بۇگىن استاناداعى قر تۇڭعىش پرەزيدەنتى – ەلباسى قورى جانىنداعى الەمدىك ەكونوميكا جانە ساياسات ينستيتۋتىندا (اەسي) «ەكسپو 2017. جاسىل ەكونوميكانىڭ كەلەشەگى» اتتى كونفەرەنتسيا ءوتتى.
استاناداعى ەكسپو-2017 حالىقارالىق مامانداندىرىلعان كورمەسى كەلۋشىلەر مەن ءتۇرلى مەملەكەتتەردىڭ ماماندارى تاراپىنان جوعارى باعا مەن جاعىمدى پىكىرلەرگە يە بولدى. قازاقستان تاڭداپ العان «بولاشاق ەنەرگياسى» تاقىرىبى بىرتىندەپ جاڭعىرمالى ەنەرگي كوزدەرىنە ءوتۋ قاجەتتىلىگى بويىنشا الەمدىك ترەندكە تولىقتاي جاۋاپ بەرەدى. «استانا ەكسپو-2017» قويىلعان ماقساتتى ءساتتى ورىنداپ, جاسىل تەحنولوگيالار سالاسىنداعى ۇزدىك زەرتتەمەلەردى كورسەتتى. كورمەنىڭ قازاقستان ەكونوميكاسىنىڭ دامۋىنا قوسقان مۋلتيپليكاتيۆتى اسەرىنە ەرەكشە نازار اۋدارىلدى.
– شاعىن جانە ورتا بيزنەستەگى 1400-دەن استام كاسىپورىن قۇنى 640 ميلليارد تەڭگە بولاتىن تاۋارلاردى جەتكىزۋگە جانە قىزمەت كورسەتۋگە تاپسىرىس الدى. تۋريستىك سەكتور جاندانا ءتۇستى. تۋروپەراتورلاردىڭ قىزمەتىنە دەگەن سۇرانىس 1,8 ەسە ارتتى. استانادا كاسىپكەرلىك سۋبەكتىلەرىنىڭ سانى 10 پايىزدان اسا كوبەيدى. ەلوردا بيۋدجەتىنە قىزمەت كورسەتۋ سالاسىنان تۇسكەن سالىق 1,2 ەسە ءوستى. قازاقستاننىڭ استاناسى بۇكىل الەمنىڭ نازارىن وزىنە اۋداردى, – دەدى مەملەكەت باسشىسى نۇرسۇلتان نازارباەۆ استانادا وتكەن كورمەنىڭ جابىلۋ راسىمىندە.
كونفەرەنتسيا بارىسىندا ساراپشىلار, ديپلوماتتار, ساياساتتانۋشىلار مەن قوعام قايراتكەرلەرى ەكسپو-2017 كورمەسىنىڭ العاشقى ناتيجەلەرىن تالقىلاپ, كورمەنىڭ قازاقستاننىڭ جاڭعىرمالى ەنەرگەتيكانىڭ دامۋىنا قوسقان ۇلەسىنە باعا بەرىپ, جالپى, الەمدەگى جاسىل تەحنولوگيالاردىڭ كەلەشەگىنە قاتىستى پىكىر الماستى.
- قازاقستان كەزەكتى رەت, تۇراقتى ەكونوميكالىق ءوسىمدى قامتاماسىز ەتەتىن جانە ەكولوگيالىق سىن-قاتەرلەردى جويا الاتىن مىقتى الەۋەتى بار, «جاسىل تەحنولوگيالار» سالاسىندا حالىقارالىق سەرىكتەستىككە بەيىم ەكەنىن كورسەتتى, - دەدى ءوز سوزىندە اەسي ديرەكتورى ەرجان سالتىباەۆ.
كونفەرەنتسياعا قاتىسۋشىلار ەلىمىزدىڭ «جاسىل ەكونوميكاعا» ءوتۋى, قازاقستاننىڭ تۇراقتى دامۋى, كليماتتى وزگەرتۋ بويىنشا پاريج كەلىسىمىن جۇزەگە اسىرۋ سەكىلدى وزەكتى سۇراقتار ارقىلى ەكسپو-2017 كورمەسىنىڭ قورىتىندىلارىن قاراستىردى. ساراپشىلار مەن اناليتيكتەر قازاقستاننىڭ «جاسىل باستامالاردى» ناسيحاتتاۋ بويىنشا ايماقتا كوش باستاپ تۇرعانىنىنا باسىم نازار اۋداردى.
- وزدەرىڭىز بىلەسىزدەر, ءبىز ورتالىق ازيا ەلدەرىنىڭ ىشىندە ءبىرىنشى بولىپ «جاسىل» ەكونوميكاعا ءوتۋ كونتسەپتسياسىن قابىلدادىق. بۇۇ باس اسسامبلەياسىنىڭ 66-شى سەسسياسىندا نۇرسۇلتان نازارباەۆ الەمگە «جاسىل كوپىر» سەرىكتەستىك باعدارلاماسى مەن ەۋرازيالىق «جاسىل» سەرىكتەستىك كەشەندى باعدارلاماسىن ازىرلەۋدى ۇسىنعان بولاتىن. بۇل جاعىنان العاندا «استانا ەكسپو-2017» اتالمىش جولدىڭ لوگيكالى جالعاسى بولا ءبىلدى, - دەدى ەرجان سالتىباەۆ.
شاراعا مەملەكەتتىك ورگاندار, «استانا ەكسپو-2017 ۇك» اق, قر تۇڭعىش پرەزيدەنتى – ەلباسى قورى, حالىقارالىق ۇيىمدار, قر اككرەديتاتسيالانعان ديپلوماتيالىق كورپۋس وكىلدەرى, سونىمەن قاتار, اناليتيكالىق ينستيتۋتتار مەن قوعامدىق ۇيىمداردىڭ ساراپشىلارى قاتىستى.