بيىلعى قىركۇيەكتىڭ قازانعا ۇلاسار شاعى رەسپۋبليكانىڭ باتىس تۇرعىندارى ءۇشىن تۇسىنىكسىزدەۋ بولىپ تۇرعانداي. بۇلاي بولاتىن سەبەبى وتكەن ايدىڭ ىشىندە كۇننىڭ قىزۋى 30 گرادۋسقا دەيىن كوتەرىلىپ, بەينەبىر سۋعا شومىلۋ ناۋقانى قايتا ورالعانداي ءسات تۋدى.
ادامدار قالا كوشەلەرىندە قىسقا جەڭ كويلەكپەن تەرلەپ-تەپشىپ ءجۇردى. مىنە, بۇل مەيزامشۋاق دەستى حالىق كۇنتىزبەسىنەن تۇسىنىگى بار كونەكوز تۇرعىندار. الايدا ارادا ءبىر كۇن وتكەندە اۋا-رايى كۇرت وزگەرىپ, كۇن سالقىنداپ سالا بەردى.
كەشەگى ءبىر كۇندەرى اقتوبە اۋماعىندا اۋانىڭ تەمپەراتۋراسى مينۋستى كورسەتىپ, العاشقىدا قىلامىقتاپ تۇسكەن قار كوپ ۇزاماي جاپالاقتاپ جاۋا باستادى. سول تۇندە ورال – استانا پويىزىندا وتىرىپ, جول ساپارعا شىققان كەزىمىزدە مەزگىلىنەن ەرتە تۇسكەن قاردىڭ اقتوبەنىڭ باتىس قازاقستان وبلىسىنداعى شىڭعىرلاۋ جەرىنە دەيىنگى ارالىعىنا جاۋعاندىعىنا كۋا بولدىق. اقتوبە قالاسىندا اق ۇلپا قار-جاپىراقتارى ءالى جاپ-جاسىل تال-تەرەكتەردىڭ ساباقتارىنا قوناقتاپ كالدى. قار جاۋعان ساتتە ءۇپ ەتكەن جەل جوق, تىمىق بولعانى دا وسىنداي ادەمى دە, توسىن كورىنىستىڭ ورىن الۋىنا سەبەپشى بولعان سەكىلدى.
جالپى قىركۇيەكتىڭ اياعىندا قار ءتۇسۋى تابيعاتتىڭ توسىن قۇبىلىسى. سونداي-اق وسى كەزدە اۋا-رايىنىڭ نولدەن تومەن سالقىندىقتى كورسەتۋى دە سيرەك كەزدەسەتىن جاعداي. وسىعان وراي اقتوبە جانە باتىس قازاقستان وبلىستارىندا بيىلعى جىلىتۋ ماۋسىمى ادەتتەگى مەرزىمنەن ەكى اپتا ىلگەرى جىلجىتىلدى. بۇل الدە ينتەرنەت كوزدەرىن شارلاپ كەتكەندەي 100 جىلدىڭ ىشىندە بولىپ كورمەگەن الدا كەلە جاتقان قاتال قىستىڭ حابارشىسى ما ەكەن؟ ايتسە دە وسىمەن قىس ەرتە تۇسەدى دەپ جورامال جاساۋدىڭ دا قيسىنى جوق سەكىلدى. ويتكەنى سينوپتيك ماماندار الداعى كۇندەرى اقتوبە اۋماعىندا اۋا-رايى كۇندىز قايتادان 16-18 گرادۋسقا دەيىن كۇرت جوعارىلايتىنىن مالىمدەپ وتىر.
تەمىر قۇسايىن, «ەگەمەن قازاقستان»
اقتوبە