قازاقستان پرەزيدەنتى نۇرسۇلتان نازارباەۆتىڭ ۇستىمىزدەگى جىلعى قازاقستان حالقىنا ارنالعان جولداۋىنداعى باستى باعىتتاردىڭ ءبىرى – اۋىل شارۋاشىلىعىنىڭ نەگىزگى سالالارىنىڭ ىشىندەگى اسىل تۇقىمدى ءىرى قارا مال باسىنىڭ سانىن كوبەيتۋ, ەت ءونىمدەرىنىڭ ساپاسىن كوتەرىپ, شەت ەلدەرگە ساتۋ دەڭگەيىن ۇلعايتۋ. ەلباسىمىزدىڭ وسى باستاماسىن اۋىل جۇرتى وتە جوعارى قاناعاتتانعان سەزىممەن, ەرتەڭگى كۇنگە دەگەن ۇلكەن سەنىممەن قارسى الدى.
حالقىمىزدىڭ اتادان مۇراعا قالعان كاسىبىنە وسىنداي جوعارى كوڭىل ءبولىنىپ, ونى دامىتۋعا جەتكىلىكتى قارجى قاراستىرىلىپ, باعدارلامانىڭ ورىندالۋىنا «نۇر وتان» پارتياسى جانە قوعام تاراپىنان باقىلاۋ قويىلۋى ورنىقتى ءارى وسى كۇننىڭ تالاپ-تىلەگىنە ساي ەدى. سەبەبى, بەلگىلى عالىمدار مەن ءتاجىريبەلى ساراپشىلاردىڭ پىكىرلەرى بويىنشا, مۇناي مەن تاۋ-كەن ونەركاسىبىنەن كەيىن مال شارۋاشىلىعى – تۋعان ەلىمىزدىڭ جەتىستىگى مەن جەڭىسىن دۇنيە جۇزىنە لايىقتى كورسەتە الاتىن قۋاتى جەتكىلىكتى, ءمۇمكىندىگى ۇلان-عايىر سارقىلماس سالا.
ەلباسى ءوزىنىڭ قازاقستان حالقىنا جولداۋىندا اتاپ وتكەندەي, اسىل تۇقىمدى مال شارۋاشىلىعىن دامىتۋ ەل ىشىندە, قالا مەن اۋىلدا ءبىراز ونەركاسىپ پەن كاسىپكەرلىكتى دامىتىپ, جاڭا جۇمىس ورىندارىن تاۋىپ بەرەتىن پايدا كوزى بولادى. ەڭ باستىسى, ەلباسىمىزدىڭ تاپسىرماسىنىڭ اۋىل كورىنىسىن وزگەرتۋگە, مالمەن اينالىساتىن ازاماتتار وتباسىنىڭ تۇرمىسى مەن حال-احۋالدارىن كوتەرۋگە اسەرى مەن ىقپالىن ۋاقىت وزدىرماي دەر كەزىندە پايدالانۋ قاجەت. وكىنىشكە قاراي, وسى اۋقىمدى دا ماڭىزدى شارا ءالى دە بولسا باسقارۋ ورىندارىنىڭ نازارىنان تىس, كەنجە قالىپ جاتقانداي. حالىق تۇرمىسىن كوتەرۋ ءۇشىن ەڭ الدىمەن مال ءوسىرىپ, بورداقىلاپ ءجانە ونىڭ ونىمدەرىن وڭدەيتىن كاسىپكەرلەرگە قولايلى جاعداي جاسالۋى ءتيىس.
شۇكىرشىلىك, ەل پرەزيدەنتىنىڭ تاپىرماسى بويىنشا كاسىپكەرلەرگە ۇكىمەت تاراپىنان ءتيىستى كومەك كورسەتىلىپ, قامقورلىق جاسالۋدا. تاۋەلسىزدىكتىڭ باستاپقى كەزەڭىندەگىدەي ەمەس, قازىر كاسىپكەرلەرگە بەرىلەتىن نەسيەنىڭ ءتۇرى دە, كولەمى دە ءوسىپ, جەر الۋ, كاسىپورىن اشۋمەن بايلانىستى شارالاردى اتقارۋ تياناقتى ۇيىمداستىرىلعان. دەگەنمەن دە, كەشە عانا ىرگە كوتەرگەن, ەتەك-جەڭىن ءالى تولىق جيناپ ۇلگىرمەگەن, بەرەرىنەن الارى كوپ, كەلەشەگىنەن ءۇمىت قانا كۇتتىرەتىن ۇيىمدارعا قاراعاندا, كاسىپكەرلىكتە تاجىريبە جيناپ, ءوزىن-ءوزى تانىتا بىلگەن, ارىپتەستەرىنەن كوش ىلگەرى تۇرعان مەكەمەلەرگە ۇكىمەت تاراپىنان الار كومەگى مەن قولداۋى ەرەكشە دە وزگەشە بولۋى كەرەك. ۇكىمەت سەنىمىنە يە بولعان, ءار دەڭگەيدەگى بانكتەرگە تياناقتى ارىپتەس جانە وندىرگەن ونىمدەرى جۇرت كوڭىلىنەن شىققان كاسىپورىنداردى ەندىگى كەزەكتە شەت ەلدەردە ىرگە تىگىپ, تامىر جايۋىنا بيلىك تاراپىنان ناقتى قولداۋ قاجەت. سوندىقتان شەت جەردە ۇكىمەت پەن كاسىپكەرلەر ءبىر جەڭنەن قول, ءبىر جاعادان باس شىعارعاندا عانا ەلباسىمىزدىڭ تاپسىرماسىن ويداعىداي ىسكە اسىرامىز.
