سوڭعى ءۇش جىلدا قازاقستان الەمدىك جەمقورلىققا قارسى رەيتينگتە بىردەن 45-ءشى ورىنعا كوتەرىلىپ, جوعارى كورسەتكىشكە قول جەتكىزدى. جەمقورلىققا قارسى ارەكەت قازاقستاننىڭ دامۋ ستراتەگياسىنىڭ نەگىزگى تەتىگىنە اينالدى. سەبەبى, ەل پرەزيدەنتىنىڭ ءوزى بىرنەشە جىل بۇرىن جەمقورلىققا قارسى ىمىراسىز كۇرەس جاريالادى. سوندىقتان زاڭ, قۇقىق قورعاۋ ورگاندارى, قوعامدىق ۇيىمدار وسى باعىتتا جۇمىس جاساپ كەلەدى. سوعان قاراماستان, باسقا ەلدەر سياقتى قازاقستاندا دا جەمقورلىق ەڭ نەگىزگى پروبلەمالاردىڭ ءبىرى بولىپ وتىر. بۇل الەۋمەتتىك ىندەت شەتەلدىك ينۆەستورلار الدىندا مەملەكەتتىڭ بەدەلىن تومەندەتىپ, ساۋدا-ەكونوميكالىق بايلانىستاردىڭ دامۋىن باياۋلاتىپ, تىكەلەي جانە جاناما تۇردە ەكونوميكالىق شىعىندارعا الىپ كەلەدى.
كوپتەگەن زەرتتەۋلەردىڭ ناتيجەسى مەملەكەتتىك باسقارۋ نەعۇرلىم اشىق بولسا, ازاماتتىق قوعام بەلسەندى بولسا, جەمقورلىق دەڭگەيىنىڭ دە تومەندەيتىنىن كورسەتىپ بەرۋدە. سوندىقتان بۇل ارەكەتكە قوعامنىڭ, ءتىپتى ءاربىر ادامنىڭ توزىمسىزدىك كوزقاراسى كەرەك دەپ سانايدى نۇروتاندىقتار. سول ءۇشىن پارتيا جەمقورلىققا قارسى قوعامدىق قوزعالىس قۇرۋ تۋرالى باستاما كوتەردى. پارتيا توراعاسىنىڭ ءبىرىنشى ورىنباسارى نۇرلان نىعماتۋليننىڭ ايتۋىنشا, «بۇگىنگى بىرلەستىك – ول, ەڭ الدىمەن, ەلباسىمىز, پارتيامىزدىڭ ءتوراعاسى نۇرسۇلتان ءابىش ۇلى نازارباەۆتىڭ جەمقورلىقپەن كۇرەس تۋرالى تاپسىرماسىن ورىنداۋعا ەرەكشە كومەك بەرىپ, مەملەكەتىمىزدىڭ ەكونوميكاسىنىڭ ودان ءارى دامۋىنا ءوز ۇلەسىن قوساتىنى ءسوزسىز. سول ءۇشىن وسى باستاما ەلىمىزدىڭ بارلىق ايماقتارىندا جالعاسىن تاباتىن بولادى».
بۇل باستامانى قازىردىڭ وزىندە 3 مىڭنان استام زاڭدى تۇلعالار مۇددەسىن قورعايتىن ەلىمىزدەگى ءىرى ءارى بەدەلدى قوعامدىق ۇيىمدار قولداپ وتىر. ولار, كاسىپكەرلەر فورۋمى, ازاماتتىق اليانس, ارداگەرلەر ۇيىمى, كاسىپوداقتار فەدەراتسياسى, جاستار كونگرەسى مەن باس رەداكتورلار كلۋبى. ولاردىڭ بارلىعى بۇگىن ارىپتەستىك جانە ءوزارا ىنتىماقتاستىق تۋرالى مەموراندۋمعا قول قويدى. «بۇل – بۇكىل الەمدى جايلاعان دەرت. سوندىقتان ونىمەن كۇرەس ءبىر عانا ادامنىڭ, بولماسا تەك قانا مەملەكەتتىڭ جۇمىسى ەمەس, ونىمەن بارشا حالىق بولىپ كۇرەسۋىمىز كەرەك. جانە ول ءبىر كۇننىڭ شارۋاسى ەمەس. سوندىقتان وسى وتە ۇلكەن, اۋقىمدى شارۋانى بىرلەسىپ كوتەرەيىك, ەلىمىزدىڭ ودان ءارى دامۋىنا بىرلەسىپ اتسالىسايىق دەگەن ماقساتپەن «نۇر وتان» پارتياسى باستاماشى بولعان قوعامدىق قوزعالىسقا قولداۋ ءبىلدىرىپ, بىرلەسكەن مەموراندۋمعا قول قويىپ وتىرمىز», – دەيدى قازاقستان كاسىپوداقتارى فەدەراتسياسىنىڭ توراعاسى سيازبەك مۇقاشەۆ.
پارتيانىڭ تۇرعىندار اراسىندا ۇيىمداستىرعان «حالىقتىڭ داۋىسى» اكتسياسى كورسەتكەندەي, قازاقستاندىقتاردىڭ دەنىن جەمقورلىق جاعدايى الاڭداتادى. سوندىقتان نۇروتاندىقتار وسى جولدا كۇش بىرىكتىرەتىن كەز كەلدى دەپ ەسەپتەيدى. ونىڭ ۇستىنە تاۋەلسىزدىكتىڭ 20 جىلدىق مەرەيتويى ۇلكەن جاۋاپكەرشىلىك جۇكتەيدى. «قازاقستان جاستار كونگرەسى» زتۇ اتقارۋشى ديرەكتورى شاحماردان بايمانوۆ: «بۇگىنگى «نۇر وتان» پارتياسىنىڭ باستاماسىمەن قۇرىلىپ جاتقان قوعامدىق قوزعالىستىڭ باستى ماقساتى – جەمقورلىققا قارسى كۇش بىرىكتىرۋ. قازىرگى كەزدە پارا الاتىندار دا, پارا بەرەتىندەر دە ءبىزدىڭ ورتامىزدا ءجۇر. ءبىز ونداي ادامداردى قابىلداماي, وعان دەگەن جاستاردىڭ, جالپى قوعامنىڭ تەرىس كوزقاراسىن قالىپتاستىرۋىمىز كەرەك. سول ءۇشىن ەلىن, حالقىن ويلايتىن كەز كەلگەن ازامات وسى قوزعالىسقا قوسىلادى دەپ ويلايمىن», – دەپ ءوز ويىن ورتاعا سالدى.
جاڭا قۇرىلعان ۇيىم مۇشەلەرى ەڭ ءتيىمدى ءارى تاۋەلسىز تورەشى قوعامدىق باقىلاۋ دەپ سانايدى. سول ءۇشىن بەلسەندى تۇردە ءوز قاتارلارىن كوبەيتۋگە كۇش سالادى. بۇگىن باستالعان جۇمىس الداعى ۋاقىتتا بارلىق ايماقتاردا جالعاسىن تاۋىپ, جەمقورلىققا قارسى فورۋمدار وتەتىن بولادى.
«ەگەمەن-اقپارات».