پارلامەنت سەناتىنىڭ توراعاسى قاسىم-جومارت توقاەۆ جاپونيا كەڭەسشىلەر پالاتاسى شەت ەلدەردى دامىتۋعا رەسمي كومەك جونىندەگى ارنايى كوميتەتتىڭ توراعاسى سيگەكي يۆاي باستاعان دەلەگاتسيانى قابىلدادى.
ق.توقاەۆ ەكىجاقتى قاتىناستاردىڭ نەگىزى ماقساتتار مەن قۇندىلىقتار ورتاقتىعىنان, سونداي-اق ەكى ەلدىڭ كوشباسشىلارى اراسىندا ورناعان سەنىمدى ۇنقاتىسۋدان قۇرالاتىنىن اتاپ ءوتتى.
سەنات توراعاسى مەملەكەت باسشىسىنىڭ باستاماسىمەن ازىرلەنگەن «تسيفرلىق قازاقستان» باعدارلاماسىن ىسكە اسىرۋعا قاتىسۋدى, سونداي-اق بۇۇ اياسىنداعى «جاسىل» تەحنولوگيالاردى دامىتۋ جونىندەگى ورتالىقتى قولداۋدى ۇسىندى.
سەنات باسشىسى استانادا حالىقارالىق قارجى ورتالىعىن قۇرۋ جونىندەگى جۇمىستار تۋرالى جاپون دەلەگاتسياسىن حاباردار ەتتى. «ەكسپو-2017 اياسىنداعى ورتالىقتىڭ قاتىسۋشىلارىنا بيزنەستى جۇرگىزۋ ءۇشىن قولايلى جاعدايلار جاسالادى, استانا حالىقارالىق قارجى ورتالىعىندا بريتان قۇقىقتارىنىڭ قاعيداتتارىنا نەگىزدەلگەن سوت جۇيەسى قىزمەت ەتەتىن بولادى. وسىعان بايلانىستى جاپوندىق ارىپتەستەردى جاڭا حالىقارالىق قارجى قۇرىلىمىنىڭ جۇمىسىنا اتسالىسۋعا شاقىرامىز», - دەدى ق.توقاەۆ.
س.يۆاي قازاقستاندىقتاردى ەكسپو-2017 حالىقارالىق كورمەسىنىڭ تابىستى وتۋىمەن قۇتتىقتادى. «بۇل تاريحي وقيعا. كوپتەگەن ەلدەر بولاشاقتىڭ ەنەرگيا سالاسىندا بىلىمىمەن جانە تاجىريبەسىمەن الماسۋدىڭ ءتيىمدى مۇمكىندىگىنە يە بولدى», - دەدى ول. جاپون پارلامەنتشىسى 2025 جىلى وساكا ەكسپو حالىقارالىق كورمەسىن قابىلداعىسى كەلەتىنىن ايتا كەلىپ, جاپونيا كانديداتۋراسىن قولداۋ جونىندەگى ءوتىنىشىن جەتكىزدى.
ق.توقاەۆ قازاقستاننىڭ پارلامەنتارالىق بايلانىستاردى دامىتۋعا مۇددەلى ەكەنىن اتاپ ءوتىپ, جاپون ارىپتەستەرىن ساپار الماسۋدى جيىلەتۋگە شاقىردى.