«استانا» فۋتبول كلۋبىنىڭ باس باپكەرى ستانيمير ستويلوۆ ەۋروپا ليگاسىنىڭ توپتىق كەزەڭىندە يسپانيانىڭ «ۆيلياررەالىنا» قارسى ويىن جايلى وي ءبولىستى. ول ماتچ الدىنداعى ءباسپاسوز كونفەرەنتسياسىندا باق وكىلدەرىنىڭ سۇراقتارىنا جاۋاپ بەرىپ, كوماندادان قانداي ناتيجە كۇتەتىنىن مالىمدەدى.
– «استانانىڭ» «ۆيلياررەالعا» قايتا ورالعانىنا قۋانىشتىمىن. ەكى كوماندا اراسىنداعى بىرنەشە جىل بۇرىنعى وتكەن كەزدەسۋدەن كەيىن ەلوردالىق كوماندا ءتيىستى قورىتىندى شىعارا الدى. ءوز باسىم «ۆيلياررەالدى» بىزگە ەۋروپاعا جول باستاپ بەرگەن كوماندا دەپ اتار ەدىم. ەرتەڭگى ماتچتا ءوز ويىنىمىزدى كورسەتىپ, لايىقتى ناتيجەگە جەتۋگە تىرىسامىز. «ۆيلياررەال» يسپانيانىڭ سوڭعى جىلدارداعى ۇزدىك كوماندالارىنىڭ ءبىرى. دەگەنمەن, «استانا» ەشكىمنەن قورىقپايدى دەپ سەنىمدى تۇردە ايتا الامىن.
– ستانيمير, قپل-دا وتكەن «استانا»-«اتىراۋ» ويىنىنان كەيىن كابانانگانىڭ يسپانياعا بارمايتىنىن ايتقان ەدىڭىز. قازىر كابانانگانىڭ كەلمەۋىن قازاقستاننىڭ دا, يسپانيانىڭ دا تىلشىلەرى تالقىلاپ جاتىر. ال كونگولىق ويىنشى ينستاگرامىندا وسى وقيعا تۋرالى پىكىرىن بىلدىرگەن بولاتىن. بۇل تۋرالى نە ايتاسىز؟
– بۇل ماسەلەنى مەن استانادا شەشتىم دەگەن ويدامىن. ماعان «استانا» ءۇشىن بارىن سالاتىن ويىنشىلار كەرەك. ال كومانداعا جەڭىسكە جەتۋ ءۇشىن كومەكتەسەتىن ويىنشىلار قاجەت. ينستاگرامداعى جازعاندارىن وقىپ, جىلاۋعا ءسال-اق قالدىم. الايدا, ونىڭ جازعاندارىنان كەيىن ويىم وزگەرەدى دەي المايمىن. تاعى دا ايتايىن ماعان كوماندامەن بىرگە بولاتىن ويىنشىلار كەرەك.
– «استانا» بىرنەشە جىل بۇرىن «ۆيلياررەالمەن» كەزدەسىپ, ەسە جىبەرگەن بولاتىن. ول ءسىزدىڭ كوماندا تىزگىنىن العاش ۇستاعان كەزدەرىڭىز ەدى. ودان كەيىن ءۇش جىل ۋاقىت ءوتتى. «استانا» ءۇشىنشى جىل قاتارىنان ەۋروكۋبوكتاردا ونەر كورسەتىپ كەلەدى. وسى ۋاقىت ارالىعىندا كوماندا قانشالىقتى وزگەردى؟ ال «ۆيلياررەال» تۋرالى نە ايتاسىز؟
– «استانا» سوڭعى ءۇش جىلدا بارلىق جاعىنان ىلگەرى جىلجىدى دەپ سەنىممەن ايتا الامىن. مەنىڭ ويىنشىلارىم وتە جوعارى دەڭگەيدە ونەر كورسەتىپ كەلەدى. وزدەرىنە دەگەن سەنىمدەرى دە ارتا ءتۇستى. ال «ۆيلياررەال» يسپانيانىڭ ۇزدىك بەس كومانداسىنىڭ تىزىمىنە ءىلىنىپ كەلەدى. العاشقى ءتورت ورىندا «بارسەلونا», «رەال», «اتلەتيكو» جانە سەۆيليا سياقتى كوماندالار بار. وسىنداي ۇزدىكتەر جينالعاندىقتان لا ليگادا چەمپيون اتانۋ وڭاي ەمەس. ال «ۆيلياررەالدىڭ» يسپانيانىڭ ۇزدىك بەستىگىنە ەنۋى ۇلكەن جەتىستىك دەپ بىلەمىن.
