مەرەيتويلى جىلدىڭ مەجەسى بيىك

«قارۋلى كۇشتەردىڭ 25 جى­ل­دىعىنا – جوعارى جاۋ­­ىن­گەرلىك داي­ىندىق!» ۇرا­نىمەن اعىمداعى وقۋ جى­لى تاك­تي­كا­لىق وقۋ-جات­­­تىعۋلارىنا, ءار­تۇرلى بولىمدەر مەن بولىم­شە­لەر­دىڭ حالىقارا­­­لىق سايىس­تا­رىنا جانە توسىننان جۇر­­گى­زىل­گەن تەكسەرۋلەر كە­زە­ڭىنە تو­لى بولدى.

سونىمەن, جاۋىنگەرلىك ازىرلىكتى ارتتىرۋ بويىنشا وتكىزىلىپ جاتقان ءىس-شارالار شەڭبەرىندە قورعانىس ءمينيسترى گەنەرال-پولكوۆنيك ساكەن جاسۇزاقوۆتىڭ بۇيرىعى بويىنشا قازاقستان رەسپۋبليكاسىنىڭ قارۋلى كۇشتەرىندە جەدەل-ستراتەگيالىق وقۋ-جاتتىعۋ باس­تالدى. وعان 10 مىڭعا جۋىق اسكەري قىز­مەت­شى, 1500 بىرلىكتەن اسا جاۋىنگەرلىك تەحنيكا, 40-تان استام ۇشاق پەن تىكۇشاق, سونداي-اق اس­كەري-تەڭىز كۇشتەرىنىڭ 5 كورابلى قاتىسۋدا. تەحنيكا مەن قارۋ-جاراقتىڭ ءبىر ۋاقىتتا شى­عۋى­مەن مۇنداي اۋقىمدى ءىس-شارالار بيىلعى جى­لى العاش رەت وتكىزىلىپ وتىر. 

وتكىزىلىپ جاتقان ساباقتاردىڭ باستى ماق­ساتى اسكەرلەردىڭ جاۋىنگەرلىك ازىرلىگىن جا­نە بەلگىلەنگەن مەرزىمدە تاپسىرمالاردى ورىنداۋ قابى­لەت­تىلىگىن تەكسەرۋ بولىپ تابىلادى. «قاراتاۋ – 2017» وقۋ-جاتتىعۋىنا جەتەكشىلىك ەتۋ قور­عانىس ءمينيسترىنىڭ ءبىرىنشى ورىنباسارى – قا­رۋلى كۇشتەر باس شتابىنىڭ باسشىسى گەنەرال-لەيتەنانت مۇرات مايكەەۆكە تاپسىرىلدى. اسكەرلەردىڭ شوعىرلانۋ اۋداندارىنا كەنەتتەن جىلجۋى, جاۋىنگەرلىك قولدانۋدىڭ بەيتانىس اۋداندارىنا بىرنەشە جۇزدەگەن شاقىرىمعا مارش جاساۋى, شارتتى داعدارىس اۋدانىندا اۋە دەسانتىن ءتۇسىرۋ قارۋلى كۇشتەر وڭىرلىك قول­باسشىلىقتارىنىڭ اسكەري پوليگوندارىن­دا وتەتىن «قاراتاۋ – 2017» جەدەل-سترا­تەگيالىق وقۋ-جاتتىعۋىنىڭ نەگىزگى كەزەڭ­دە­رى بولىپ تابىلادى. وقۋ-جاتتىعۋدىڭ بارىسى مەن پرو­تسە­سىن باس شتابتىڭ جەدەل توپتارى باعا­لاي­تىن بو­لادى. 

