الماتىدا جالپى اۋدانى 39 مىڭ شارشى مەتر بولاتىن جەڭىل اتلەتيكاعا ارنالعان سۋ جاڭا ستاديون بوي كوتەردى. ساۋلەتتى نىسان قالانىڭ الاتاۋ اۋدانى اۋماعىنداعى «الماتى ارەنا» سپورت سارايىنىڭ ماڭىندا ورنالاسقان. بۇل سوڭعى 40 جىل ىشىندە سالىنعان العاشقى جەڭىل اتلەتيكاعا ارنالعان جاتتىعۋ ستاديونى.
جاڭا ستاديوندا سپورتشىلار جەڭىل اتلەتيكانىڭ 47 ديستسيپليناسى بويىنشا جاتتىعۋعا بولادى. نىسان 6 جۇگىرۋ جولى, اكىمشىلىك عيماراتى, 100, 400 مەترلىك جۇگىرۋ جولدارىمەن قاتار, كولەمى 100ح70 جاساندى فۋتبول الاڭى, بيىكتىككە جانە ۇزىندىققا سەكىرۋ الاڭدارىمەن, سونىمەن قاتار, كولەمى 100ح62 مەتر تابيعي شوپپەن جابىلعان يادرو, ديسك, نايزا, شاربالعا لاقتىرۋعا ارنالعان ايماقپەن جاساقتالعان.
الاڭنىڭ سالتاناتتى اشىلۋ راسىمىنە الماتى قالاسىنىڭ اكىمى باۋىرجان بايبەك, دەمەۋشىلەر, سونداي-اق, ەڭبەگى سىڭگەن سپورتشىلار مەن باپكەرلەر جانە وليمپيادا ويىندارىنىڭ جۇلدەگەرلەرى ولگا رىپاكوۆا, داۋلەت تۇرلىحانوۆ, يسلام بايرامۋكوۆ, ەرماحان يبرايموۆ, باحتيار ارتاەۆ پەن ءامين تۇياقوۆتار قاتىستى. قالا باسشىسى الماتىلىقتاردى جەڭىل اتلەتيكا ستاديونىنىڭ اشىلۋىمەن قۇتتىقتاپ, جشس «الونس» جانە «يۋنيكوم» كومپانيالارىنا الىپ شاھار سپورتشىلارىنا ستاديوندى سالىپ, مەملەكەتكە سىيعا تارتقانى ءۇشىن العىسىن ءبىلدىردى.
– بۇل سوڭعى 40 جىل ىشىندە سالىنعان العاشقى جەڭىل اتلەتيكالىق جاتتىعۋ ستاديونى. ەلباسى نۇرسۇلتان ءابىش ۇلى نازارباەۆتىڭ «رۋحاني جاڭعىرۋ» باعدارلاماسىن ىسكە اسىرۋ اياسىندا «الونس» جانە «يۋنيكوم بيزنەس گرۋپپ» كومپانيالارى 605 ملن تەڭگە قارجىعا سالىپ, مەملەكەتكە سىيعا تارتىپ وتىر. ستاديون الماتى قالاسى جەڭىل اتلەتتەرىنىڭ جاتتىعۋ ورتالىعىنا اينالماق. الداعى ۋاقىتتا, «حالىق ارەنا» جانىندا تاعى دا 5 مىڭ ورىنعا ارنالعان حالىقارالىق ءبىرىنشى ساناتتى جەڭىل اتلەتيكا مانەجىن سالاتىن بولامىز.بۇگىن ءبىز اشىپ وتىرعان جاڭا جاتتىعۋ الاڭى جەڭىل اتلەتيكانىڭ قارقىندى دامۋىنا, ەلىمىزدىڭ تۋىن بيىككە جەلبىرەتەتىن سپورتشىلاردى دايىنداۋعا قىزمەت ەتەتىن بولادى دەپ سەنەمىن, – دەدى باۋىرجان بايبەك.
– جەڭىل اتلەتتەرگە ارنالعان ستاديوننىڭ اشىلعانىنا قۋانىشتىمىن. مۇنداي اشىلۋ جاقسى داستۇرگە اينالىپ, بارلىق قالالاردا وسى سپورت ءتۇرىنىڭ سپورتشىلارىنا ارنالعان سپورتتىق نىساندار اشىلسا ەكەن دەيمىن. مۇندا سپورتشىلار جاتتىعىپ, ءوز ماقساتتارىنا قول جەتكىزۋگە, ياعني چەمپيون اتانۋعا مۇمكىندىكتەرى بارشىلىق. البەتتە, بارلىعى چەمپيون بولا بەرمەيدى, ءبىزدىڭ باستى بايلىعىمىز – دەنساۋلىعىمىز, - دەپ اتاپ ءوتتى اشىلۋ راسىمىندە ارنايى ءسوز العان وليمپيادا جەڭىمپازى ولگا رىپاكوۆا.
الماتى قالاسىنىڭ جەڭىل اتلەتيكا فەدەراتسياسىنىڭ پرەزيدەنتى مۇحيت ازىرباەۆتىڭ ايتۋىنشا, ستاديوندا سپورتتىق مەكتەپ تاربيەلەنۋشىلەرى, جەڭىل اتلەتيكا اۋەسقويلارى جاتتىعا الادى. ول الداعى ۋاقىتتا مۇندا كوپتەگەن قالالىق جارىستار وتكىزىلەتىنىن دە تىلگە تيەك ەتتى. ايتا كەتەر جايت, ستاديون باس مەردىگەر جشس «الونس» پەن الماتى قالاسى اكىمدىگىنىڭ قولداۋىمەن سالىندى.
ارمان وكتيابر,
«ەگەمەن قازاقستان»
الماتى