جەڭىل سالماقتا IBF تۇجىرىمى بويىنشا الەم چەمپيونى بريتانيالىق رايان بارنەتت (17-0, 9 كو) پەن WBA (Super) بەلبەۋىنىڭ يەگەرى قازاقستاندىق بوكسشى جانات جاقيانوۆ 27-1, 18 كو) اراسىنداعى كەزدەسۋ قاي ۋاقىتتا باستالاتىنى بەلگىلى بولدى. بۇل تۋرالى vesti.kz حابارلادى.
وتانداسىمىزدىڭ مەنەدجەرى فيليپپ ءفونديۋدىڭ ايتۋىنشا, قازىرگى ۋاقىتتا بەلفەست قالاسىندا (سولتۇستىك يرلانديا) وتەتىن بوكس كەشىنىڭ كەستەسى Sky ارناسىمەن تالقىلانىپ جاتىر. دەگەنمەن دە ەكى بوكسشىنىڭ كومانداسى الدىن الا قۇرىلعان جوسپاردان شىعىپ كەتپەيدى. "قازىر ءبىز بوكس كەشىنە قاتىساتىن بارلىق بىلعارى قولعاپ شەبەرلەرىنىڭ شارشى الاڭعا شىعاتىن ۋاقىتىن بەكىتىپ قويدىق. ءتىپتى, ول كەستەنىڭ الدىن الا جاسالعان نۇسقاسىن دا كورسەتۋگە بولادى. ويتكەنى, Sky ارناسىمەن دە كەلىسىمگە كەلدىك. جەكپە-جەكتى كورسەتۋ قۇقىعى تولىعىمەن وسى ارناعا تيەسىلى. الايدا,ء بىز بارلىعىن جوسپار بويىنشا جاريالاپ وتىرامىز. قازىر جاقيانوۆ پەن بارنەتت اراسىنداعى بوكس كەشىنىڭ قاي ۋاقىتتا باستالاتىنىن ايتۋعا بولادى. بوكس كەشى استانا ۋاقىتىمەن 00:30- دا (21 قازاننان 22 قازانعا قاراعان ءتۇنى) باستالادى. ال كەشتىڭ باستى جەكپە-جەگىنە شىعاتىن جاقيانوۆ پەن بارنەتتىڭ كەزدەسۋى 03:45-تە باستالادى دەپ جوسپارلاپ وتىرمىز", دەيدى فونديۋ. بۇعان دەيىن اتالعان جەكپە-جەك كەشىن قازاقستان ايماعىندا دا تىكەلەي ەفيردە كورسەتىلەتىنى بەلگىلى بولدى. جەرگىلىكتى ارنالاردىڭ بىرىنە ەۋروپالىق Silver Spring Media كومپانياسى ترانسلياتسيانى جەتكىزىپ بەرەدى. ەسكە سالايىق, بۇل كەشكە جانات جاقيانوۆ جەڭىل سالماقتاعى WBA (Super) بەلبەۋىن ءبىرىنشى رەت قورعايدى. ال ءوز كەزەگىندە بارنەتت بۇل كەزدەسۋدە IBF بەلبەۋىن ورتاعا سالادى. بوكس كەشى 21 قازان كۇنى سولتۇستىك يرلانديانىڭ بەلفەست قالاسىنداعى SSE Arena سپورت كەشەنىندە وتەدى.