قازاقستاندا العاشقى جاساندى جەر سەرىگى ۇشىرىلۋىنىڭ 60 جىلدىعىن تويلاۋدا. 1957 جىلى 4-قازاندا, وسىدان تۋرا 60 جىل بۇرىن جەردىڭ العاشقى جاساندى جەر سەرىگى ۇشىرىلدى, دەپ حابارلايدى قازاقستان رەسپۋبليكاسى قورعانىس جانە اەروعارىش ونەركاسىبى مينيسترلىگىنىڭ باسپاسوز قىزمەتى.
قازاقستان ءۇشىن بۇل وقيعانىڭ ماڭىزى وتە زور. سەبەبى, قازاق جەرىنەن – «بايقوڭىر» عارىش ايلاعىنان عارىشتىق ءداۋىردىڭ باستالۋىنا داڭعىل جول اشىلدى. وسى مەرەيلى داتاعا وراي قر قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ بايقوڭىرلىقتاردى ايتۋلى مەرەكەمەن قۇتتىقتاپ, «بايقوڭىر» كەشەنىن سالۋعا جانە ونىڭ ارى قاراي جۇمىس ىستەۋىنە اتسالىسقان بارلىق ماماندار جۇمىسىنىڭ ەلەۋلى ەكەنىن جەتكىزدى.
سالتاناتتى شارا بارىسىندا قر قورعانىس جانە اەروعارىش ونەركاسىبى مينيسترلىگى اتىنان «بايقوڭىر» كەشەنىن دامىتۋعا ۇلەس قوسقانى ءۇشىن جانە جەردىڭ العاشقى جاساندى جەر سەرىگىنىڭ ۇشىرىلۋىنا 60 جىل تولۋىنا وراي روسكوسموس جانە قازعارىش وكىلدەرىنە, بايقوڭىر قالاسى اكىمشىلىگى مەن قىزىلوردا وبلىسى اكىمدىگىنىڭ قىزمەتكەرلەرىنە, سونداي-اق ەڭبەك سىڭىرگەن ارداگەرلەر مەن باق وكىلدەرىنە قۇرمەت گراموتالارى تابىستالدى.
كۇننىڭ ءبىرىنشى جارتىسىندا قازعارىش باسشىلارى مەرەكەلىك ميتينگكە قاتىسىپ, جەردىڭ العاشقى جاساندى جەر سەرىگىنىڭ ۇشىرىلۋ قۇرمەتىنە ورناتىلعان ەسكەرتكىشكە گۇل شوقتارىن قويدى.
سونىمەن بىرگە قر قورعانىس جانە اەروعارىش ونەركاسىبى مينيسترلىگىنىڭ قۇرامى, ونىڭ ىشىندە ۆيتسە-مينيستر مارات نۇرعوجين مەن «قازاقستان عارىش ساپارى» ۇق» اق-نىڭ ۆيتسە-پرەزيدەنتى, حالىق قاھارمانى, ۇشقىش-عارىشكەر ايدىن ايىمبەتوۆ ماسكەۋگە شاقىرتىلىپ, 60 جىلدىققا وراي وتكىزىلگەن مەرەكەلىك شاراعا قاتىستى.