وتتان دا ىستىق وتانىمىزدىڭ وشپەس شىراعىن جارقىراتا جاعا بىلدىك. مىڭ ءولىپ, مىڭ تىرىلگەن اتامۇرامىزدى اسپەتتەپ, كەلەر ۇرپاق ميراس تۇتار ۇلتتىق قۇندىلىقتارىمىزدى ايشىقتادىق.
ەندى مىنە, «رۋحاني جاڭعىرۋ» باعدارلاماسى ارقىلى ادامزاتتىق الىپ كوش-كەرۋەننىڭ الدىنان كورىنۋگە دەن قويدىق.
اللا قالاسا, انا ءتىلىمىزدى لاتىن قارپىنە كوشىرەمىز. قورقاقتايتىن ەشنارسە جوق, وتكەن عاسىردىڭ سوناۋ وتىزىنشى جىلدارى لاتىن قارپىمەن ساۋاتىن اشقان مەنىڭ اپام كەڭەستىك اسكەر قاتارىندا جۇرگەنىمدە لاتىن قارپىمەن حات جازاتىن. مەكتەپتە نەمىس ءتىلىن وقىعاندىقتان مازمۇنىن كوپ قينالماي-اق تۇسىنەتىنمىن. بارا-بارا ءوزىم دە اپاما لاتىن قارپىمەن سالەم حات جولداۋعا كوشتىم.
اپام ايتىپ وتىرۋشى ەدى, جاز ماۋسىمىندا اۋىلعا ۇشتوبەدەن قىزىل وتاۋدىڭ ەكى مۇعالىمى كەلىپ, بۇكىل تۇرعىندارعا كيىز ءۇيدىڭ ىشىندە ءتىل سىندىرتىپ كەتتى دەپ. انام وسىلايشا عۇمىر بويى لاتىن قارپىمەن جازىپ, سىزىپ ءجۇردى. قازىرگى كەزەڭ مەن ول زاماننىڭ اراسى جەر مەن كوكتەي ەمەس پە؟ ينتەرنەت ارقىلى جەر-جاھانمەن جاراسىپ وتىرعان بىزدەر وتكەن عاسىرداعى اتا-انالارىمىزدان قالىس قالا قويماسپىز. شىعارمالارىمىز وقىلماي قالادى دەگەن بەكەر ءسوز. اعىلشىن, يا ورىس تىلىندەگى مۇرتى بۇزىلماي جاتقان كىتاپتار قانشاما؟! قۇندى دۇنيە قاي تىلدە جازىلماسىن ەلەنبەي قالمايدى. ءبىز ءۇشىن جانە ءبىر تيىمدىلىگى, مەملەكەتتىك ءتىلىمىزدى ۇيرەنە الماي جۇرگەن قايسىبىر وتانداستارىمىز كوزتانىس لاتىن تىلىنە نەگىزدەلگەن قازاق ءتىلىن جەڭىل مەڭگەرەدى. ەڭ باستىسى, لاتىن قارپىنە كوشۋ ارقىلى تەك تۇركىتىلدەستەرگە عانا ەمەس, الەمنىڭ سەكسەن پايىزعا جۋىق ەلدەرىنە ينتەرنەت جەلىسى ارقىلى جاقىنداي تۇسەمىز. سوندىقتان دا جەتىسۋ ولكەسىنىڭ جۇرتشىلىعى بۇل داۋىرلىك باستامانى كۋانا تولايىم كۇپتاپ وتىر. ءبىز كەلەشەگى كەمەل حالىقپىز!
امىرە ءارىن, الماتى وبلىستىق «جەتىسۋ» گازەتىنىڭ باس رەداكتورى