جۋىردا بەلگىلى تەاتر سىنشىسى, مارقۇم اشىربەك سىعايدىڭ ءومىرى مەن شىعارماشىلىعىنا ارنالعان «سىن ساردارى» اتتى كىتاپ جارىققا شىقتى. كىتاپتىڭ تۇساۋى ەلورداداعى ۇلتتىق اكادەميالىق كىتاپحانادا كەسىلدى.
تۇساۋكەسەردى مەملەكەتتىك سىيلىقتىڭ يەگەرى, جازۋشى تولەن ابدىك جۇرگىزدى. ول تەاتر سىنشىسىنىڭ جان-جاقتى تالانت يەسى بولعانىن, اسىرەسە بىلىمدىلىگىن, قىراعىلىعىن, ىسكەرلىگىن, ۇيىمداستىرۋ قابىلەتىنىڭ جوعارى بولعانىن, شەشەندىگىن ءسوز ەتتى. سوعان قاتىستى ەرتەرەكتە بولعان وقيعالاردى ەستەلىك رەتىندە ايتىپ, ءوزى بەرگەن مىنەزدەمەلەرىن دايەكتەپ وتىردى. جازۋشى سىنشىعا «قازاق تەاترىنىڭ ەنتسيكلوپەدياسى» دەگەن باعا بەردى. سونداي-اق, ونىڭ كوپ جازعان كەيىپكەرلەرىنە دە توقتالدى. سول كوپ كەيىپكەردىڭ ءبىرى – اڭىز ادام, ايگىلى اكتەر, قازاقستاننىڭ ەڭبەك ەرى ءاسانالى ءاشىموۆ. ايگىلى اكتەر اشىربەك سىعاي جازبالارىنىڭ كورەگەندىكپەن, اسقان مادەنيەتتىلىكپەن جازىلىپ, زامانىندا تالاي اكتەردىڭ ءوز كەمشىلىگىن تۇزەۋىنە تۇرتكى بولعانىن باياندادى.
«ول تەاتردىڭ باقىتى بولدى. اكتەر, رەجيسسۋرا, دراماتۋرگيا – ۇشەۋى وشاقتىڭ ءۇش بۇتىنداي تۇتاس دۇنيە. وسى ۇشەۋىنىڭ باسىن قوساتىن ادام – تەاتر سىنشىسى. بۇل تۇرعىدان العاندا اشىربەك ءوز ميسسياسىن جاقسى ورىندادى. مەنىڭ باقىتىم – اشىربەك سياقتى ءىنى-دوسىمنىڭ بولۋىندا. ءبىز ءشاي دەسپەگەن كۇيى كەتتىك»-دەگەن ءاسانالى ءاشىموۆ وسى كۇندەردە ەلوردادا ءوتىپ جاتقان اشىربەك سىعايدىڭ 70 جىلدىعىنا ارنالعان تەاتر فەستيۆالى جىل سايىن وتكىزىلىپ تۇرسا دەگەن ۇمىتتەرى بار ەكەنىن دە مالىمدەدى.
ەكى ساعاتتان اسا ۋاقىتقا سوزىلعان كەشتە سىنشىنى كوز كورگەن, بىرگە قىزمەت ىستەگەن, تالاي ساپارلاردا بىرگە جۇرگەن, قامقورلىعىن سەزىنگەن, ەڭبەگىن دە, ەسىمىن دە قۇرمەت تۇتاتىن قوعامعا تانىمال كوپتەگەن كىسىلەر ءسوز الدى. ونىڭ ىشىندە اكتريسا مەرۋەرت وتەكەشوۆا, جازۋشى راحىمجان وتارباي, قوعام قايراتكەرى ورازگۇل اسانعازى, سىنشى ءاليا بوپەجانوۆا, باقىت نۇرپەيىس, كينوتانۋشى ءنازيرا راحمانقىزى, اعا دوسى تۇركىستاندىق جارىلقاسىن ازىرەتبەرگەن, تەاتر سىنشىسى ولەگ پيۆوۆاروۆ, تاريحشى كامال بۇرحانوۆ سىندى ءتۇرلى سالانىڭ وكىلدەرى اشىربەك سىعاي تۋرالى جىلى ەستەلىكتەرمەن ءبولىستى. اسىرەسە, سىنشى, كينوتانۋشىلار جاعى مارقۇمنىڭ سىناعاندا ەشكىمنىڭ جانىن جارالاماي, سيپاي قامشىلاپ, جىبەكتەي جەلپىپ جاۋ ارتتىرماي جازعان, سىن مادەنيەتىن بيىك دەڭگەيگە كوتەرگەن قاسيەتىن ءسوز ەتىستى.
ال ەندى «سىن ساردارى» اتتى كىتاپقا كەلەر بولساق, وعان زامانداس اقىن-جازۋشىلاردىڭ, سىنشىلاردىڭ, اعا بۋىن ونەر وكىلدەرىنىڭ, ونەردەگى ءىنى-قارىنداستارىنىڭ تەاتر سىنشىسى تۋرالى تولعانىستارى, ماقالالارى مەن ەستەلىكتەرى, ولەڭدەرى ەنگىزىلگەن. كىتاپتى قۇراستىرعان تەاتر سىنشىسىنىڭ جۇبايى – كۇلاش سىعاي. ول كىتاپقا ماتەريالداردى اشىربەك سىعاي قايتىس بولعان سوڭ ءباسپاسوز بەتتەرىندە جارىق كورگەن ماتەريالداردان توپتاستىرعانىن اڭگىمەلەدى. ونىڭ ايتۋىنشا, كىتاپتىڭ ەكىنشى تۇساۋكەسەرى, ياعني, تانىستىرىلىمى الماتى قالاسىندا وتپەك. كىتاپ مەملەكەتتىك تاپسىرىسپەن, ء«داستۇر» باسپاسىنان بەس مىڭ دانامەن شىعىپ وتىر.
ايگۇل سەيىل, «ەگەمەن قازاقستان»