بيىلعى وقۋ جىلىنان باستاپ قازاقستان رەسپۋبليكاسى ۇلتتىق ۇلانىندا جاڭا جوبا قولعا الىندى. جاستاردى ەلدىككە تاربيەلەيتىن پاتريوتتىق ءىس- شارا «ەلباسى ساباقتارى» دەپ اتالادى.
اتالعان ساباقتار قۇقىقتىق ءتارتىپ اسكەرلەرىنىڭ رەسپۋبليكاداعى بارلىق قۇرىلىمدىق اسكەري بولىمدەرىندە وتكىزىلەتىن بولادى. اسكەرگە رۋح بەرۋشى تاربيەشى وفيتسەرلەر وتان كۇزەتىندە جۇرگەن جاۋىنگەرلەرگە, جالپى اسكەري ۇجىمنىڭ ءار مۇشەسىنە قازاقستان رەسپۋبليكاسىنىڭ تۇڭعىش پرەزيدەنتى, ەلباسى نۇرسۇلتان ءابىش ۇلى نازارباەۆتىڭ سىندارلى ساياساتى مەن تاۋەلسىزدىك جىلدارى ەلىمىزدىڭ جەتكەن جەتىستىكتەرى جايلى كەڭ تۇرعىدا ءتۇسىندىرىپ, تاربيە ساعاتى رەتىندە ءدارىس وتكىزەدى.
ەلباسى ساباقتارى ءار ءتۇرلى تاقىرىپتاردى قامتىعان. ماسەلەن, «ەلباسىنىڭ وتان جايلى ايتقاندارى», «ەلباسىنىڭ حالىقتار دوستىعى مەن بىرلىگى جايلى ۇلاعاتتارى», «ەلباسىنىڭ وتباسى جايلى ايتقاندارى», «ەلباسىنىڭ ەل تاريحى جايلى ايتقاندارى», «ەلباسىنىڭ ۇلتتىق قاۋىپسىزدىك جايلى بايلامدارى» جانە تاعى باسقا پرەزيدەنتىمىزدىڭ اسا وزەكتى تولعام-ويلارى جاۋىنگەرلىك ۇجىم مۇشەلەرىنىڭ رۋحىن كوتەرۋ مەن شىڭداۋعا جولباسشى تاربيە وزەگى رەتىندە الىنعان.
العاشقى ساباق الماتى قالاسىنداعى ۇلتتىق ۇلاننىڭ «وڭتۇستىك» وڭىرلىك قولباسشىلىعىندا تاربيەشى وفيتسەرلەرمەن جانە اسكەري قوعامدىق ۇيىمداردىڭ وكىلدەرىمەن وتكىزىلدى. شىمىلدىق اشار ساباقتىڭ تاقىرىبى: «ەلباسىنىڭ ءتىل تۋرالى جانە ۇلتتىق كود جايلى ايتقان تولعامدارى» دەپ اتالدى. ساباق بارىسىندا قازاق ءتىلىنىڭ لاتىن الىپبيىنە اۋىسۋ ماسەلەلەرى, ەلىمىزدەگى ۇشتىلدىلىك ساياساتى مەن قازاق ءتىلىنىڭ ۇلتتىق كودى مەن قازاق حالقىنىڭ مادەنيەتىن ساقتاۋداعى ايرىقشا ءرولى كەڭىنەن ايتىلدى. سونداي-اق, شارا بارىسىندا ەلباسىنىڭ مەملەكەتتىك ءتىل جانە شەت تىلدەر جايلى ايتقان وي-تولعامدارى باسىلعان بەينە-اۋديو جازبالار تىڭدارمان نازارىنا ۇسىنىلدى.
– ەلباسى حالقىمىزدىڭ ارقا سۇيەر الىپ تۇلعاسى, تاۋ تۇعىرى. نۇرسۇلتان ءابىش ۇلى نازارباەۆتىڭ وسى ۋاقىتقا دەيىنگى اتقارىپ جاتقان تولاعاي ىستەرىنە بارشامىز كۋاگەرمىز. حالقىن شەكسىز ءسۇيىپ, ەلىنىڭ ءبىر قاجەتىنە جاراسام دەپ تىنىم تاپپاي جۇرگەن ءوز ۇلتىنىڭ اسىل پەرزەنتى, ەلباسىمىزدىڭ ارقاسىندا شيرەك عاسىر ۋاقىتىنىڭ ىشىندە ەلىمىز جارقىن دامۋ جولىنان ءوتتى. كەزىندە ارمان بولعان يگى ىستەرىمىز جۇزەگە اسىپ وتىر. قازاق حالقى وزگە ەلدەرمەن تەرەزەسى تەڭ, كەرەگەسى كەڭ تۇرعىدا دامىپ, وركەندەپ كەلەدى. بۇل ەلدىڭ ماڭدايىنا بىتكەن باق. ەلباسىنىڭ وسى ۋاقىتقا دەيىن ايتىپ كەلە جاتقان وي-تولعامدارى ۇلكەن تاربيەلىك مانگە يە. وزدەرىڭىز بىلەتىندەي, تۇڭعىش پرەزيدەنتىمىز الۋان تاقىرىپتاردا ءار جيىن, كەڭەستەردە, ءوزىنىڭ جازعان كىتاپتارىندا, ماقالالارىندا ۇلكەن كەلەلى ويلار, ەلىمىزدى جارقىن بولاشاققا باستار باعدارلاردى كورسەتىپ كەلەدى. ماسەلەن, ءتىل, شەكارا, ۇلتتىق قاۋىپسىزدىك, يادرولىق قارۋلانۋدىڭ ادامزاتقا قاتەرى, ۇلتارالىق دوستىق, وتان, تۋعان جەر, ۇلت, تاعى دا كوپتەگەن تاقىرىپتاردا ايتقان ويلارى جەكە ازاماتتى دا, ۇجىمداردى دا تاربيەلەۋگە پايدالانىلار تۇنىپ تۇرعان قاينار كوز. مىنە, ءبىز وسىنى ەسكەرىپ, ەندىگى كەزەكتە ەلباسىنىڭ سوزدەرىن دايەككە الا وتىرىپ, جەكە قۇرامدى تاربيەلەمەكپىز. ەلباسىنىڭ ايتقان ءار تاقىرىپتاعى ويلارى ءبىر, ءبىر ساعات بولىپ جىكتەلىپ, ماماندارىمىزبەن مۇراعاتتان الىنعان بەينەجازبالارىمەن دايەكتەلىپ, جەكە قۇرامعا ۇسىنىلاتىن بولادى – دەيدى «وڭتۇستىك» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پولكوۆنيك سابىرجان سۇلەيمەنوۆ.
جوبانى ۇيىمداستىرۋشىلار, تاربيەلىك-تانىمدىق ساباقتاردىڭ باستى ماقساتى – وتان قورعاۋشىلاردى ەلدى سۇيۋگە, حالىققا, ەلباسىنا قالتقىسىز قىزمەت ەتۋگە تاربيەلەۋ, اسكەري قىزمەتشىلەردىڭ قوعامدىق-ازاماتتىق ومىرگە بەلسەندى ارالاسۋىنا سەپتەسۋ, تۇلعالار بويىندا شەشەندىك ونەردى دامىتۋ ەكەنىن ايتادى.
ارمان وكتيابر,
«ەگەمەن قازاقستان»