وڭتۇستىك قازاقستان وبلىسىندا «مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ بىرىڭعاي ستاندارتتارىن ەنگىزۋ ماسەلەلەرى» جونىندە القالى جيىن ءوتتى.
جيىنعا وبلىس اكىمى, وبلىستىق باسقارما باسشىلارى, زيالى قاۋىم وكىلدەرى, تۇركولوگ-عالىمدار, جوعارى وقۋ ورىندارىنىڭ عالىمدارى, ءتىل ماماندارى, ماگيسترلەر مەن ستۋدەنتتەر جانە باق وكىلدەرى قاتىستى.
باسقوسۋدا ءسوز العان وڭتۇستىك قازاقستان وبلىسىنىڭ اكىمى جانسەيىت تۇيمەباەۆ لاتىن ءالىپبيىنىڭ ماڭىزدىلىعىنا ەرەكشە توقتالىپ, ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا الداعى جىلداردا مىقتاپ قولعا الۋ قاجەت بولاتىن بىرنەشە جوبانى ۇسىنعانىن اتاپ ءوتتى.
وتىرىسقا قاتىسۋشىلار جاڭا ءالىپبيدىڭ جوباسىن تالقىلاپ, تۇركولوگ عالىمدار لاتىن ءالىپبيىنىڭ بىرىڭعاي نۇسقاسىنا قاتىستى ءوز پىكىرلەرىن ءبىلدىردى.
ماسەلەن, فيلولوگيا عىلىمدارىنىڭ دوكتورى, پروفەسسور مەكەمتاس مىرزاحمەت ۇلى «لاتىن الىپبيىنە كوشۋ – سانانى وتارسىزداندىرۋ جولىنداعى ماڭىزدى قادام» تاقىرىبىنا كەڭىنەن توقتالسا, پروفەسسور, م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى فيلولوگيا فاكۋلتەتىنىڭ دەكانى بولاتبەك تىلەۋبەرديەۆ «بولاشاققا باعدار: رۋحاني جاڭعىرۋ» ماقالاسىمەن وبلىستاعى ونوماستيكالىق اتاۋلاردىڭ ساباقتاستىعى» جونىندە بايانداما جاسادى.
سونىمەن قوسا, وڭتۇستىك قازاقستان پەداگوگيكالىق ينستيتۋتى فيلولوگيا جانە تاريح فاكۋلتەتىنىڭ دەكانى ناريمان نۇرپەيىسوۆ «رۋحاني جاڭعىرۋ جولىنداعى تاريح تاعىلىمى» جونىندە تەرەڭنەن وي قوزعاسا, «لاتىن الىپبيىنە كوشۋ قاجەتتىلىگى» تاقىرىبىندا تاريح عىلىمدارىنىڭ كانديداتى, م.اۋەزوۆ اتىنداعى وڭتۇستىك قازاقستان وبلىسى مەملەكەتتىك ۋنيۆەرسيتەتىنىڭ كافەدرا مەڭگەرۋشىسى, دوتسەنت سارسەباي كارىباەۆ بايانداما جاسادى.
ماڭىزدى ماسەلەلەر تالقىلانىپ, جاقسى پىكىرلەر ايتىلعان باسقوسۋدى قورتىندىلاعان وڭتۇستىك قازاقستان وبلىسىنىڭ اكىمى جانسەيىت تۇيمەباەۆ لاتىن الىپبيىنە كوشۋ كەزىندە قازاق ءتىلىنىڭ ۇندەستىك زاڭدىلىقتارىن ساقتاۋعا ءمان بەرۋدى ۇسىندى.
«ەلىمىزدىڭ ەندىگى بولاشاعى – ساياسي-ەكونوميكالىق فاكتورمەن قاتار, ونىڭ مەملەكەتتىك ءتىلى – قازاق ءتىلىنىڭ تاعدىرىنا دا تىكەلەي بايلانىستى. سوندىقتان لاتىن الىپپەسىنە كوشۋدە قازاق ءتىلىنىڭ سينگورمانيزم جانە اسسيميلياتسيالىق زاڭدىلىعىن ساقتاۋىمىز كەرەك. ەگەر ولار ساقتالماعان جاعدايدا ءتىل بۇزىلادى. ەگەر مۇنى ساقتاعان جاعدايدا, ءتىلىمىزدىڭ ۇندەستىگى ونىڭ ادەمىلىگى, دۇرىس ايتۋى دا بۇزىلمايتىن بولادى», - دەدى جانسەيىت قانسەيىت ۇلى.
ءوڭىردىڭ تۇركولوگ-عالىمدارى مەن زيالى قاۋىم وكىلدەرى باس قوسقان جيىندا لاتىن الىپبيىنە كوشۋ مەن جاڭا الىپبيگە بەيىمدەلۋ ماسەلەسىندەگى ۇسىنىس-پىكىرلەر جيناقتالىپ, ساراپقا سالىناتىندىعى ايتىلدى.