– «ۆيلياررەالدىڭ» باس باپكەرى ويىن الدىنداعى ءباسپاسوز جيىنىندا بىرنەشە ويىنشىنىڭ جاراقات الىپ, «استاناعا» قارسى كەزدەسۋدە ۇپاي جوعالتۋى مۇمكىن ەكەندىگىن ايتتى. بۇنى بىزگە بەرىلگەن ءبىر جەڭىلدىك دەپ قاراستىرۋعا بولا ما؟
– «ۆيلياررەالدىڭ» چەمپيوناتتاعى العاشقى كەزدەسۋلەرىن كورىپ شىقتىم. شىنىن ايتسام, وسال ەمەستىگىن بايقادىم. فۋتبولدا جەڭىس پەن جەڭىلىس قاتار جۇرەدى. سوندىقتان, ولاردىڭ ەكى ويىنداعى جەڭىلىسىنەن ۇلكەن پروبلەما كوتەرۋدىڭ ەش قيسىنى جوق. «ۆيلياررەال» قۇرامىندا قيىندىقتار بولسا, ول جاعداي بىزدە جوق ەمەس, قايتا ەكى ەسە قيىن دەۋگە بولادى. بىزگە قازىر ءوز ويىنىمىز تۋرالى ويلانۋىمىز كەرەك. وسىعان دەيىنگى كورسەتىپ جۇرگەن ويىنىمىزدان جاڭىلىپ قالماي, ءوز دەڭگەيىمىزدى كورسەتۋىمىز قاجەت. شابۋىل مەن قورعانىسقا بىردەي جۇمىلۋىمىز كەرەك. سوندا كۇتكەن ناتيجەمىزگە دە قول جەتكىزەمىز.
– قازاقستان قۇراماسى الەم چەمپيوناتىڭ ىرىكتەۋ كەزەڭى اياسىندا وتكىزگەن ەكى كەزدەسۋدە ءساتسىز ويىن كورسەتتى. «استانا» قازاقستاننىڭ نامىسىن ەۋروپادا لايىقتى دارەجەدە قورعاپ جۇرگەن جالعىز كوماندا. بۇل سىزدەرگە قوسىمشا قىسىم بولا ما؟
– مەن ەڭ ءبىرىنشى ءوز كومانداما جاۋاپتى بەرۋىم كەرەك. ەشكىم جەڭىلگەندى قالامايدى. مەنىڭ ويىنشىلارىم ەرتەڭ الاڭدا وزدەرىنە ءتان ويىن ۇلگىسىن كورسەتەدى دەگەن سەنىمدەمىن. ولارعا تولىقتاي سەنىم ارتامىن. ماتچ تاعدىرىن ءبىر-ەكى ويىنشى شەشپەيدى, كوماندالىق ويىن ماڭىزدىراق. ال كابانانگانىڭ استانادا قالعانى ەرتەڭگى ويىنعا تىكەلەي اسەر ەتەدى دەي المايمىن.
– قازاقستان قۇراماسىندا وينايتىن «استانا» ويىنشىلارى وتكەن ەكى ماتچتاعى ساتسىزدىكتەن كەيىن كوڭىل-كۇيلەرى تۇسكەنى انىق. وسى ورايدا, كوماندانىڭ بىرقاتار ويىنشىلارىن ەرتەڭگى ويىنعا پسيحولوگيالىق تۇرعىدا دايىنداۋ قانشالىقتى قيىن بولدى؟
– مەنىڭ قاراماعىمداعى جىگىتتەر – كاسىبي دەڭگەيدەگى فۋتبولشىلار. «اتىراۋعا» قارسى ويىندا وزدەرىن دالەلدى. سوندىقتان ەرتەڭگى كەزدەسۋدە كاسىبيلىكتەرىن ءوز ويىندارىمەن دالەلدەيدى دەگەن سەنىمدەمىن.
ايان ءابدۋالي, «ەگەمەن قازاقستان»