كاپيتاليزمدى نەمەن اۋىستىرۋعا بولادى؟
وتكەن سەنبى, ءسىرا, تاريحتا قالاتىن شىعار. كاپيتاليزمگە الەۋمەتتىك قارسىلىق كۇنى رەتىندە, جاڭا ءبىر كۇرەستىڭ باسى رەتىندە اقپارات قۇرالدارىنىڭ حابارلاۋىنشا, قارسىلىق اكتسيالارىنا الەمنىڭ 82 ەلىندەگى 951 قالانىڭ تۇرعىندارى ءۇن قوسقان كورىنەدى.
تاريح كاپيتاليستىك جۇيەگە قارسى سوتسياليستىك رەۆوليۋتسيالاردىڭ بولعانىن, بەلگىلى ءبىر مەرزىمدە سول سوتسياليستىك جۇيەنىڭ ءومىر ءسۇرگەنىن دە بىلەدى. بىراق وتكەن سەنبىدەگى قارسىلىقتىڭ سيپاتى حح عاسىرداعى سوتسياليستىك رەۆوليۋتسيالاردىڭ سيپاتىنان مۇلدە ءوزگەشە. ەڭ باستى وزگەشەلىك – كاپيتاليستىك جۇيەدەگى بيلىككە جانە قارجىلىق الپاۋىتتارعا قارسى بوي كوتەرگەندەر سول حالىقتى س ۇلىكتەي سورعان جۇيەنى نەمەن الماستىرۋ كەرەك ەكەنىنە جاۋاپ تابا الماي وتىر.
ابدەن ءسىڭىرى شىعىپ كەدەيلەنگەن قاۋىمنىڭ شىلقا بايىعاندارعا قارسى الەۋمەتتىك كۇرەسىنىڭ قوزعاۋشى كۇشى ينتەرنەت بولعانىن دا ونىڭ باستى سيپاتى دەپ تۇجىرىمداسا ءجون شىعار. جوعارىدا اتالعان 951 قالانىڭ حالقىن ءبىر مەزگىلدە قارسىلىققا كوتەرگەن دە سول ينتەرنەتتىڭ الەۋمەتتىك جۇيەسىنىڭ حابارلاردى جان-جاقتى تاراتۋىنىڭ ارقاسىندا مۇمكىن بولدى. بۇل قارسىلاستار قاتارىن كوبەيتىپ قانا قويعان جوق, وعان بەلگىلى تۇلعالاردى دا تارتتى.
بۇل رەتتە جۇرت الدىمەن اقش-تىڭ بۇرىنعى ۆيتسە-پرەزيدەنتى, نوبەل سىيلىعىنىڭ لاۋرەاتى البەرت گوردى اۋىزعا الادى. ول قارسىلاستار قوزعالىسى امەريكالىق ەكونوميكالىق جۇيەنىڭ كەمشىلىكتەرىن كورسەتتى دەپ مالىمدەدى. ال اتاقتى ميللياردەر ۋوررەن باففەتتىڭ بالاسى گوۆاردتىڭ قارجى الپاۋىتتارىنىڭ بۇقارا حالىقتى الداپ كەلگەنى تۋرالى ايتقاندارى اجەپتاۋىر اسەرلى ەستىلدى. سول الپاۋىتتاردىڭ وكىلى سولاي دەسە, جۇرتشىلىق ونى بىلگەن سوڭ ايتادى دەپ قابىلدايتىنى بەلگىلى.
قازان ايىنىڭ تۋرا ورتاسىندا وتكەن بۇل كاپيتاليستىك جۇيە بيلىگىنە, قارجىلىق الپاۋىتتارعا قارسى قوزعالىس «اشۋ-ىزا كۇنى» دەپ اتالدى. كوتەرىلگەندەر ەڭ الدىمەن بيرجا ورتالىقتارىنا «شابۋىل» جاسادى. بۇل «شابۋىل» ءسوز جۇزىندەگى ارەكەت قانا ەدى. «ۋولل-ءستريتتى باسىپ ال!» اكتسياسى نيۋ-يورك ورتالىعىنداعى شەرۋمەن شەكتەلدى. ال لوندون بيرجاسىنا «شابۋىل» جاساعان بەس مىڭداي شەرۋشىلەردى پوليتسيا وپ-وڭاي قۋىپ جىبەرگەن سوڭ, ولار قالانىڭ ءبىر سكۆەرىندە شايلالارىن تىكتى. وزدەرىنىڭ مالىمدەۋىنشە, ولار ۇكىمەت باسشىسى دەۆيد كەمەرون قىزمەتتەن كەتكەنشە سوندا قالا بەرمەك كورىنەدى.
دەگەندە, «كاپيتاليزمگە قارسىلار» قاتارى الەمدىك-ەكونوميكالىق داعدارىستان جاپا شەككەن ەۋروپا ەلدەرىندە قالىڭ بولدى. ايتالىق, يسپانيانىڭ 71 قالاسىندا تۇرعىندار بيلىككە قارسى «اشۋ-ىزاسىن» بىلدىرگەن. بارسەلونادا 400 مىڭ, مادريدتە 500 مىڭ ادام كوشەگە شىققان جانە شەرۋلەرىن, ميتينگتەرىن ۇيىمشىلدىقپەن وتكىزگەن. ال يتاليانىڭ استاناسىندا كوشەگە شىققاندار بۇلاردان ازداۋ بولعانمەن, ارەكەتتەرى بەلسەندىرەك بولىپتى. 150 مىڭ ريمدىكتەردىڭ اراسىنا كىرگەن 400-دەي اسىرەراديكالدار الدىمەن قورعانىس مينيسترلىگىنىڭ عيماراتىنا وت قويىپ, ونان سوڭ دۇكەندەردى قيراتىپ, اۆتوكولىكتەردى ورتەگەن. 70 ادام جارالانىپتى. قيراعان, ب ۇلىنگەن دۇنيەنىڭ مولشەرى ءالى انىقتالىپ جاتىر.