كەلەسى ءبىر قوبالجىتاتىن ءماسەلە – مەملەكەت باسشىسىنىڭ تاپسىرماسى بويىنشا بوي كوتەرىپ, جۇمىس ورنىن اشىپ, ءونىم شىعارا باستاعان جاڭا كاسىپورىنداردىڭ ەل تۇرمىسىنا تيگىزەر پايداسى مەن ىقپالىن بىلسەك تە, ءالى دە بولسا, ۇيىمداستىرۋعا ەنجار قاراپ كەلەمىز. كاسىپكەرلەردى اۋىلداعى ءار ءتۇرلى توي-تومالاققا, مۇگەدەك جاندارعا كومەككە قارجى بولۋگە نەمەسە جەم-ءشوپ, وتىن-سۋ بەرۋگە, ت.ب. قاجەتتى, بىراق ۇساق-تۇيەك شارۋالارعا عانا ۇيىمداستىرامىز. ال مال بورداقىلاۋ كاسىپورنى ورنالاسقان شالعايداعى اۋىلدا باسقا ءىستىڭ ءبارى تىندىرىلدى ما؟
قاي كەزدە بولسا دا ءار ءتۇرلى سەبەپتەرمەن اۋىلدا بالاباقشا, مەكتەپ, مادەنيەت وشاقتارى, تۇرمىستىق قىزمەت كورسەتۋ دەڭگەيى كوپتىڭ كوڭىلىنەن شىعا بەرمەيدى. سوندىقتان اۋدان, اۋىل اكىمدەرى وڭىردەگى ىرگە تىككەن ءىرى شارۋاشىلىقتان تۇسكەن پايدانى, اسىرەسە, قاتارداعى مامان مەن جۇمىسكەر بولىپ جۇرگەن جەرگىلىكتى ازاماتتاردىڭ ايلىق تابىستارىن اۋىل يگىلىگىنە جاراتۋ جاعىن قاراستىرىپ, شەشىم قابىلداۋدى ۋاقىتپەن ساناسپاي تەز اتقارۋلارى كەرەك. ول ءۇشىن ساپالى تاۋارلارعا تولى دۇكەندەر, اقىلى قىزمەت قورسەتەتىن مەكەمەلەر, ت.ب. ۇيىمدار قاجەت. ەڭ نەگىزى – باسى اشىلسا بولدى, سوڭىنان ءبىر-بىرىنە ىلەسىپ باسەكەلەسە وتىرىپ قالعاندارى دا جونگە تۇسە بەرەرى ءسوزسىز. مال بورداقىلايتىن الاڭدار مەن ەت وڭدەيتىن كاسىپورىندارعا ىرگەلەس اۋىلدارعا قازىردىڭ وزىندە باسقا ەلدى مەكەندەردەن ازاماتتار كوشىپ كەلىپ جاتىر. ولاردىڭ تۇرمىسىنا وڭتايلى جاعداي تۋعىزۋ – جەرگىلىكتى باسقارۋ ورىندارىنىڭ قۇزىرىنداعى شارا.
ەلباسىمىزدىڭ اسىل تۇقىمدى مال شارۋاشىلىعىن دامىتۋ, اۋىل تۇرمىسىن تۇبەگەيلى وزگەرتۋ, قازاقستاندىق ساپالى ونىمدەردى شەت ەلدەرگە شىعارۋ, جاڭا تەحنولوگيالاردى مەڭگەرۋ تۋرالى تاپسىرماسىن ورىنداۋدا كاسىپكەرلەر مەن جەرگىلىكتى بيلىك ورىندارى قويان-قولتىق ءىس اتقارۋى قاجەت. ءبىرى كاسىپورىن سالىپ, جاڭا جۇمىس ورىندارىن اشسا, ەكىنشىسى ولاردىڭ تۇرمىسىنا قولايلى جاعداي, جاقسى جول, اقىلى قىزمەت نىساندارىن ۇيىمداستىرۋى كەرەك.
تەك سوندا عانا العا قويعان ماقساتقا قول جەتكىزەمىز.
تولەگەن يبراەۆ, ءماجىلىس دەپۋتاتى.