مانۋ تريگەروس: «استانا» كومانداسى سوڭعى ءۇش جىلدا قاتتى وزگەردى

- «استانا» وسىعان دەيىن «ۆيلياررەالمەن» كەزدەستى. ءسىزدىڭ ويىڭىزشا, قازاقستاندىقتار وسى ۋاقىت ارالىعىندا كۇشەيە ءتۇستى مە؟

- ءۇش جىل بۇرىن ءدال وسى «استاناعا» قارسى ويناعان بولاتىنمىن. ءيا, قازاقستاندىقتار وسى ۋاقىت ارالىعىندا كۇشەيە ءتۇسىپ, ەۋروپالىق دەڭگەيگە جەتتى دەپ ويلايمىن. سەبەبى, چەمپيوندار ليگاسى مەن ەۋروپا ليگاسىنىڭ توپتىق كەزەڭىندە ونەر كورسەتىپ ۇلگەردى.

- «ۆيلياررەال» ماۋسىمدى ءساتسىز باستادى. سوندىقتان جانكۇيەرلەردىڭ ەندىگى تەك جەڭىستەردى كۇتەتىنى بەلگىلى. بۇل سىزدەرگە قيىندىق تۋدىرماي ما؟

- سوڭعى ويىندا «بەتيستى» جەڭگەن بولاتىنبىز. ولاردىڭ مۇنداي تالابى ورىندى, سوندىقتان «استانانى» جەڭۋىمىز كەرەك. سەبەبى, ءوز جانكۇيەرلەرىمىزدىڭ الدىندا ونەر كورسەتەمىز. ءتيىستى ناتيجەگە جەتۋ ءۇشىن ايانىپ قالمايتىنىمىز انىق.

- سوڭعى ماۋسىمداردا ەۋروكۋبوكتىق ويىنداردا جولدارىڭىز بولماي ءجۇر. ال ەرتەڭگى ماتچ...

- شىنى كەرەك, سوڭعى جىلدارى ەۋروپاداعى جەڭىستەرىمىز وڭاي بولماي ءجۇر. ەرتەڭگى ويىن دا بىزگە جەڭىل بولمايتىنى بەلگىلى. بىراق جەڭىسكە جەتكىمىز كەلەدى. وسى ماقساتىمىزعا جەتۋ ءۇشىن بارىمىزدى سالامىز.

- ەرتەڭگى ويىن سىزدەر ءۇشىن ويداعىداي اياقتالار بولسا...

- ارينە, جەڭىستەن ءبارىمىز ءۇمىتتىمىز. بىراق بۇل ناتيجەنىڭ كىمگە دە بولسىن وڭاي كەلمەسى انىق. بىراق ءوز الاڭىمىزدا ويناۋ, جانكۇيەرىمىزدىڭ قولداۋى بىزگە كومەك بولماق. ەرتەڭ شابۋىلعا نەعۇرلىم كوبىرەك كوڭىل ءبولۋىمىز كەرەك.

- «استانا» ساپىنان كىمدى ەرەكشە اتاپ وتەر ەدىڭىز؟

- شىنىمدى ايتسام, «استانانىڭ» ويىنشىلارى جايلى كوپ بىلمەيمىن. ەرتەڭ الاڭعا شىققاننان كەيىن ءبارى بەلگىلى بولادى. سول كەزدە كىمگە قارسى ويناۋ قيىن بولاتىنىن بىلەتىن بولامىن. ال ءوزىم كومانداما كومەكتەسۋ ءۇشىن بارىمدى سالارىم انىق.

- «ۆيلياررەال» ماۋسىمدى وتە اۋىر باستادى. الايدا, سوڭعى ويىندا «بەتيسكە» سوققان گولىڭىز كوماندانى ارتىق قيىندىقتان قۇتقاردى دەپ ويلايسىز با؟

- ۇجىمدا ءبارىمىز تەك جەڭىستى عانا ماقسات تۇتتىق. جانكۇيەر قاۋىمنىڭ بىزدەن جەڭىس كۇتۋى ءبىر جاعىنان ارتىق قىسىم بولدى دەپ تە ايتۋعا بولادى. بىراق ەكىنشى جاعىنان ولاردىڭ قولداۋىن دا سەزىنە بىلدىك. نەگىزى مۇمكىندىكتەرىمىز كوپ بولعان, تەك ساتتىلىك جەتىسپەي جاتتى. دەگەنمەن, ءتۇپتىڭ تۇبىندە ءۇش گول سالىپ, ماقساتىمىزعا جەتتىك.

- تريبۋنادا وتىرعان جانداردىڭ قولداۋى قانشالىقتى ءرول اتقارادى دەپ ويلايسىز؟

- ماتچ كەزىندە ستاديونىمىزدىڭ تىنىش بولعانى ەسىمدە جوق. تريبۋنادا وتىرعاندار ءبىزدى ىلعي دا قولدايدى. ال ولاردىڭ نيەتى, تىلەگەن تىلەۋلەرى ءبىزدىڭ جەڭىسىمىزگە ۇلكەن سەپتىگىن تيگىزەدى.

ايان ءابدۋالي, «ەگەمەن قازاقستان»