يزرايل كاپرالى مىڭ ارابقا بالاندى
بەس جىل بويى پالەستينالىقتاردىڭ تۇرمەسىندە جاتقان يزرايل اسكەريى گيلاد شاليت ۇزاق كەلىسسوزدەن كەيىن ەلىنە قايتارىلدى. وعان جاۋاپ رەتىندە يزرايل تۇرمەسىنەن مىڭنان استام پالەستينالىق جاساقشىلار دا وتانىنا ورالماق.
بۇل تۋرالى گازەتىمىزدە بۇرىن حابار شىقسا دا, وقيعانىڭ استارىنا ءۇڭىلۋدى ءجون كوردىك. ەڭ الدىمەن, وسى وقيعانىڭ جۇزەگە اسقانى ەكى جاق اراسىنداعى قارىم-قاتىناستا جاڭا ءبىر بەت-بۇرىستى اڭعارتادى. بۇعان جاقىنداعى بۇۇ باس اسسامبلەياسىندا پالەستينا مەملەكەتتىگىن تانۋ ماسەلەسىنىڭ تالقىلانعانى دا اسەر ەتكەنى انىق.
ءيا, يزرايل قورعانىس اسكەرى كاپرالىنىڭ بوساتىلۋى ءۇلكەن حالىقارالىق وقيعاعا اينالىپ, الەمنىڭ تەلەارنالارى سوڭعى كۇندەرى ءوز حابارلارىن وسى وقيعانى كورسەتۋدەن باستاپ ءجۇردى. گيلاد ءشاليتتىڭ الدىنان يزرايل ۇكىمەتىنىڭ باسشىسى بەنيامين نەتانياحۋ شىعىپ, قارسى الدى. بۇكىل ەل جالاۋلاتىپ-كەرنەيلەتىپ, بەينە سول قاتارداعى جاۋىنگەر جاۋدى جاپىرىپ كەلگەندەي قۇرمەت كورسەتىلدى.
ارابتار گيلاد شاليت ءۇشىن كوپ نارسە سۇرادى. تۇرمەدە جاتقان بارلىق جاساقشىلاردى بوساتىڭدار دەپ تالاپ ەتتى. باسقا باس ەسەبىن ولار اۋىزعا دا العان جوق. ال يزرايل ۇكىمەتى ءوز ادامىن قالاي دا بوساتۋ جولىن ىزدەدى. ءتىپتى, سول ءۇشىن گازا سەكتورىنا شابۋىل دا جاسادى. بىراق بۇل جولدىڭ جاقسىلىققا اپارمايتىنىنا, جەمە-جەمگە كەلگەندە, ارابتار ءشاليتتى ءولتىرۋى دە مۇمكىن ەكەنىنە كوزدەرى جەتكەن سوڭ, كەلىسىم جولىنا توقتادى. اقىرى كاپرالدى بوساتۋ ءۇشىن ولار 1027 پالەستينا جاساقشىسىن قايتارۋعا ۋادە بەردى.
مۇنى ەكى جاق تا وزدەرىنشە جەڭىسكە سانايدى. يزرايل ءوز ازاماتىن بوساتۋ ءۇشىن قانداي دا قۇن تولەۋدەن باس تارتپايتىن بيىك ماقساتتى ەل ەكەنىن دالەلدەدى. ال مىڭنان اسا وتانداستارىنىڭ ەلگە ورالاتىنى پالەستينالىقتار ءۇشىن شىن مانىندە جەڭىس تە, شەكسىز قۋانىش تا ەدى. ەشقانداي سوعىسپەن مۇنداي ناتيجەگە جەتە الماس ەدى. كەلىسىم بويىنشا العاشقى كەزەكتە 477 ادام, ونىڭ 27-ءسى ايەل, پالەستيناعا ورالسا, قالعان 550 ادام كەلەسى ايدا ەلىنە قايتادى.
دەگەندە, يزرايل قاۋىمىندا بۇل وقيعاعا باعا ءارتۇرلى بولىپ وتىر. قۋانعاندار كوپ. بىراق ەڭ الدىمەن ەكسترەميستەردىڭ قۇربانى بولعانداردىڭ «الماگور» اسسوتسياتسياسى شاليتكە كوپ «قۇن» تولەنگەنىن ايىپتايدى. ونىڭ ۇستىنە 1100 پالەستينالىق بەلسەندى ەكسترەميستەردىڭ بوساتىلۋى جاعدايدى قيىنداتا تۇسەدى دەگەندى ايتادى. سونداي-اق, ەندى پالەستينالىق ەكسترەميستەر الدا تاعى دا ساۋداعا سالۋ ءۇشىن ادام ۇرلاۋدى كۇشەيتەتىن بولادى دەگەن كۇدىكتى العا توسادى.
قالاي بولعاندا دا, كەلىسىمگە قول جەتىپ, تۇتقىنداردىڭ الماسۋى ەكى جاقتى قارىم-قاتىناستاعى جاقسىلىقتىڭ نىشانى ەكەنىن ايتقان ءجون.
ماماديار جاقىپ.