمي-تاجىريبەلىك كونفەرەنتسيا باستالدى. ءىس-شارا اياسىندا ەۋرازيا حالىقتارى اسسامبلەياسى (ەحا) وتىرىسى ءوتتى.
جيىنعا اقىن, قازاقستاننىڭ ەڭبەك ەرى ولجاس سۇلەيمەنوۆ, قازاقستان حالقى اسسامبلەياسى كەڭەسىنىڭ مۇشەسى, كومپوزيتور تولەگەن مۇحامەدجانوۆ جانە بىرقاتار ەلدىڭ عىلىم جانە مادەنيەت قايراتكەرلەرى قاتىستى. ت.مۇحامەدجانوۆتىڭ ايتۋىنشا, كونفەرەنتسيا رۋحاني كەلىسىم كۇنىنە ورايلاستىرىپ ۇيىمداستىرىلىپ وتىر. الىستان ات تەرلەتىپ كەلگەن مەيماندار قازاقستاننىڭ ۇلتارالىق جانە كونفەسسياارالىق تاجىريبەلەرىن ۇيرەنىپ, ءوز ەلىندەگى باستامالارمەن بولىسپەك.
«ەلباسى ن.نازارباەۆتىڭ قولداۋىمەن جۇزەگە اسقان رۋحاني كەلىسىم كۇنى تويلانىپ كەلە جاتقانىنا 25 جىل تولدى. ايتۋلى مەرەكە حالىقارالىق جانە ءدىني قارىم-قاتىناسقا ۇلكەن ۇلەس قوسىپ كەلەدى. بۇگىنگى جيىندا ءوزارا تاجىريبە الماستىق. شەتەلدەن كەلگەن قوناقتار قازاقستان ۇلگىسىن ءوز ەلدەرىنە جۇزەگە اسىرۋعا قۇلشىنىس تانىتىپ وتىر. بۇل – ەلىمىز ءۇشىن ۇلكەن مارتەبە. قازاقستاندا ءوتىپ جاتقان باستامالاردى حالىقارالىق ۇيىمداردىڭ قولداۋى جانە مويىنداۋى ەلىمىزدىڭ ابىرويى», – دەدى ت.مۇحامەدجانوۆ.
وتىرىستا ەڭ اۋەلى رۋحاني كەلىسىم كۇنىن تويلاۋ ماسەلەسى قارالدى. وندا قازاقستاندا اتالىپ وتەتىن ايتۋلى مەيرامدى ەۋرازيا حالىقتارى اسسامبلەياسى تاراپىنان قولداپ, ونى ۇيىمنىڭ حالىقارالىق مەرەكەسى رەتىندە تويلاۋ كوزدەلگەن. سونىمەن قاتار, جيىن بارىسىندا ەۋرازيا حالىقتارىنىڭ حارتياسى مەن ەحا جۇمىسىنىڭ ناتيجەسى مەن جوسپارى قابىلدانىپ, ۇيىم اياسىندا وتەتىن كەڭەستەر مەن ماڭىزدى مەرەكەلەر, قاۋىمداستىققا كىرۋگە ءوتىنىش بىلدىرۋشىلەر جونىندەگى بىرقاتار ماسەلەلەر توڭىرەگىندە ءسوز بولدى.
كونفەرەنتسيانى ۇيىمداستىرۋشىلار جيىننىڭ ءتۇرلى ەلدەن كەلگەن عىلىم جانە مادەنيەت قايراتكەرلەرىنىڭ, ءدىنباسىلار مەن مەملەكەت قىزمەتشىلەرى باس قوسىپ, پىكىر الماساتىن الاڭىنا اينالۋىنان ءۇمىت كۇتەدى. ىرگەلى جيىنداعى نەگىزگى تاقىرىپ اياسىندا قازاقستان مەن ەلباسى ن.نازارباەۆتىڭ زاماناۋي كۇردەلى ماسەلەلەردى عىلىمي نەگىزدەرگە سۇيەنە وتىرىپ وڭتايلى شەشۋ باستامالارى قاراستىرىلدى.
«رۋحاني جاڭعىرۋ – گۇلدەنۋ مەن كەلىسىم جولى» اتتى كونفەرەنتسيا اياسىندا پلەنارلىق وتىرىس تا ءوتتى. ءىس-شارادا جيىنعا قاتىسۋشىلار اتىنان ۇيىمنىڭ ۇندەۋى قابىلداندى. وندا قازاقستاندىق قوعامنىڭ رۋحاني-ادامگەرشىلىك جاڭعىرۋى, گۋمانيزم, مادەني وركەندەۋ جولىنداعى ارەكەتتەردى ارتتىرۋ كەرەك ەكەندىگى ايتىلعان. استانادا قابىلدانعان ۇندەۋدى جىل سوڭىندا پاريجدە وتەتىن ەحا قورىتىندى جيىنىندا تانىستىرۋ جوسپارلانىپ وتىر.
ەكى كۇنگە سوزىلاتىن كونفەرەنتسيا بارىسىندا شەتەلدەن كەلگەن مەيماندار قازاقستاندىق قوعام قايراتكەرلەرىمەن جولىعادى. ارابتانۋشى جانە شىعىستانۋشى, «Russia Today» تەلەارناسىنداعى ء«داۋىر كۋاگەرلەرى» باعدارلاماسىنىڭ اۆتورى ءارى جۇرگىزۋشىسى حاليد ءال-روشد «الەمدىك اقپاراتتىق مايدان جاعدايىنداعى زاماناۋي جۋرناليستيكانىڭ ءرولى» اتتى شەبەرلىك سىنىبىن وتكىزدى. سونىمەن قاتار, جيىننىڭ ەكىنشى كۇنىندە ءدىنتانۋدى سالىستىرمالى تۇردە تەرەڭ زەرتتەۋ ينستيتۋتىنىڭ قىزمەتكەرى مەري پەت فيشەر مەن ءبىلىم ورداسىنداعى سىرتقى بايلانىس دەپارتامەنتىنىڭ جەتەكشىسى گوبيند سادانا ەۋرازيا ۇلتتىق ۋنيۆەرسيتەتىندە ارنايى لەكتسيا وقىلادى.
سونداي-اق, كونفەرەنتسيا قايىرىمدىلىق شارالارىمەن جالعاسادى دەپ كۇتىلىپ وتىر. استانا قالاسى اكىمدىگىنىڭ قولداۋىمەن ەرىكتىلەر الەۋمەتتىك تۇرعىدان تۇرمىسى تومەن وتباسىلارعا ازىق-ت ۇلىك تاراتىپ بەرەدى. بۇدان بولەك, قازاقستاننىڭ قىزىل جارتى اي قوعامىنىڭ وكىلدەرى شەبەرلىك سىنىبىن وتكىزەدى. جيىن سوڭىندا رۋحاني كەلىسىم كۇنىنە ارنالعان گالا-كونتسەرت وتەدى.
اباي اسانكەلدى ۇلى, «ەگەمەن قازاقستان»