ەلورداداعى «قازاقستان» ورتالىق كونتسەرت زالىندا مادەنيەت جانە سپورت مينيسترلىگىنىڭ ۇيىمداستىرۋىمەن قازاقستاننىڭ ەڭبەك سىڭىرگەن قايراتكەرى, مەملەكەتتىك كۇزەت قىزمەتى پرەزيدەنتتىك وركەسترىنىڭ ءانشىسى ارداق بالاجانوۆانىڭ «سالعان ءانىم شىركىن-اي!» اتتى شىعارماشىلىق كەشى ءوتتى.
كەش باسىندا ارداق «اۋىلىم كوشىپ بارادى», «جەلسىز تۇندە جارىق اي», «بوزبالا», «ويلان, قۇربىم» سىندى اندەرىن پرەزيدەنتتىك وركەستردىڭ سۇيەمەلدەۋىمەن كورەرمەندەرگە تارتۋ ەتسە, كەنەن ازىرباەۆتىڭ سوزىنە جازىلعان «جاقسى بولسا جان جارىڭ» ءانىن ءۇش ىشەكتى دومبىرامەن, سونداي-اق «اسىل زات», «قوڭىر جەل» اندەرىن قوس ىشەكتى دومبىرامەن ورىنداپ بەردى. كەشكە ءانشىنىڭ ونەردەگى قۇربى-قۇرداستارى مەن اعا بۋىن وكىلدەرى دوسىمجان تاڭاتاروۆ, كلارا تولەنباەۆا, ەلمۇرا جاڭابەرگەنوۆا, ەربولات شالدىباەۆ قاتىسىپ, جىر-تەرمەلەر مەن ەسترادالىق اندەر ورىندادى.
ارداقتىڭ ونەرگە كەلۋى, ونىڭ شىعارماشىلىق جەتىستىكتەرى, ءانشى رەتىندەگى ەرەكشەلىكتەرى تۋرالى اتا-اناسى ءسابيرا احمەتوۆا مەن ءبايدىلحان بالاجانوۆتىڭ, ونەردەگى ۇستازدارى بەكبولات تىلەۋحان, باقىتجان كەنەن ۇلىنىڭ پىكىرلەرىن, لەبىزدەرىن كورەرمەن زالداعى ۇلكەن ەكران ارقىلى تاماشالادى. باقىتجان كەنەن ۇلى انشىگە ەڭ ءبىرىنشى قاجەت نارسە – داۋىستىڭ ارداقتا بار ەكەنىن, ونىڭ كەڭ تىنىستى انشىلەردىڭ قاتارىنا جاتاتىنىن ايتسا, بەكبولات تىلەۋحان ونىڭ وزىنە ءتان ىرعاقپەن سىرشىل اندەر ايتاتىنىن, سونداي-اق ءوز مانەرىن تاپقان ءانشى ەكەنىن جەتكىزدى.
كەش بارىسىندا ارداق بالاجانوۆا «پاي-پاي» تريوسىمەن بىرگە دە ءان سالدى. سونداي-اق «ناز» مەملەكەتتىك بي تەاترىنىڭ دا ونەرى كوپشىلىككە ۇسىنىلدى.
ايگۇل سەيىل, «ەگەمەن قازاقستان»