كەشە پارلامەنت ءماجىلىسىنىڭ توراعاسى ورال مۇحامەدجانوۆتىڭ جەتەكشىلىگىمەن پالاتا بيۋروسىنىڭ وتىرىسى ءوتتى. پالاتانىڭ زاڭناما جانە سوت-قۇقىقتىق رەفورما كوميتەتى «قازاقستان رەسپۋبليكاسى تاۋەلسىزدىگىنىڭ 20 جىلدىعىنا بايلانىستى راقىمشىلىق جاساۋ تۋرالى», سونداي-اق زياتكەرلىك مەنشىكتى دامىتۋ مەن قورعاۋ تەتىكتەرىن جەتىلدىرۋگە قاتىستى زاڭ جوباسى ءبىرىنشى وقىلىمدا, ال ادۆوكاتۋرا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى ەكىنشى وقىلىمدا دەپۋتاتتاردىڭ تالقىسىنا شىعارىلاتىنىن حابارلادى.
حالىقارالىق ىستەر, قورعانىس جانە قاۋىپسىزدىك كوميتەتى «ازياداعى ءوزارا ءىس-قيمىل جانە سەنىم شارالارى جونىندەگى كەڭەس حاتشىلىعىنىڭ, ونىڭ پەرسونالىنىڭ جانە مۇشە مەملەكەتتەر وكىلدەرىنىڭ ارتىقشىلىقتارى مەن يممۋنيتەتتەرى تۋرالى كونۆەنتسيانى راتيفيكاتسيالاۋ تۋرالى», «1992 جىلعى 15 مامىرداعى ۇجىمدىق قاۋىپسىزدىك تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى», «2002 جىلعى 7 قازانداعى ۇجىمدىق قاۋىپسىزدىك تۋرالى شارت ۇيىمىنىڭ جارعىسىنا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى», «كوپجاقتى ساۋدا جۇيەسى شەڭبەرىندە كەدەن وداعىنىڭ جۇمىس ىستەۋى تۋرالى شارتتى راتيفيكاتسيالاۋ تۋرالى», ت.ب. بىرقاتار زاڭ جوبالارىن جالپى وتىرىستىڭ كۇن تارتىبىنە ەنگىزۋدى ۇسىندى.
قارجى جانە بيۋدجەت كوميتەتى كەيبىر زاڭنامالىق اكتىلەرگە ۆاليۋتالىق رەتتەۋ جانە ۆاليۋتالىق باقىلاۋ ءماسەلەلەرى بويىنشا وزگەرىستەر ەنگىزۋ تۋرالى, ال ەكونوميكالىق رەفورما جانە وڭىرلىك دامۋ كوميتەتى «عارىش قىزمەتى تۋرالى» زاڭ جوباسىن ەكىنشى وقىلىمدا تالقىلاۋعا ۇسىندى. ۇكىمەتتەن ماجىلىسكە كەلىپ تۇسكەن جاڭا زاڭ جوبالارى بويىنشا قورىتىندى ازىرلەۋ ماسەلەسى دە قارالاتىن بولدى.
«ەگەمەن-اقپارات».