العاشقى كۇندە بارلىق تۇرلەر مەن اسكەر تەكتەرى اسكەري بولىمدەرى مەن قۇرامالارىنىڭ جەكە قۇرامى جاۋىنگەرلىك ازىرلىكتىڭ جوعارى دەڭ­گەيىنە كەلتىرىلدى. اسكەري باسقارۋ ورگاندارى جاۋىنگەرلىك ازىرلىككە كەلتىرىلگەننەن كەيىن وقۋ-جاۋىنگەرلىك تاپسىرمالاردى الىپ, بەل­گىلەنگەن اۋدانداردا بولىمشەلەردى جەدەل الماس­تىرۋعا كىرىستى. اتالعان كەزەڭدە كۇردەلى جە­دەل-تاكتيكالىق جاعداي قاراستىرىلعان. ول بوي­ىنشا قولباسشىلارعا اناعۇرلىم ماق­سات­قا ساي شەشىم قابىلداۋعا, ال بولىمدەر مەن بو­لىم­شە­لەرگە ۇرىس الاڭىندا شارتتى قار­سى­لاسقا شە­بەر تۇردە قارسى تۇرۋ قاجەت.  داعدارىس اۋداندارىنا ىرگەلەس جاتقان اۋماقتاردا اسكەرلەردىڭ ءىس-قيمىلدارىن ءبىر ۋاقىتتا قامتاماسىز ەتۋ ءۇشىن سانى 200 ادامنان اساتىن تاكتيكالىق اۋە دەسانتى ءتۇسىرىلدى. ءساتتى تۇسىرۋدەن كەيىن دەسانتتىق-شابۋىلداۋ باتالونى الدىڭعى پوزيتسياعا ورنىعىپ, موتواتقىش جانە تانك بولىمشەلەرىن ءارى قاراي ورىستەتۋ ءۇشىن جەردى باقىلاۋدى جۇزەگە اسىرادى. 

وقۋ-جاتتىعۋ باستالىسىمەن اسكەرلەردى باس­قارۋ دالالىق باسقارۋ پۋنكتتەرىنەن جۇرگىزىلىپ جات­قانىن ايتا كەتۋ قاجەت. بۇگىنگى تاڭداعى باس­­قارۋ پۋنكتتەرى بارلىق قاجەتتى بايلانىس تۇر­لەرىمەن جابدىقتالعان. بۇركەمەلەۋ مەن قور­عالۋدىڭ جەتكىلىكتى دەڭگەيىنە يە. بۇل ۇزاق ۋاقىت بويى اۆتونومدىق جۇمىستى جۇرگىزۋگە مۇمكىندىك بەرەدى. 

وقۋ-جاتتىعۋدىڭ جەتەكشىسى گەنەرال-لەيتەنانت مۇرات مايكەەۆ اتاپ وتكەندەي, اتالعان وقۋ-جاتتىعۋدىڭ ەرەكشەلىكتەرى 4 باعىتتا, ءبىر ۋا­قىتتا اسكەرلەردىڭ ءىرى توپتاماسىن باسقارۋ, قارۋلى كۇشتەردىڭ بارلىق تۇرلەرىنىڭ, اسكەر تەكتەرى, جاۋىنگەرلىك جانە ماتەريالدىق-تەح­ني­كا­لىق قامتاماسىز ەتۋ بولىمدەرىنىڭ ءوزارا ءىس-قيمىلى, سونداي-اق اسكەري بارلاۋ كۇشتەرى مەن قۇرالدارىنىڭ مۇمكىندىكتەرىن تەكسەرۋ بو­لىپ تابىلادى. 

«قاراتاۋ – 2017» جەدەل-ستراتەگيالىق وقۋ-جاتتىعۋى قارۋلى كۇشتەردى قولدانۋدا جاڭا كوزقاراستاردىڭ تيىمدىلىگىن تۇبەگەيلى تەك­سەرۋگە, جالپى العاندا, قازاقستان ارمياسى بولىمشەلەرىنىڭ جاۋىنگەرلىك ازىرلىگى مەن جاۋ­ىن­گەرلىك قابىلەتتىلىگىن باعالاۋعا جانە ۇلتتىق قور­عانىستى ءارى قاراي جەتىلدىرۋ جوس­پارلارىن اي­قىنداۋعا مۇمكىندىك بەرەدى. 

اسكەري ۆەدومستۆو باسشىسى بيىلعى جى­لى «قارۋلى كۇشتەردىڭ 25 جىلدىعىنا – جوعا­رى جاۋىنگەرلىك دايىندىق!» ۇرانى تولىق كو­لەم­دە ورىندالاتىنىنا جانە وقۋ جىلىن اس­كەر­لەر جاۋىنگەرلىك دايارلىقتىڭ ساپالى جاڭا كور­سەتكىشتەرىمەن اياقتايتىندارىنا سەنىم بىلدىرەدى. 

نۇرلىبەك دوسىباي,

«ەگەمەن قازاقستان»